2 Crónicas 7 - Biblia en Guaraní - ?anderuete ?e’? Por? 2015

1Salomon oñembo’epávo, oguejy yvágagui tata ha ohapypa pe kuave’ẽmby ojehapypáva oñemoĩva’ekue pe kuave’ẽmby renda ári; ha Ñanderuete reko jajaipa omyenyhẽ hogaguasu.

2Ha umi pa’i ndaikatuvéi oike Ñanderuete rogaguasúpe, Heko jajaipa omyenyhẽgui hogaguasu upéjave.

3Ha mayma Israel ñemonarengúera ohechávo oguejyha tata ha Ñanderuete reko jajaipa hogaguasu ári oñesũ hikuái tĩndyhápe pe yvy ape atã ári ha omboete ha omomba’eguasu Ñanderuetépe, he’ívo: Ha’e taipy’aporã ha taiporiahuvereko opaite árape hetã ndive.

4Upéramo tetã ruvicha ha opaite tetãyguakuéra oikuave’ẽ hymbakuéra Ñanderuete renondépe.

5Ha tetã ruvicha Salomon oikuave’ẽ 22.000 tóro ra’y rusu ha 120.000 ovecha ha kavara; upéicha tetã ruvicha ha hetãyguakuéra oñepyrũ omomba’eguasu Ñanderuetépe hogaguasúpe.

6Ha pa’ikuéra ojapopa hembiapo; ha Leviguakuéra omomba’eguasu imba’epukuérape Ñanderuetépe, umi tetã ruvicha David ojapoukava’ekue omomomba’eguasu hag̃ua ichupe, iporiahuvereko opytágui opaite árape. Ha pa’ikuéra ombopu avei turukuéra henondépe, ha opaite Israelguakuéra oĩ ñembo’yhápe.

7Upérõ Salomon oñepyrũ omomba’eguasu Ñanderuetépe pe korapyguasu oĩva Ñanderuete róga renondépe, upépe Ha’e oikuave’ẽ avei kuave’ẽmby ojehapypáva ha umi kuave’ẽmby py’aguapy rehegua ikyrakue; pe kuave’ẽmby renda bronceguiguápe, Salomon ojapoukava’ekue, ndaijapái umi kuave’ẽmby ojehapypáva ha umi ambue kuave’ẽmby ha tymba kyrakue.

8Upéramo Salomon ojapo vy’aguasu 7 ára pukukue, ha hendive opaite Israelgua, peteĩ aty ndetuichaitéva, Hamat reike guive Egípto yakã meve.

9Pe ára 8-hápe ojapo hikuái atyguasu tuichavéva gueteri ojapova’ekuégui umi 7 ára ojapo tenondeva’ekuégui, omoñepyrũvo pe kuave’ẽmby rembiapo peteĩ semána pukukue.

10Ha pe ára 23-hápe, pe jasy 7-hápe, Salomon omondopa hetãyguakuérape hógape, vy’a ha py’a rorypópe oho hikuái Ñanderuete ojapo haguére mba’eporãita David, Salomon ha hetã Israélpe g̃uarã.

Ñanderuete oñembopy’apeteĩ Salomon ndive

11Ha Salomon ojapo porãmba rire Ñanderuete rogaguasu, tetã ruvicha róga ha opaite mba’e ojaposeva’ekue Ñanderuete rógape g̃uarã,

12Ñanderuete ojehechauka jevy Salomónpe pyharekuépe, ha he’i ichupe: Che ahendúma ne ñembo’e, ha aiporavóma ko che róga kuave’ẽmby rendag̃ua ramo,

13ha Che amboty ramo yvága anive hag̃ua oky, ha ambou ramo tuku ombyai hag̃ua pe yvy, térã ambou ramo mba’asy iñasãiva che retãme oñemoangaipa haguére;

14ha che retã oñemomirĩ jevy ramo, oñehenói voi che réra rupi, ha oñembo’e ramo hikuái ohekávo che rova, ha opoi ramo hape vaígui; upéicharamo Che ahendúta ichupekuéra yvága guive ha aperdonáta hi’angaipakuéra ha amongueráta avei ijyvy iplagakuéragui.

15Ko’ág̃a che resa ha che apysa oñangarekóta iñembo’ekuéra rehe ojejapóva guive ko óga kóvagui.

16Ko’ág̃a Che aiporavóma ko ogaguasu, oñemboykéma chemomba’eguasu hag̃ua opaite árape; ha che resa ha che py’a oĩta ipype tapiaite.

17Ha nde reiko ramo che renondépe nde ru David oiko haguéicha, ha rejapo ramo Che ha’eva’ekue guive ndéve, ha rejapo ramo che rembipota ha che ñe’ẽ,

18upéicharamo nde repytáta pe tetã ruvicha guapyhaguasúpe ha Che aĩta pe ñe’ẽ ame’ẽ haguéicha nde ru Davídpe, ha’évo: Tapia oĩva’erã ne ñemoñarenguéra apytépe peteĩ kuimba’e oisãmbyhýtava Israel retãme.

19Ha peẽ pemboyke ha pepoi ramo che ñe’ẽ ha che rembiapoukapýgui amoĩva’ekue pene renondépe, ha peho ramo pemomba’eguasu hag̃ua ambue járape ha peñembo’e ramo ichupekuéra,

20Che pomosẽta che retãgui ame’ẽmava’ekue peẽme; ha pomosẽta ko ogaguasúgui oñembotuichahápe che réra ha ajeíta ijypýgui, ha peẽ peikóta ñembohoryha ha jepukaha ramo opaite tetãnguéra renondépe.

21Ha ko óga mimbi iporãitéva opáta ha mayma ohasáva guive oñemondýita ha omba’eporandúta hikuái: Mba’érehepa Israel Jára péicha ojapo ko tetã ha ko ogaguasu kóva rehe.

22Ha oje’eva’erã ichupekuéra: Opoi haguére hikuái Ñanderuete, ituvakuéra Járagui, oguenohẽmava’ekue ichupekuéra Egípto retãgui, ha omomba’eguasúgui ambue jarakuérape oiko hag̃ua hembiguaikuéra ramo; upévagui Ha’e ogueru ko’ã mba’evai hi’arikuéra.