1 Réyes 9 - Biblia en Guaraní - ?anderuete ?e’? Por? 2015

Ñanderuete oñembopy’apeteĩ Salomón ndive

1Salomón ojapopa rire Ñanderuete rogaguasu, ha tetã ruvicha róga ha opaite ambue mba’e Salomón ojaposeva’ekue guive,

2Ñanderuete ojehechauka jevy Salomónpe, ku Gabaónpe ojehechaukárõ guaréicha.

3Ha Ñanderuete he’i ichupe: Che ahendúma ne ñembo’e ha ne mba’ejerure rejapomava’ekue chéve g̃uarã. Che aiporavóma ko ogaguasu kóva nde remopu’ãmava’ekue amoĩ hag̃ua ipype che réra opaite árape, ha Che añangarekóta ha chemandu’áta opaite árape che rogaguasu rehe.

4Ha nde reiko ramo che renonderãme nde ru David oiko haguéicha py’a marã’ỹ ha py’apy potĩ reheve, ha rejapo ramo che rembiapoukapykuéra, che mbo’epykuéra ha opaite mba’e Che ha’emava’ekue guive ndéve,

5upéicharamo nde ha ne ñemoñarenguéra pepytáta opaite árape Israel retã guapyhaguasúpe, añe’ẽ haguéicha nde ru Davídpe, ha’évo: Tapiaite oĩva’erã kuimba’e ne ñemoñaréva apytégui oguapýva Israel retã guapyhápe.

6Peẽ ha pende ra’ykuéra katu pejei ramo chehegui ha ndapejapói ramo che rembiapoukapy che amoĩmava’ekue pene renondépe, ha peho ramo pemomba’eguasu ambue járape, ha peñembo’e ramo ichupekuéra,

7upérõ Che amosẽta Israélpe ko tetãgui Che ame’ẽmava’ekue ichupekuéra, ha avei ko ógagui Che aiporavomava’ekue che rérape g̃uarã, ha Che amombóta Israélpe che renondégui, ha peẽ peikóta toryjárõ ha ñembohoryha ramo opaite tetãnguéra apytépe.

8Ha ko ogaguasúgui oikóta tapereguasu, oimeraẽva ohasáva ijypy rupi ipy’andyiva’erã, ha oñembohoryva’erã, he’ívo: Mba’érehepa péicha ojapo Ñanderuete ko tetã ha ko ogaguasu kóva rehe.

9Ha oje’eva’erã: Opoígui hikuái Ijára, Jahvégui, oguenohẽva’ekue ituvakuérape Egípto retãgui, ha ohógui jára gua’ukuéra rapykuéri, ha oñembo’e ha omomba’eguasúgui ichupekuéra, upéicha rupi Ñanderuete ogueru hi’arikuéra ko’ã mba’evaieta.

Salomón nombovy’ái Hirámpe

10Salomón omba’apo 20 áño pukukue ojapopa peve Ñanderuete róga ha tetã ruvicha róga.

11Hiram, pe Tíro retã ruvicha, ogueruva’ekue Salomónpe yvyra cédro ha cipres, ha óro oipota háicha, upévare tetã ruvicha Salomón ome’ẽ Hirámpe 20 táva Galiléa retãme.

12Ha Hiram osẽvo Tírogui ohecha hag̃ua umi táva Salomón ome’ẽmava’ekue ichupe, ha’e katu ndoguerohoryiete.

13Ha Hiram he’iuka Salomónpe: Mba’eichagua táva piko reme’ẽva’ekue chéve, che ryke’y. Ha ombohéra pe yvy Cazbul, ha upéicha héra ko ára kóva peve.

14Ha Hiram oguerahaukava’ekue tetã ruvicha Salomónpe 4020 kílo óro.

Salomon rembiapokuéra

15Umi mba’apohára omopu’ãva’ekue Ñanderuete rogaguasu, tetã ruvicha rógaguasu, Milo, Jerusalén táva tápia yvatekuéra, Hazor ha umi omombareteva’ekue Megído ha Gézer, ndopoíri hembiapógui, Salomón, omomba’apoukave katu ambue tembiapópe.

16Ko táva Gézerpe oiko gueteri Canaanguakuéra; faraon katu, Egípto retã ruvicha ombopoguy Gézerpe ha ome’ẽ itajýrape, Salomon rembireko, jopói ramo.

17Upéi Salomon omopu’ã jevy umi mba’apohára ndive Gézer, ha avei Bet-horon, iguy pegua.

18Balaat ha Tamar, pe ñuguasúpe, Juda retãme.

19Salomón omopu’ã avei heta táva ombyaty hag̃ua tembi’u, ha umi táva oĩháme icarrokuéra ha isoldádo kavaju arigua, ha heta ambue mba’e Salomón omopu’ã Jerusalén ha Líbanope, ha hetãpýpe, ha’e oisãmbyhyhápe.

20Ha umi tetã ambueygua hembýva gueteri, Amorgua, Hetgua, Ferezgua, Hevgua ha Jebusguakuéra apytégui,

21ha oñemosarambíva Israel retã rehe, ha Israelguakuéra nohundiriva’ekue, umía Salomón oiporu hembiguái ramo omopu’ã hag̃ua ha’e ojapoukaséva guivépe.

22Salomón ndojopýi Israelguakuérape ko tembiapo pohýipe g̃uarã, oikónte hikuái ñorãirõhára ramo, térã ipytyvõhára ramo, mburuvicha ramo, cárro ruvicha ramo, térã kavaju arigua ramo.

23Ha Salomón omoĩ 550 mburuvicha oñangareko hag̃ua hembiguaietáre.

24Ha faraón rajy ojupi David távagui hogateépe, Salomón omopu’ãva’ekue ichupe g̃uarã, ha uperire Salomón omopu’ã Milo.

25Mbohapy jevy cáda áñope Salomón ojapopa rire Ñanderuete rogaguasu, ha’e oikuave’ẽ kuave’ẽmby ojehapypáva ha kuave’ẽmby py’aguapy reheguáva pe kuave’ẽmby renda ári ha’e voi omopu’ãva’ekue Ñanderuetépe g̃uarã ha ohapy avei mba’e ryakuã porã pe kuave’ẽmby renda ári, oĩva Ñanderuete renondépe;

26tetã ruvicha Salomón ojapouka avei bárco guasukuéra Ezion-géberpe, oĩva Elat ykére, pe Yguasu Pytã rembe’ýpe, Edom retãme.

27Ha Hiram omondo hembiguaikuéra ikatupyrýva yguasúpe, ombo’e hag̃ua Salomón rembiguaikuérape mba’éichapa oñemboguatava’erã umi barcoguasu yguasuetépe.

28Ha’ekuéra oho Ofírpe ha upégui ogueru hikuái 14.070 kílo óro Salomónpe g̃uarã.