Abdías 1 - Biblia en Guaraní - ?anderuete ?e’? Por? 2015

Edom ñemotĩ

1Ñanderuete ohechauka Abdíaspe ipayetépe (visiónpe) ko’ã mba’e Edom rehegua: Rohendu peteĩ marandu (notícia) Ñanderuetégui, ha ñe’ẽ rerahahára oñemondo umi tetãme ha péicha he’i: Pepu’ãke ñañorãirõ hag̃ua Edomguakuéra ndive.

2Eikuaa porãke: Che romomichĩta tetãnguéra apytépe, ha nande’apomo’ãi mba’eve ramo.

3Ne ñe’ã oñembotuichaiterei haguére, nde voi reñembotavy, reikógui cerrokuéra pa’ũ rupi, nde reiko py’aguapýpe pende cerrokuéra rupi ha upévare ere nde py’apýpe: Máva piko ikatu chereity yvýre (ha chembopoguy).

4Reveve ramojepe ku ñapykanícha, ha jepevémo mbyjakuéra apytépe rejaitypo ramo, upégui roityva’erã, Ñanderuete he’iuka ndéve.

5Mondaha térã popinda ou ramo ndéve pyharekuépe, nomondaichénepa hikuái umi mba’e oikotevẽngueténte ha oike ramo nde parraltýpe mondahakuéra ndohejaichénepa hembymiva’erãvante.

6Mba’eichaitépa ojeheka ha ojeporeka umi Esau (Edom) mba’erepyeta omonda hag̃ua omoperõ meve hetãme.

7Opaite oñembopy’apeteĩva’ekue nendive nembotavýma, ne retã rembe’y peve nemuñambáta ha nde rayhuhára jepe oñemoĩmbáta nderehe, umi ho’úva ne pan omoĩta ne renondépe iñuhã, ne retãme ndaiporivéima umi iñakã porãva.

8Ajukaukáta umi Edom retãygua iñarandúva ha Esau iñakãguapývape, he’i pende Ruete.

9Ha ne kuimba’ekuéra ipy’aguasuvéva, oikóva nde tavaguasúpe, hérava Teman, okyhyjepáta hikuái, ojejukapa peve umi kuimba’e oikóva guive Edom (Esau) retãme.

10Reñemotĩta ha reñehundietéta repu’ãve’ỹ hag̃ua, reñemoĩ vai haguére nde ryvy Jacóbo rehe.

11Umi ñorãirõhára tetã ambue pegua oikérõ guare Jerusalen rokẽguasu rupi omonda hag̃ua imba’erepy ha oitývo po’a jeporavo Jerusalengua rehe, nde reĩva’ekue avei ijapytépe peteĩ tetã ambueyguávaicha,

12nderevy’aiva’erãmo’ã nde ryvy jehasa asyha árape, nandepy’aroryiva’erãmo’ã Juda ra’ykuéra oñehundívo, nderejererovuiva’erãmo’ã ijepy’apyha árape,

13ndereikeiva’erãmo’ã che retã rokẽ rupi ijepy’apy vaiha árape, nerema’ẽiva’erãmo’ã vy’apópe ijejopy vaiha árape, nandepojairiva’erãmo’ã imba’erepykuéra rehe ijehasa asyha árape,

14nereñembo’yiva’erãmo’ã avei umi tape ojoasaha rupi rejuka hag̃ua umi Israel retãygua okañývape, ha neremoĩriva’erãmo’ã ipoguypekuéra umi hembyva’ekue ijepy’apy vaiha árape.

Ñanderuete ombotuicha jevýta Israélpe

15Hi’ag̃uíma pende Ruete ára ombohasa asy hag̃ua umi tetãme, nde rejapo hagueichaite ojejapóta avei nderehe, ne rembiapo vai oupa jevýta ne retã ári.

16Peẽ Judaygua pe’u haguéicha pe víno che cérro Jerusalénpe, péicha hoy’upáta avei opaite ambue tetãnguéra che váso jehavira rehegua ha omokõmbáta hikuái oñehundipa peve.

17Ha Jerusalen cérrope katu oikóta Israel rembyre, Che aguenohẽta ijehasa asyguasúgui, ha pe yvy pende Ruete omboykeva’ekue hogaguasúpe g̃uarã ojeporu jevýta ha Jacóbo ñemoñare oñemomba’e jevýta ijyvytee rehe.

18Jacóbo ñemoñare tatáicha oikóta, ha Jose ñemoñare tata rendýicha ha Esau ñemoñare ku kapi’i pirúvaicha, ha ojehapýta hikuái ha okaipáta Esau ñemoñarenguéra ha avave nahembymo’ãvéi, umi mba’e katuete ojehúta pende Ruete he’ígui ko’ã mba’e.

19Israel retãygua oñemomba’éta Négev rehe, Esau cérro rehe ha Filisteayguakuéra yvy rehe, ha oñemomba’éta avei hikuái Efrain ha Samária ñunguéra rehe, ha Benjamin oñemomba’éta Galaad ñúre.

20Ha umi Israelgua ohova’ekue jepokuapýpe oñemomba’e jevýta Canaan yvy rehe Sarépta peve, ha umi Jerusalengua oikóva avei jepokuapýpe Sefarádpe oñemomba’éta Négev tavakuéra rehe.

21Upéramo Israel retãygua ohova’erã Jerusalen cérrope ombojovake hag̃ua Edom retãyguakuérape, ha Ñanderuete voi oisãmbyhypáta ichupekuéra hetã ruvichaguasuete ramo.