Ezequiel 12 - Biblia en Guaraní - ?anderuete ?e’? Por? 2015

Ñanderuete oñemomarandu Judayguakuérape oñemosẽtaha ichupekuéra

1Ou chéve Ñanderuete ñe’ẽ, ha he’i:

2Kuimba’e ra’y, peteĩ tetã oñemoĩva cherehe apytépe nde reiko, ha hesa ramojepe ohecha hag̃ua, ndohechái; ha ijapysa ramojepe ohendu hag̃ua, nohendúi;

3upévare nde, kuimba’e ra’y, embosako’i ne rembiporukuéra reho hag̃ua ambue tetãme, ha esẽ nde rógagui ha tereho arakuépe ambue tetãme hesakuéra renondépe; upéicha oñandúne ha’ekueraha peteĩ tetã oñemoĩva cherehe.

4Arakuépe reguenohẽta ne rembiporukuéra hesakuéra renondépe, ha nde resẽta ka’arukue hesa renondépe, ku ojegueraháva ramoguáicha ambue tetãme.

5Hesakuéra renondépe embokua pe táva tápia ha upérupi esẽ.

6Hesa renondépe regueraháta nde ati’y ári ne rembiporukuéra, iñypytũ jave reguenohẽmbáta; rejaho’íta nde rova, ha nerema’ẽiva’erã ne retãyguakuéra rehe; Che romoĩgui techaukaha ramo Israel retãme g̃uarã.

7Upéi che ajapopa oje’e haguéicha chéve; arakuépe aguenohẽ che rembiporukuéra, ha ka’arukuépe ambokua che po rupi pe táva tápia añembohape hag̃ua; ha asẽ pyharekuépe, aguerahávo umi che rembiporukuéra che ati’y ári hesakuéra renonde rupi.

8Ha pyhareve ou chéve Ñanderuete ñe’ẽ, ha he’i:

9Kuimba’e ra’y, nde’íripa ndéve Israel retãyguakuéra, pe tetã oñemoĩva cherehe: Mba’éiko rejaporeína.

10Ere ichupekuéra: Péicha he’i pende Ruete; ko marandu kóa ningo tetã ruvicha ha opaite Israelguápe g̃uarã.

11Ere ichupekuéra: Che ningo techaukapy peẽme g̃uarã; che ajapo haguéicha, péicha ojejapóta penderehe; pehóta tetã ambuépe hembiguaikuéra ramo.

12Pe tetã ruvicha jepe ogueraháta ijape rehe pyharekuépe hembiporukuéra ha osẽta ombokua rire pe táva tápia; ojaho’íta hova ani hag̃ua ohecha hesa rupi pe yvy.

13Che katu amosarambi che ñuhãnguéra henondépe ho’a hag̃ua ipype ha aguerahaukáta ichupe Babilónia gotýo; ndohechamo’ãi katu hikuái Caldeaygua retã, omanótagui og̃uahẽ mboyve Babilóniape.

14Ha opaite umi oĩva guive ijerekue rehe oipytyvõ hag̃ua ichupe, ha isoldádo atýpe, amosarambipáta irundyve yvytu rehe, ha aguenohẽta che kyse puku hyrúgui hapykuerikuéra.

15Oikuaa hag̃ua Che ha’eha pende Ruete, ág̃a amosẽvo ichupekuéra umi tetã apytégui amosarambi hag̃ua ichupekuéra yvy ape tuichakue rehe.

16Ahejáta hemby mbovymi pe kyse pukúgui, ñembyahýi ha mba’asy iñasãivagui, omombe’ukuaa hag̃ua hikuái hembiapo vaiete ojapova’ekue umi tetã og̃uahẽtavape guive; ha uperirémante oikuaáta Che ha’eha Israel Jaratee.

17Ha Ñanderuete ñe’ẽ ou chéve, ha he’i:

18Kuimba’e ra’y, he’u ne pan kyhyjepópe, ha nde y taryrýi jepy’apypópe.

19Ha ere umi tetãyguápe: Péicha he’i pende Ruete umi Jerusalengua ha Israel retã rehe: Kyhyjepópe ho’úta hikuái ipan, ha ñemondyipópe hoy’úta hikuái, hembiapo vaieta ombyaipágui ijyvykuéra ha heko ñaña ohundígui hi’a porãita.

20Ha umi táva ojeikoha guive oñembotaperepáta, ha pe yvy itaperepáta avei; ha peikuaáta Che ha’eha pe Oikovéva tapia g̃uarã.

21Upérõ Ñanderuete oñe’ẽ jevy chendive ha he’i:

22Kuimba’e ra’y, mba’eichagua ñe’ẽnga piko peiporu Israel retãme, peje ramo: Ohasa ohóvo umi ára ha oguepa rei umi techapáy ha ndojehúi umi proféta he’iva’ekue.

23Upévare, ere ichupekuéra: Péicha he’i pende Ruete: Amboguéta ko ñe’ẽnga kóva, ani hag̃ua oje’eve ko ñe’ẽnga kóva Israel retãme. Ere ichupekuéra: Oñemoag̃uíma umi ára umíva, ha mayma ojehechaukáva payetépe (visiónpe) oikóta katuete.

24Ndaiporimo’ãvéima ojehecháva payetépe ni ta’yvõmby (profecía añágui) Israelgua apytépe.

25Peikuaa porãke, opaite mba’e Che, pende Ruete, ha’étava guive katuete oikóta avei; ha ndahi’aremo’ãvéima. Peẽ tetãygua peñemoĩva cherehe, peikove aja gueteri, Che ajapopáta ha’e hagueichaite, he’i Israel Jaratee.

26Ha ou chéve Ñanderuete ñe’ẽ, ha he’i:

27Kuimba’e ra’y, péina ápe umi Israel rogaygua he’i hikuái: Ko ojehecháva payetépe ndoikomo’ãi ko’ág̃a ha umi mba’e ha’e omomarandúva hasyeterei oiko hag̃ua.

28Upévare ere ichupekuéra: Péicha he’i pende Ruete: Ndahi’aremo’ãvéima oikopa hag̃ua Che ha’emava’ekue guive, opaite ñe’ẽ Che ha’éva guive oikova’erã katuete, he’i pende Ruete.