Números 9 - Biblia en Guaraní - ?anderuete ?e’? Por? 2015

Páscua

arete

1Ñanderuete oñe’ẽ Moiséspe Sinai desiértope, pe áño mokõiháme osẽ haguépe Egípto retãgui, pe jasy peteĩha jave, ha he’i:

2Israel ñemoñarenguéra omboareteva’erã pe páscua hi’araitépe.

3Ko jasy kóva jave, pe ára 14-hápe, ka’aru pytũ guive, pemboareteva’erã, hesegua tembiapo ha tembiapoukapy he’i háicha.

4Ha Moises oñe’ẽ Israel ñemoñarenguérape omboarete hag̃ua pe páscua.

5Péicha omboarete hikuái pe páscua pe jasy peteĩha jave pe ára 14-hápe, ka’arupytũ guive, pe Sinai desiértope, Ñanderuete he’i haguéicha Moiséspe, upeichaite Israel ñemoñarenguéra ojapopa avei.

6Ha Israelgua apytépe oĩmimi opokova’ekue te’õngue rehe, ha oñemongy’a haguére ndaikatúi omboarete pe páscua pe ára pévape; ha ou hikuái Moises ha Aaron rendápe,

7ha he’i hikuái Moises ha Aarónpe: Ore roñemongy’a ropoko haguére te’õngue rehe. Mba’érehe piko ndaikatumo’ãi ore roikuave’ẽ avei kuave’ẽmby Ñanderuetépe, Israel ñemoñarenguéra apytépe hi’araitépe.

8Ha Moises he’i jevy ichupekuéra: Peha’ãrõ, taikuaami mba’épa Ñanderuete he’íta chéve penderehe.

9Ha Ñanderuete oñe’ẽ Moiséspe ha he’i:

10Eñe’ẽ Israel ñemoñarenguérape ha ere ichupekuéra: Oimeraẽva pende reheguáva térã pene ñemoñarenguéra oñemongy’áma, opoko haguére te’õngue rehe, térã oho mombyryvégui, omboareteva’erã avei pe páscua pende Ruetépe,

11pe jasy mokõiháme pe ára 14-hápe, pe ka’aru pytũ guive; omboareteva’erã hikuái ho’úrõ ka’avo iróva ha pan ojejapova’ekue levadura’ỹre.

12Pe tymba ojejukávagui noñemohembyiva’erã ichugui ko’ẽ ramog̃uarã, ha ndojejokaiva’erã ikangue; opaite mba’e ojejapova’erãva páscua árape oñemboarete hag̃ua, upéicha ojapova’erã hikuái avei.

13Ha pe tapicha ipotĩva ha ndohoiva’ekue mombyry, ha nomboareteiva’ekue pe páscua, upe tapicha ojejukava’erã hetãyguakuéra apytégui; noikuave’ẽigui hi’árape pende Ruete kuave’ẽmby, upe kuimba’e upéva oguerahava’erã hi’angaipa ijehe voi.

14Ha tetã ambueygua oiko ramo pende apytépe ha omboaretese ramo pende Ruete páscua, tomboarete avei pe páscua ojapopávo hekoitépe hembiapoukapy ha hembiapo; peteĩ tembiapoukapy oĩva’erã, pe tetã ambueygua ha Israelguápe g̃uarã.

Pe arai óga jojohuha ári.

15Pe óga jojohuha oñemopu’ãha ára guive peteĩ arai opyta hi’ári, oĩháme avei umi 10 tembiapoukapy; ha ka’arupytũ guive ambue pyhareve peve pe arai ojogua tata hendývape.

16Péicha ojehu opaite árape: Pe arai omo’ã arakuépe pe óga jojohuhápe ha pyharekuépe peteĩ tata hendývape.

17Pe arai ojei ramo pe óga jojohuha árigui, umi Israel ñemoñarenguéra oipykúi; ha pe arai opyta ramo, Israel ñemoñarenguéra opytava’erã avei.

18Ñanderuete he’i ramo Israel ñemoñarenguéra oho hag̃ua, oipykuipava’erã hikuái, ha Ha’e he’i ramo opyta hag̃ua ha’ekuéra opytapa avei; pe arai opyta aja pukukue pe óga jojohuha ári, Israelguakuéra opytapa avei.

19Pe arai opyta ramo heta ára pukukue pe óga jojohuha ári, Israel ñemoñarenguéra opytapa avei hekohápe ojapógui Ñanderuete rembipota.

20Ha sapy’a mbovy árante pe arai opyta ramo pe óga jojohuha ári, péicha mbovy árante Israelguakuéra opyta avei, Ñanderuete oipota háicha ha ohechauka háicha hembipota pe arai rupi upeichaite Israelguakuéra iñe’ẽrendu avei.

21Ha pe arai opyta ramo ka’aru guive pyhareve pevénte, oipykúi hikuái pe pyhareve; pe arai opu’ã ramo ára pukukuépe térã pyharekuépe, pya’e ha’ekuéra oñembosako’i oipykúi hag̃ua avei hapekuérare.

22Térã opyta ramo mokõi ára pukukue, térã peteĩ jasy peve, térã heta jasy peve, pe arai opyta aja pukukue pe óga jojohuha ári, umi Israel ñemoñarenguéra opyta avei, noñemongu’éi hikuái; ha pe arai opu’ã jevy ramo, oipykúi hikuái avei.

23Pende Ruete he’i ramo oho hag̃ua, oipykúi hikuái, ha pende Ruete he’írõ opyta hag̃ua, opyta hikuái, pende Ruete he’i háicha ichupekuéra Moises rupi, peichaite ojapopa hikuái.