Malaquías 1 - Biblia en Guaraní - ?anderuete ?e’? Por? 2015

Ñanderuete mborayhu Israel ndive

1Ko’ã ñe’ẽ Ñanderuete ombohasa Israel retãyguakuérape g̃uarã proféta Malaquías rupi:

2Che pohayhu, he’i pende Ruete, ha peẽ peje: Mba’eichaitépa Nde orerayhu. Esau piko ndaha’éira’e Jacóbo ryke’y, he’i pende Ruete. Jacóbope katu ahayhuvékuri,

3ha Esaúre katu ndacha’éi, umi cérro hetã megua amoperõ ha ijyvy amonandi aguaraguasu oiko hag̃ua ipype.

4Ág̃a Edom he’i ramo jepe oñehundíma ore retã, ore katu romopu’ã jevýta umi óga oñembyaipava’ekue. Ñanderuete katu he’i: Ha’ekuéra omopu’ã jevy ramojepe, Che ambyai jevýta. Ha hetã oñembohérata aña retã, ha Ñanderuete pochy hendivekuéra ndoguemo’ãi araka’eve.

5Ha pende resa ohechapáta ha’emava’ekue guive, ha pejéta: Israel Jára ituichaiterei ha ipu’aka ohasa Israel retã rembe’y mboypýri.

Ñanderuete oja’o umi pa’ikuérape

6Pe ta’ýra omomba’e itúvape, ha pe tembiguái ijárape. Ha Che, pende Ruete ramojepe, mba’érehepa peẽ nachemomba’éi: Che ningo pende Ruete ha mba’éichapa peẽ ndapekyhyjéi chehegui. Péicha pende Ruete he’i ipa’ikuérape: Peẽ chemboyke, ha peẽ peje: Moõpa ore romboykéra’e.

7Peikuave’ẽgui che kuave’ẽmby renda ári tembi’u ipotĩ’ỹva ha upeichavéramo peje: Mba’épepa romongy’a ne kuave’ẽmby renda. Pejapo’i haguére pende Ruete kuave’ẽmby renda.

8Ha peikuave’ẽ ramo pene rymba hesatũva, ndaivaíri piko péva. Ha peikuave’ẽ ramo pe ikarẽva térã pe hasýva, ndaivaíri piko. Pegueraha ramo umíva pene mburuvichakuérape oguerohorýnepa ha’e, térã pe’apo porãtapa ichupe, he’i ángel atykuéra Jára.

9Ha ág̃a peñembo’e ramo pende Ruetépe penepytyvõ hag̃ua, Ha’e piko pendeporiahuverekóta gueteri peẽme, pejapo ramo ko’ã mba’evaíva, he’i ángel atykuéra Jára.

10Tamora’e oĩ pende apytégui peteĩ ombotýva che rogaguasu rokẽ anive hag̃ua pemyendy rei che kuave’ẽmby renda rata. Upéicha peẽ nachembovy’ái, he’i ángel atykuéra Jára, upévare ndaipotavéima pene kuave’ẽmby.

11Kuarahyresẽ guive oikeha peve oñemomba’eguasuhína che réra opaite tetãnguéra apytépe, ha oparupiete oñekuave’ẽ che rérape g̃uarã mba’e ryakuã porã ha kuave’ẽmby ipotĩva, mba’eguasúgui che réra tetãnguéra apytépe, he’i ángel atykuéra Jára.

12Ha peẽ pemongy’a che kuave’ẽmby renda pejévo: Ñanderuete mesa oñemongy’a (ikuave’ẽmby renda) ha hembi’u ndahi’amo’ãi, ha ndoguerúi mba’evete oréve g̃uarã.

13Ha pejékuri avei: Ipohýi ningo ko kuave’ẽmby rembiapo. Upéicha piko peẽ ndache’apóiri he’i ángel atykuéra Jára. Peẽ peikuave’ẽ tymba oñemondapyréva, ikarẽva ha hasýva, ko’ã mba’e ko’ãva ajapyhýne piko pende pógui, he’i pende Ruete.

14 Toñemaldeci pe chembotavyséva, peikuave’ẽ rãngue pene rymba mácho hesãiva pende atýgui peje haguéicha, peikuave’ẽ ipotĩ’ỹva ha hasýva. Che katu pe Mburuvichaguasuetevéva, he’i ángel atykuéra Jára, ha opaite tetã okyhyje che réragui.