Salmokuéra 7 - Biblia en Guaraní - ?anderuete ?e’? Por? 2015

Ñanderuete oporombojovake hendaitépe Cúspe - David purahéi

1Ñanderuete, che Jaratee, nderehe ajerovia, cheguenohẽmína umi chemuña muñávagui (cheperseguívagui), chepytyvõmína.

2Ani hag̃ua ha’ekuéra chemondyryry ku jaguarete ojapo háicha ha chepehẽ’amba hikuái ndaipórigui chepytyvõva.

3Ñanderuete, che Jaratee, che piko ajapo koichagua mba’evai térãpa amongy’a che po koichagua tembiapo vai rupi.

4Amyengovia piko mba’evai rehe umi oiko porãva chendive, térãpa aipytyvõ gueteri umi chejopývape.

5Ajapo vai ramo che irũ rehe tomuña hikuái che ángape, toity yvy rehe che rekove ha topyrũmba hese, ha che rerakuã porã to’a yvy timbo rehe. Selah

6Epu’ãmína, Nde, che Ruete, nde pochy reheve, ha eñemoĩ pochypópe umi chepy’apy asýva rehe, epaymína chepytyvõ hag̃ua remboúvo ne ñembojovake hekoite peguáva.

7Tetãnguéra aty nembojerepáta, ha eguapy jevy yvate (rembopoguy rire ichupekuéra).

8Ñanderuete embojovake tetãnguérape, ha chéve avei. Nde, che Ruete, chembojovake hendaitépe ndajapóigui mba’e ivaíva.

9Topa rei umi tekove ñañáva, emopu’ã katu hembiapo vai’ỹvape; Ñanderuete justícia ombojovake porãgui ñane akã ha ñande py’apýpe oĩva guive.

10Ñanderuete rehe añemo’ã, Ha’e oipe’a umi ipy’a potĩvape ijejopy vaígui.

11Ñanderuete oporombojovake hendaitépe, Ha’e ipochy tapiaite heko vaíva ndive.

12Ha’e noñembyasýirõ ojapo vai haguére, Ñanderuete ombosako’íta iguyrapa ha ohãimbe’éta ikyse puku.

13Upéicha Ha’e ombosako’i hembiporu oporojuka hag̃ua, ha ihu’y hendýva ohovere hag̃ua.

14Eikuaa porãke, pe tekove ñaña omoheñói hembiapo vai, hyeguasu ñaña rekógui ha imemby ñembotavy.

15Ojo’o yvykua ha ombopypuku, ha ijyvykuápe ha’e voi ho’áta.

16Hembiapo vaikue ho’a jevýta iñakã ári ha heko ky’a ho’áta iñakã mbytetépe.

17Amomba’eguasúta Ñanderuetépe hekoitepeguágui Ha’e, ha agueropurahéita Ñanderuete yvatetegua réra.