Provérbios 18 - Biblia en Guaraní - ?anderuete ?e’? Por? 2015

1Umi ha’enteséva ojaposénte hembipota vai ha oñemoĩse oimeraẽva rehe ojokoséva guive ichupe.

2Pe ivýrova ndohekái akãguapy porã oguenohẽsente ipy’apýgui oĩva guive.

3Pe iñañáva og̃uahẽháme oĩ ñembohory, ha pe tembiapo vai oĩ ramo, hendive og̃uahẽ avei pe ñemotĩ.

4Kuimba’e iñe’ẽ porãva ku y hypývaicha, ha iñarandúva katu ku yvu osyrývaicha.

5Naiporãi ñambojerovia hembiapo vaívape, ñambojeroviava’erã katu heko potĩvape.

6Ivýrova rembe ogueru ñeko’õi, ha ijuru ohenói ñembuepoti.

7Pe ivýrova juru ichupe g̃uarã voi jepy’apy, ha hembekuéra peteĩ ñuhã hi’ángape g̃uarã.

8Pe ijurumy’ỹiva ñe’ẽ ha’eténte he’ẽ asýva, ha oike ñane ánga ruguaite peve.

9Pe iñate’ỹva rembiapo ojogua pe tapicha omombo reívape ipirapire.

10Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.

11Pe ipirapire hetáva ojerovia imba’e retáre, ipirapire ichupe g̃uarã ojogua peteĩ táva oñemongora porãvape.

12Pe tapicha py’apy oñembotuichava’erã ha’e ho’a mboyve, ha pe terakuã porã mboyve, pe tapicha py’apy oñemomirĩva’erã.

13Upe ombohováiva, ojapysaka porã mboyve, ningo tapicha výro ha katuete oñemotĩva’erã.

14Pe ipy’aguasu porãva ipu’aka imba’asy rehe, pe ipy’a kangýva katu ndaipu’akái.

15Pe iñakãguapýva ohupity arandu; ha umi iñarandúva oheka akãguapy porã.

16Pe tapicha jopói oipe’a pe okẽ ha pe tape ñag̃uahẽ hag̃ua poguasukuéra rendápe.

17Pe tenondeve oñe’ẽva ijehe ojehecha he’írõ pe añetegua, ou peve pe oñemoĩva hese; ha omombe’upa rire umi mba’e añeteguáva pe tenondegua oñomimava’ekue, upépe ojekuaáta ha’e ijapu hague.

18Pe po’a jeporavo rupi ojekuaáta mávapa ojavy ha máva rupípa oñepyrũ pe ñorãirõ poguasukuéra apytépe.

19Nde rembopochy rei ramo nde ryke’ýpe, ha’e oñemoĩvéta nderehe; ne rembiapo vai ombotýta ipy’apy, pe okẽ ñembotyha omboty háicha peteĩ táva rokẽguasu.

20Oimeraẽva omono’õ jevyva’erã ijuru oñotỹmava’ekue, hyg̃uatã meve.

21Ñemano ha tekove oĩhína pe kũ pu’aka poguýpe, ha upe ojejokóva, ho’uva’erã hi’akuégui.

22Pe ojohúva peteĩ tembireko heko porãva ojohu mba’eporã, ha ohupity Ñanderuete mba’eporãmby.

23Pe imboriahúva oñe’ẽ mba’ejerure asypópe ha pe ipirapire hetáva katu ombohovái juruguasúpe.

24Oĩ angirũ oiko’ỹva angirũ ramo; ha oĩ angirũ oiko porãvéva tyke’ykuéragui.