1Nde, ore Ruete, eme’ẽmína tetã ruvichápe ne mbojovake porã, ha nde justícia tetã ruvicha ra’ýpe.
2 Justícia rupi ha’e toisãmbyhy porãkuaa ne retãme, ha teko potĩme tohechakuaa imboriahúvape.
3Umi cérro guasu togueru py’aguapy ne retãme, ha umi cérro michĩva togueru justícia ichupekuéra.
4Toñembojovake porã umi tetãygua ojepy’apy asývape, toipytyvõ umi imboriahúva ra’ykuérape ha tohundi upe oporojopy asývape.
5Ha’ekuéra tokyhyje ndehegui kuarahy ha jasy ohesape peve, ha yvyariguakuéra oĩva guive (ko yvy apére).
6Toguejy ku hayvi ramoguáicha ñúme, ha amáicha yvy apére omohe’õ porãmbávo.
7Pe heko potĩva py’aguapy taipoty pe jasy nomimbivéi peve.
8Toisãmbyhy ha’e peteĩ yguasu guive ambue yguasu peve, ha ysyry (Éufrates) guive yvy paha peve.
9Toñesũmba henondépe umi ñu perõme oikóva guive, ha umi hese ija’e’ỹva toheréi hikuái yvy timbo.
10Tarsis ha ísla ruvichakuéra togueru joa hikuái ijopói, umi Saba retã ruvicha ha Seba pegua tombyaty hemime’ẽmby henondépe.
11Opaite tetã ruvichakuéra toñesũ henondépe, mayma tetã toiko hembiguái ramo.
12Ha’e oipytyvõtagui pe mboriahuetévape omba’ejerure asy jave, ha oipytyvõta umi oñembyasýva ha oñehundítavape.
13Ha’e oiporiahuverekova’erã imboriahu ha iporiahuetereívape, ha oguenohẽta umívape ijejopy vaígui.
14Ha’e oguenohẽva’erã hi’angakuéra japu ha ñorãirõgui, huguy ningo mba’e hepýva hesa renondépe.
15Toiko porã ha’e, ha toñeme’ẽ ichupe pe óro Saba peguare, ha toñeñembo’e hese tapiaite, ha opaite árape tojehovasa ichupe.
16Ijyvy tahenyhẽ trígo ra’ỹigui ohupity peve cérro ru’ã, ijyvyra hi’áva tahyapu umi yvyra Líbano peguáicha, ha yvyariguakuéra itavakuérape toñembohetave ohóvo ku ñana osẽ reíva kokue peguáicha.
17Héra toiko opaite árape, toñemombe’u héra pe kuarahy oikoha peve. Ha’érupi mayma tetã tojehovasa, ha hendive tovy’aite hikuái.
18Toñemomba’eguasu yvága Jára, Israel Jára, Ha’émante ojapokuaa mba’e techapyrãva (milágro).
19Upévare toñemomba’eguasu héra opaite árape, ha yvy tuichakue tahenyhẽ heko jajaipágui. Taupéicha, taupeichaite.
20Ko’ápe opa David, Isai ra’y, ñembo’ekuéra.
Who We AreWhat We EelieveWhat We Do
2025 by iamachristian.org,Inc All rights reserved.
