Juéces 1 - Biblia en Guaraní - ?anderuete ?e’? Por? 2015

Juda ha Simeon omoĩ Adoni-bezec ipoguýpe

1Ha ojehu Josue omano rire, umi Israel ñemoñare omba’eporandu Ñanderuetépe he’ívo: Máva raẽpa ore apytégui ohóta ojeity hag̃ua Canaanguakuéra ári.

2Ha Ñanderuete he’i: Juda raẽ ohóta, péina ápe Che amoĩma pe yvy ipópe.

3Ha Juda he’i ityke’ýra Simeónpe: Ejúna chendive pe yvýpe oñeme’ẽva’ekue chéve, ha ñañorãirõ Canaanguakuéra ndive, ha upéi che aháta avei nendive ne mba’épe. Ha Simeon oho hendive.

4Juda oho, ha Ñanderuete omoĩ ipópe umi Canaangua ha Ferezguápe; ha ojuka hikuái Bezécpe 10.000 ikuimba’épe.

5Ha Bezécpe ojohu hikuái Adoni-Bezécpe, ha oñorãirõ hikuái hendive; ha sarambi ojapo umi Canaangua ha Ferezguakuéragui.

6Adoni-Bezec katu okañy; ha oho hikuái hapykuéri ha ojapyhývo ichupe oikytĩ hikuái ichugui ikuã ha ipysãguasukuéra.

7Upéramo Adoni-bezec he’i: 70 mburuvichaguasúgui aikytĩuka ikuã ha ipysãguasukuéra, ha upéi ombyaty hembi’urã, che pan ku’ikue ho’ava’ekue che mesa guýpe; che ajapo haguéicha, péicha Ñandejára omyengovia ko’ág̃a chéve. Ha ogueraha ichupe hikuái Jerusalénpe, ha upépe omano.

Juda oñemomba’e Jerusalen ha Hebron rehe

8Ha Juda ñemoñarenguéra ondyry Jerusalen rehe ha omoĩ ipoguýpe, upéi ojukapa kyse puku rãimbépe umi ipype oikóvape ha ohapy pe táva.

9Upéi umi Juda ñemoñare ou ha ojeity umi Canaangua ári oikóva umi cérro rehe ha Négev ñuguasu rehe.

10Ha Judayguakuéra oñorãirõ ohóvo umi Canaangua ndive oikóva Hebrónpe, Hebron herava’ekue Quiriat-arba, ha ojuka hikuái Sesai, Ahiman ha Talmaípe.

Otoniel oñemomba’e Debir rehe.

11Upégui oho hikuái ojeity hag̃ua umi Debírpe oikóva ári, ymave Debir herava’ekue Quiriat-séfer.

12Ha Caleb he’i: Pe ondyrýva Quiriat-séfer rehe ha omoĩva ipoguýpe, che ame’ẽta ichupe che rajy Acsa, hembirekorã ramo.

13Ha Otoniel, Cenaz ra’y, Caleb ryvy omoĩ ipoguýpe; upéicha Caleb ome’ẽ ichupe itajýra Acsa hembirekorã ramo.

14Ha Acsa ohóvo hendive, omoinge iména akãme ojerure hag̃ua itúvape peteĩ ñúre. Ha Acsa oguejývo ibúrro árigui, Caleb oporandu ichupe: Mba’épa ojehu ndéve.

15Acsa he’i ichupe: Eme’ẽna chéve peteĩ jopói; reme’ẽma chéve yvy Négevgui, eme’ẽna avei chéve y rendag̃ua. Upéramo Caleb ome’ẽ ichupe umi yvu yvategua ha yvy gotyogua.

Juda ha Benjamin oñemboyvy

16Ha Hobab, pe Cengua, Moises rovaja, osẽ avei ipehẽnguekuéra ndive Jericógui Juda ñemoñarenguéra ndive, opyta hag̃ua Négevpe, Arad ypýpe, oiko hag̃ua avei Judayguakuéra yvýpe.

