Números 24 - Biblia en Guaraní - ?anderuete ?e’? Por? 2015

1Ha Balaam ohecha ramo ombohoryha Ñanderuetépe ha’e ohovasárõ Israélpe, ndohovéi tenondeve oho haguéicha jepi, ojejohu hag̃ua Ñanderuete ndive, omoĩntema hova desiérto gotýo;

2ha ojesaupívo ohecha Israélpe oñembyaty mbyatýva itribukuéra rupi ha Ñanderuete Pytu Porãĩteva ou hi’ári.

3Upémaramo iñe’ẽ ñembojoja rupi he’i: Balaam, Beor ra’y, pe kuimba’e hesa ojepe’a porãva,

4pe ohendúva Ñanderuete ñe’ẽ, pe ohecháva Ñanderuete omboúva ipáype, iképe ramoguáicha; pe ho’áva, hesa ojepe’a porã hag̃ua,

5iporãite ningo nde róga pirekueguiguáva, Jacóbo, ha nde rekoha, Israel,

6ku yakãicha iñasãimba, ku ñemitỹ ysyry rembe’y peguáicha okakuaa, ku aloe yvyráicha Ñanderuete oñotỹva’ekue, ku cédro oĩva yeta rembe’ýpe.

7Ikambuchi rembe’ýgui oñehẽta yeta, ikokuépe oky porãta, hetã ruvichaguasu ituichavéta Agággui, ha hetã oñemopu’ã ohóvo.

8Ñanderuete oguenohẽ ichupe Egíptogui; Ha’e imbarete tóro hesaitéicha, Ha’e omokõva’erã tetãnguéra oñemoĩvape hese, Ha’e omongu’ipava’erã ikanguekuéra, Ha’e ohundiva’erã ihu’ykuérape.

9Israel oñeno ku leõicha, opytu’u ku leõ kuñáicha, mávapa ikatu omombáy ichupe. Tojehovasa umi ohovasáva ichupe, ha toñemaldeci umi omaldecíva ichupe.

Balaam oprofetiza

10Upévo Balac ipochyeterei Balaam ndive ha ojepopetévo he’i ichupe: Remaldeci hag̃ua cherehe ija’e’ỹvape rohenóikuri, ha péina rehovasáma ichupekuéra mbohapy jevy.

11Ko’ág̃a terehóke ne retãme; che ha’ékuri romboetetaha, Jahve katu ndoipotái.

12Ha Balaam he’i jevy ichupe: Namyesakãipa avei umi ne ñe’ẽrerahahárape remondova’ekue che rendápe, ha’évo ichupekuéra:

13Balac ome’ẽta ramojepe chéve hóga renyhẽ pláta térã óro che ndaikatumo’ãi amboyke Ñanderuete rembipota, ndaikatúi ambohasa chejehegui rei iporãva térã ivaíva, pe ñe’ẽ Ñanderuete he’ívamante ha’eva’erã avei.

14Péina ápe che aháta che retãme; eju ko’ág̃a ha ta’e ndéve mba’épa ko’ã tetãygua ojapóta ne retãygua rehe umi ára ouvahínape.

15Ha iñe’ẽ ñembojoja rupi he’i: Che Balaam, Beor ra’y, pe kuimba’e hesa ojepe’a porãva;

16pe he’íva pe ñe’ẽ ohenduva’ekue Ñanderuete jurúgui, pe oikuaáva pe Ijyvatéva jepy’amongeta (pensamiénto), pe ohecháva Heko Ikatupáva techapáy; pe ho’áva, ojepe’a hag̃ua hesa.

17Ahecha ichupe ndaha’éi ko’ág̃a; ama’ẽ hese, ndaha’éi ag̃ui guive; mbyja osẽva’erã Jacóbogui, ha opu’ãta Israélgui tetã ruvichaguasu yvyra po’i, ombokua hag̃ua Moab syva yke, ha ojokava’erã umi oñorãirõséva akã.

18Edom ho’ava’erã ipópe, Seir ho’ava’erã avei hese ija’e’ỹva pópe, Israel ombopoguypáta ichupekuéra.

19Jacóbogui osẽta umi ombopoguýtava ha ohundítava umi táva hembýva.

20Ha Balaam ohechávo Amalecguakuérape, ojapyhy iñe’ẽ ñembojoja ha he’i: Amalec oñepyrũ oñemoĩ hag̃ua Israel rehe; ha ipahápe oñehundipáta opa peve.

21Ha ohechávo Cenguakuérape, iñe’ẽ ñembojoja rupi he’i: Imbarete nde róga, remoĩ itaguasu pa’ũme nde raity;

22Asíriaygua ojeitýta Cenguakuéra ári ha ogueraháta iñemoñarenguéra pokuapyhápe hetãme.

23Iñe’ẽ ñembojoja rupi he’ive: Mávapa oikovéne, ág̃a Ñanderuete ojapo ramo ko’ã mba’e.

24Ouva’erã barcoguasu Quitim y rembe’ýgui ha ombopoguýta Asíria ha Hebérpe, ipahápe katu Quitimgua oñehundietéta avei.

25Upévo Balaam opu’ã ha oho jevy hetãme; ha Balac oho avei hape rehe.