1Sarái, Abram rembireko, ndaikatúi imemby; ha Sarái oguereko peteĩ tembiguái kuña, Egiptoygua, hérava Agar.
2Upémaramo Sarái he’i Abrámpe: Rehecháma, Ñanderuete ndoipotaiha che chememby, upévare ajerure ndéve eñeno che rembiguái Agar ndive; ikatu ha’érupi ahupity che membyrã. Ha Abram ojapo hembireko Sarái rembijerure.
3Ha Sarái, Abram rembireko, ogueraha Agar, hembiguái Egiptoygua, iména rendápe ha ome’ẽ ichupe ikuñarã ramo, ha’ekuéra oiko riréma 10 áño Canaan retãme.
4Ha Abram oñeno Agar ndive, ha ha’e hyeguasu; ha ohechakuaáma ramo ha’e hyeguasuha, Agar ojapo’i ijára Saráipe.
5Upéramo Sarái he’i Abrámpe: Pe ñemotĩ che ahasava’aína toupa ndeári; che ame’ẽma ndéve che rembiguái, ha ko’ág̃a ha’e ohechámarõ hyeguasuha, oñembohory cherehe; Ñanderuete tombojovake mávapa ojavy, nde térãpa che.
6Ha Abram he’i Saráipe: Péina ápe, ne rembiguái oĩ nde poguýpe; ejapo ichugui ndéve iporãve háicha. Ha Sarái ombohasa asyetereígui ichupe, Agar okañy ichugui.
7Ha Ñanderuete yvága rembiguái ojohu ichupe desiértope, peteĩ yvu ypýpe, pe yvu opytáva Shur rape ypýpe.
8Ha Ñanderuete yvága rembiguái he’i ichupe: Agar, Sarái rembiguái, mamóguipa reju ha moõpa reho. Ha ha’e he’i: Akañy che jára Saráigui.
9Ha pe yvága rembiguái he’i ichupe: Tereho jevy nde jára rendápe ha eñemomirĩ ipoguýpe.
10Pe yvága rembiguái he’ive ichupe: Ambohetaitereíta ne ñemoñare, hetaitereígui ndaikatumo’ãi ojepapa.
11Ha pe yvága rembiguái he’i avei ichupe: Péina ápe nderyeguasu, nemembýta peteĩ mitãkuimba’e, ha embohéra ichupe Ismael, Ha’e ohendúgui nde jepy’apy.
12Ha’e oikóta ku búrro saitéicha; ha’e oñemoĩta opavave rehe, ha opavave oñemoĩta hese, ha’e oikóta kuarahyresẽ gotýo oñemoĩvo ityvyrakuéra rehe.
13Upéramo Agar ome’ẽ peteĩ téra pyahu pe yvága járape, hendive oñe’ẽva: “Nde, che Ruete, cherecháva”. Ha he’ive: “Ahecha ko’ápe chéve Cherechávape”.
14Upéicha rupi oñembohéra pe ykua: “Pe Oikovéva Cherecháva ykua”, péva opyta Cades ha Bered pa’ũme.
15Ha Agar imemby Abrámgui peteĩ kuimba’e ha Abram ombohéra ita’ýra, Agar membýpe, Ismael.
16Abram oguerekóvo 86 áño, Agar imembyva’ekue Ismael.
Who We AreWhat We EelieveWhat We Do
2025 by iamachristian.org,Inc All rights reserved.
