1 Pédro 3 - Biblia en Guaraní - ?anderuete ?e’? Por? 2015

Mba’éichapa umi omendáva oikova’erã oñondive

1Upéicha avei peẽ tembirekokuéra peñemoĩ pene menakuéra poguýpe, oimérõ iména ndojeroviáiva Hesu Crísto rehe, ha’e ojevy hag̃ua avei Ñanderuete rendápe hembireko reko ha hembiapo porã rupi, ha’e nomombe’úi ramojepe ichupe,

2iména oma’ẽ ha ohechakuaa hembireko oguataha teko potĩme kyhyjepópe Ñanderuete rape rehe.

3Ani pembojegua pende rete ape, pende áva ñeñopẽguasu rupi, jeguaka oroguiguáva térã ao hepyetéva rupi.

4Pembojegua uvei pende py’apy mba’e oñembyai’ỹva ha ojehecha’ỹva reheve, péva ningo Pytu Porãmbáva rembiapo, Ha’e omomirĩva ha ombopy’aguapýva tetãyguakuérape, ha koichagua teko ombohory Ñanderuetépe.

5Upéicha avei umi tembireko heko potĩva ymaguare ojeguámiva, ojeroviágui Ñanderuete rehe, oñemoĩ iména poguýpe.

6Péicha Sára iñe’ẽrendu iména Abrahámpe ha ohenóimi ichupe: Che jára. Ha peẽ ningo Sára membykuñateéva pejapórõ tembiapo iporãva ha pembopoguýrõ umi jepy’ara’ã katuete oúva.

7Peẽ ména, peiko hekópe pene rembireko ndive pehechakuaávo ha’ekuéra ikangyveha pendehegui, upévare pe’apo ichupekuéra mba’e ramo, peikuaa porã ha’ekuéra ohupitytaha avei pe tekove tapia g̃uarãva, ani hag̃ua pene ñembo’e opyta rei (opa rei).

Py’apyñe’ẽ porã

8Ipahápe tapenõmbopy’apeteĩ, pejohayhu hermanokuéra ramo, pejoporiahuvereko, peñemomirĩ.

9Ani pemyengovia ivaíva, ivaíva rehe, térã ñe’ẽvai, ñe’ẽvai rehe, pehovasa uvei, upevarã peñehenóikuri, ha upéichamante Ñanderuete ikatu penderovasa avei.

10Ñanderuete kuatiañe’ẽme he’i voi: Upe ohayhúva hekove ha oikoséva py’aguapýpe tojoko ijuru mba’evaígui ha japúgui, (Salmokuéra 34,13-17).

11Toñemboyke mba’evaígui, ha tojapo mba’eporã, toheka py’aguapy ha toho hapykuéri.

12Ñanderuete resa oma’ẽ heko potĩva rehe ha ojapysaka porã iñembo’ekuéra rehe; Ñanderuete katu oñemoĩ umi mba’evai apohára rehe.

13Ha máva piko ikatu ojapo mba’evai penderehe, peẽ peñeha’ãmba ramo pejapo hag̃ua mba’eporã.

14Peẽ pehasa asy ramo pende jerovia rehehápe, Ñanderuete penderovasáta. Ani pekyhyje, ha’ekuéra pendejopyete ramo, ani pene’angekõitei.

15Pemomba’eguasu uvei Ñanderuetépe pende py’apýpe, ha peñembosako’ipeína pembohovái hag̃ua opaite oporandúva peẽme pe jerovia perekóva rehe pende py’apýpe.

16Pembohovái katu py’aguapýpe ha ñemomirĩ reheve ani hag̃ua pemongy’a pende py’apyñe’ẽ (conciéncia), ha otĩ hag̃ua umi oñe’ẽvai reíva penderehe, ohechakuaa porãvo pene rembiapo iporãha, Hesu Crísto pu’aka rupi.

17Iporãve pehasa asy Ñanderuete oipota ramo, pejapo haguére mba’eporã, pejapo rãngue mba’evai.

18Hesu Crísto ohasa asyeteva’ekue peteĩ jevy (ñane) angaipa rehehápe, pe Heko porãitéva ñane angaipavóra rehehápe, ñandegueraha hag̃ua Ñanderuete rendápe; añetehápe ho’o omano, Ipytu Porã katu oñemoingove jevy.

19Ipytu Porãme Hesu Crísto oho avei omyasãi hag̃ua salvacion rape umi omanova’ekue pytukuéra ha oĩvahína cárcelpe (aña retãme).

20Umía naiñe’ẽrenduiva’ekue, Noe oavisa porã ramojepe ichupekuéra Ñanderuete paciéncia opataha ha’e ojapopa rire pe barcoguasu. Ipype mbovymi ojesalva pe ýgui, 4 kuimba’e ha 4 kuña.

21Upe y upéva ko’ág̃a ku ta’ãngáicha ñandesalva bautísmo rupi. Pe bautísmo voi ndaikatúi ñanemopotĩ ñande rete rembiapo vaígui, upévare jajerureva’erã Ñanderuetépe tome’ẽ ñandéve pe py’apyñe’ẽ porãva Hesu Crísto ñemano rupi.

22Ko’ág̃a Hesu Crísto oguapy yvágape Ñanderuete yke akatúape, Ha’e ombopoguy rire umi yvága rembiguái vaípe, huvichakuérape ha umi pu’aka oñemoĩmava’ekue hese.