17Ha Juda oho ityke’ýra Simeon ndive, ha sarambi ojapo hikuái umi Canaangua apytépe oikóva Sefátpe, ha ombotapere rire itáva ombohéra Horma.

18Gáza, Ascalon, Ecron ha iñunguéra rehe, oĩva umi táva jerekuévo ho’a avei Judayguakuéra poguýpe.

19Ñanderuete oipytyvõ Judayguakuérape omosẽmba hag̃ua umi oikóvape umi cérrope; ha umi ñu rupiguágui katu Judayguakuéra okyhyje oguerekógui cárro hierroguiguáva.

20Ha pe táva Hebron oñeme’ẽ Calébpe, Moises he’i haguéicha; ha Caleb omosẽ upégui Anac ra’y mbohapyvévape.

21Ha Benjaminguakuéra ndikatúi omosẽ Jebusguakuérape Jerusaléngui, upévare Jebusguakuéra oiko Benjamin ñemoñarenguéra apytépe ko ára peve.

Jose ñemoñerenguéra omoĩ ipoguýpe Betel

22Jose ñemoñarenguéra oho avei ojeity hag̃ua Betel ári; ha Ñanderuete oĩ hendivekuéra.

23Ha Jose ñemoñarenguéra omondo umi omaña ñemíva Betel rehe, ko táva oñemboherava’ekue Luz.

24Ha umi omaña ñemíva ohecha peteĩ kuimba’e osẽvahína pe távagui ha he’i ichupe hikuái: Ko’ág̃a ehechauka oréve moõ rupípa ikatu ojeike ko táva kóvape ore rombopoguy hag̃ua ha nde neremanomo’ãi.

25Ha’e ohechauka ichupekuéra mamo rupi ikatu ojeike itávape; ha Jose ñemoñarenguéra ojukapa kyse puku rãimbépe; ha pe kuimba’e pévape katu oheja oho ohosehápe opaite ipehẽnguekuéra ndive.

26Ha pe kuimba’e oho umi Hetgua yvýpe ha omopu’ã ambue táva, ha ombohéra avei Luz; ha péicha héra ko ára kóva peve.

27Ha Manases nomosẽi umi Betseanguápe, ni umi Taanacguápe, ni umi Dorguápe, ni umi Ibleamguápe, ni umi Megidoyguápe, itávagui ni itava’ikuéragui; upéicha umi Canaangua opyta ijyvýpe.

28Ha Israel oñemombareteve ohóvo, oguereko Canaanguakuérape hembiguaikuéra ramo ha nomosẽvéi ichupekuéra.

29Ha Efrainguakuéra nomosẽi avei umi Canaanguápe oikóva Gezérpe, oiko uvei hikuái ojoapytépe.

Ambue Israel ra’ykuéra nomosẽi avei Canaanguakuérape

30Ha Zabulon nomosẽi avei umi Quitron ni umi Naalal oikóvape, oiko uvei Canaanguakuéra apytépe, omomba’apo rei uvei hikuái ichupekuéra.

31Ha Aser nomosẽi avei umi Aco, Sidon, Ahlab, Aczib, Helba, Afec ha Rehob oikóvape.

32Ha Aser oiko umi Canaangua ndive ha nomosẽi avei ichupekuéra.

33Ha Neftali nomosẽi avei umi Bet-semes ha Bet-anat oikóvape, oiko uvei hikuái hendivekuéra; ha ã Canaangua oiko uvei Aser rembiguaikuéra ramo.

34Umi Amorgua ojopy Dan ñemoñarenguérape cérro gotýo ha ndohejái ichupekuéra oguejy ñu gotýo.

35Ha umi Amorgua oñemoha’ãmba oiko hag̃ua Heres cérrope, Ajalon ha Saalbímpe; ha Jose ñemoñarenguéra oñemombarete riréma, oguereko avei ichupekuéra hembiguaikuéra ramo.

36Ha Amorguakuéra retã rembe’y opytákuri Acrabim guive Sela yvateve peve.