1Ñanderuete he’i: Peguata Jerusalen táva cálle rehe, pema’ẽ porã opa rupi; peheka ipláza rupi pejohu hag̃ua peteĩ kuimba’e jepe oñeha’ãmbáva oiko hag̃ua hekoitépe ha ohekáva pe añetegua, upéicha ramo aperdonáta Jerusalen rembiapo vaikue.
2Ha’ekuéra ome’ẽ ramojepe iñe’ẽ pende Ruete oikovéva rérape, ome’ẽ gua’uete oporombotavy hag̃uánte.
3Ñanderuete resa piko noma’ẽi umi he’íva rehe pe añetegua. Nde reinupã ramojepe ichupekuéra noñandúi, rehundi ramojepe ichupekuéra ndoikoséi tape porã rehe, oñembohova’atãve uvei hikuái itágui, nomoambueséi voínte hekokuéra.
4Upévare Che ha’e: Añetehápe ikangy ha itavypa hikuái, ndoikuaáigui Ijára rape ni heko porã.
5Aháta umi karaiguasu rendápe, ha añe’ẽta hendivekuéra; ha’ekuéra katuete oikuaa Ñanderuete rape ha Ijára ñe’ẽ. Ha’ekuéra katu omopẽ avei icangálla ha omondohopa isãnguéra.
6Upévare, pe leõ ka’aguýpe oikóva, ojukáta ichupekuéra; pe aguaraguasu desiértope oikóva sarambi ojapóta ijapytépe ha pe jaguarete hũ ojere jere itavakuéra rehe omondyryry hag̃ua oimeraẽ osẽva guivépe itavapýgui. Ko’ã mba’e oikóta hembiapo vaieta rupi, oñemoĩ haguére Ituvatee rehe.
7Mba’éicha piko roperdonáta. Nde ra’ykuéra cherejapáma, ha ome’ẽma iñe’ẽ ijára gua’úpe. Amohyg̃uatã porã ramojepe ichupekuéra, ha’ekuéra katu chembotavy ha oñembyaty hikuái kuña reko vai rógape.
8Ku cojúdo hakúicha, itarova hikuái hapicha rembireko rehe.
9Aheja reínepa ko’ã mba’evaiete, he’i pende Ruete, térãpa ndahechaukaichénepa che pochy koichagua tetãme g̃uarã.
10Pejupi iparralty oĩháme ha pembyai, ág̃a anítei pembyaipa; peikytĩ hakãnguéra, ndaha’evéimagui pende Ruete mba’e.
11Israel ha Judayguakuéra oñemoĩ cherehe, he’i pende Ruete.
12Opoi hikuái Ñanderuetégui, ha he’i hikuái: Ñanderuete ndaha’evéima mba’eve ñandéve g̃uarã, ha mba’eveichagua jehasa asy ndoumo’ãi ñande ári, ndajahechamo’ãi kyse puku ni ñembyahýi;
13 iproféta oiko ku yvytu reícha, Ñanderuete ñe’ẽ ndaipóri ipype; to’a hi’ári umi mba’evai omosarambíva.
14Ñanderuete, Yvága Atykuéra Jára katu, he’i: Ha’ekuéra he’i haguére ko’ã mba’e, péina ápe Che amoĩta che ñe’ẽ nde jurúpe tatáicha, ko tetã kóvape amoĩta jepe’a ramo, ha ahapypáta ichupekuéra.
15Ema’ẽ porãke, nde Israel, Che aguerúta ndeári tetã mombyrygua, he’i pende Ruete; peteĩ tetã yma guivéma oikómava ha iñe’ẽ ndereikuaái upévagui ndereikuaamo’ãi mba’épa he’ise ndéve oñe’ẽ jave ramo ndéve.
16Ihu’y ryrukuéra ojogua sepultúra (tyvy) ojepe’apyréva, ipy’aguasu meme hikuái.
17Ha’ekuéra ho’úta ne remitỹngue ha ne pan, ojukáta nde ra’y ha nde rajykuérape; ho’úta ne rymba ovecha ha vakakuéra, nde parral’a ha nde higo’a, ha’ekuéra ohundíta umi táva oñemombaretepyréva ikyse puku rupi, umívare ningo nde rejeroviáva.
18Upeichavéramo jepe, umi ára umívape napohundipamo’ãi, he’i pende Ruete.
19Ág̃a he’i ramo hikuái: Mba’érehe piko Ñanderuete ojapo orerehe ko’ã mba’e, upéramo eréta ichupekuéra: Peẽ pepoi haguére ichugui, pene retã oiko hag̃ua ambue jára mombyrygua rembiguái ramo, upévare Che avei apoíta pendehegui peiko hag̃ua tembiguái ramo ambue tetã mombyrygua poguýpe.
20Pemoherakuã ko’ã mba’e Jacóbo rógape, ha pemombe’u avei Judápe, ha peje:
21Pehendúke ko’ã mba’e, tetã itavy ha iñakã porã’ỹva, hesa mokõi ramojepe ndohechái, ijapysa mokõi ramojepe nohendúi.
22Ndapekyhyjemo’ãi piko chehegui, he’i pende Ruete, ndaperyryimo’ãi piko che renondépe, amoĩma yvyku’i yguasu rembe’ýpe, hi’y ani hag̃ua ohasa upeguive, oñemopu’ã yvate ha okororõ vai ramojepe ndaikatúi ohasa upégui.
23Ko tetã kóva katu oñembotuicha ha oñemoĩ cherehe, oñemboyke chehegui ha oho ohosehápe.
24Ha nde’íri hikuái ipy’apýpe jepe: Jakyhyje ko’ág̃a Ñanderuete, Ñandejarateégui, omboúva hi’araitépe ama tenondegua ha ipaha peguáva, ha ombosako’íva hi’araitépe pe ñemitỹ ñemono’õha ára.
25Pene rembiapo vai ojoko joko ko’ã mba’e, ha pene angaipa rupi ndapehupitýi ko’ã mba’eporã.
26Che retãyguakuéra apytépe ojejohu iñaña rekóva, omaña ñemi ñemíva oity hag̃ua iñuhãme hapicha heko potĩvape, ku guyra ñuhã jára ojapo háicha.
27Ku ajakaguasu henyhẽrõ guáicha guyraitágui, péicha hogakuéra henyhẽ mba’e mondapyrégui ha upéicha oiko ichuguikuéra karai tuicha ha ipoguasúva.
28Okaru imondapyre rupi porãgui ikyraite ohóvo, ha hembiapo vaikue hetaitereirasa; nombojovakéi hekoitépe ityre’ỹvape ha nome’ẽi imboriahúvape imba’eteéva.
29Ndahaviramo’ãi piko koichagua mba’evai, he’i pende Ruete; ha namyengoviamo’ãi piko peichagua tapicha rembiapo vaikue.
30Tembiapo ivaietéva ha ñanemondýiva ojehuhína ko tetãme.
31 Iprofetakuéra ijapupa ha ipa’ikuéra omboguata hapichakuérape oipota háichante, ha pévante ombovy’a che retãyguakuérape. Ha mba’éiko pejapóta og̃uahẽ vove pe jejopy vai Che ha’emava’ekue peẽme.
Who We AreWhat We EelieveWhat We Do
2025 by iamachristian.org,Inc All rights reserved.
