Ezequiel 31 - Biblia en Guaraní - ?anderuete ?e’? Por? 2015

Cédro Líbano pegua

1Ojehu pe áño 11-hápe, pe jasy mbohapyhápe ha ára peteĩháme, Ñanderuete ñe’ẽ ou chéve ha he’i:

2Kuimba’e ra’y, ere faraon, Egípto retã ruvichápe ha hetãyguakuérape: Máva rehe piko oñembojojára’e nde pu’aka.

3Pema’ẽ porãke, Che ahecha peteĩ cédro Líbano pegua, hakã porã ha ijyvatetéva, omyasãiva kuarahy’ã porã ha hu’ã ipojáiva arai rehe.

4Pe ama omongakuaa porã ichupe, ha pe y yvyguy pegua omboyvate ichupe; ijysyrykuéra osyry ijerekuévo ha mayma yvyra ñume oikóva rehe,

5upévare opu’ã yvateve mayma yvyra ñu rupiguágui ha oñemohakã heta, ha pe ysyry omyasãi porã hakãnguéra.

6Hakãnguéra rehe ojaitypo umi guyra yvate ovevéva, ha hakã guýpe mymba saitekuéra imemby joa, ha ikuarahy’ãme oiko heta tetãnguéra.

7Ituichakue iporãiterei ha hakãnguéra oñemyasãi porã hapokuéra oĩgui yeta rembe’ýpe.

8Umi cédro Ñanderuete kóga pegua nombojojái ichupe, umi píno rakã ndohupitýi iporãnguépe, umi castáño rakãnguéra imichĩve ichugui, mba’eveichagua yvyra Ñanderuete kóga pegua naiporãi ha’éicha.

9Ajapo porãiterei ichupe amohakã hetaitévo, ha mayma yvyra Eden pegua, oĩva guive Ñanderuete kógape, oikoseiterei ha’éicha,

10upévare péicha he’i pende Ruete: Okakuaágui yvateiterei, ha opu’ãgui hu’ã arai apytépe oñepyrũ oñembotuicha ipy’apýpe,

11upévare Che amoĩta ichupe ambue tetã imbaretéva poguýpe, ha añetehápe ambopoguýta ichupe iñaña haguére, Che amboykéma ichupe.

12Ha tetã ambueygua ohundíta ichupe, umi tetã imbaretéva oitýta ichupe; hakãnguéra ho’áta umi cérro ári ha opaite cerrokuéra pa’ũha rupi, ha opaite yakãnguéra omopẽmbáta hakãnguéra ha ikuarahy’ãgui ohopáta mayma tetãnguéra, ha ohejapáta ichupe.

13Pe yvyra ho’ava’ekuépe oguapýta opaichagua guyra yvate ovevéva, ha opaichagua mymba saite ñu rupiguáva oñembojáta hakãnguéra guýpe.

14Oñembotuicha haguére ndokakuaamo’ãvéima ymaguaréicha, pe yvyra ko’ag̃agua oiko ramojepe yeta ypýpe hu’ã nomopu’ãvéima arai apytépe. Ani umi hoy’úva hi’y porãva ojerovia ijyvatekuérente, oimeraẽvape g̃uarã og̃uahẽta katuete hi’ára paha, ha oguejyva’erã yvy guýpe ha oikova’erã ambue omanómava apytépe.

15Péicha he’i pende Ruete: Ha’e oguejyha ára omanóva retãme, ambuekuéra oñembyasýta, amondeuka ao vosakuépe pe yguasu hypa haguére, ha ajoko umi ysyry, ha umi yeta opytapa; hese pe Líbano oñembyasy, ha mayma yvyra ñu rupigua ipy’amanomba.

16Ho’a ha hyapukuégui amboryryipáta umi tetãme, Che aitývo ichupe omanómava retãme, amondóvo ityvýpe; ha mayma yvyra Eden pegua ojeporavopyréva ha umi omboy’úva guive, oñomoangapyhy joaitéta upe yvykua pypukuhápe.

17Ha’ekuéra oguejyva’erã avei hendive omanóva retãme, oĩháme umi omanomava’ekue kyse pukúpe, umía oikomava’ekue ichupe g̃uarã ipytyvõharakue ramo, ha oikova’ekue ikuarahy’ãme tetãnguéra apytépe.

18Mávarehe piko reñembojojára’e, nde faraon, péicha remimbi ha reñembotuicha hag̃ua umi Eden pegua yvyra apytépe. Upeichavéramo jepe, nde, faraon, rejeitýta avei umi Eden pegua yvyra reheve pe yvykua ipypukuvehápe; ha upépe reñenóta umi ipire’i oñekytĩ’o’ỹva ndive, umi kyse pukúpe omanova’ekue ndive. Faraon ha opaite hetãyguakuéra ningo ko yvyra kóva, he’i pende Ruete.