Job 37 - Biblia en Guaraní - ?anderuete ?e’? Por? 2015

1Umi mba’e rupi che py’a oñemondýi ha oryryipa che pyti’ápe.

2Pehendu porã pe arasunu ryapu osẽva ijurúgui.

3Pe aratiri oñemyasãi opaite yvy apére ha oho yvy paha peve.

4Ha péva rire okororõ pe arasunu, Ha’e osunu ñe’ẽ hatã reheve, ha avave ndojokomo’ãi umía.

5Ñanderuete oñe’ẽ ára sunu hatã rupi, Ha’e ojapo tuichaite mba’e, ñande ikatu’ỹva jaikuaa.

6Ama rayvi rypy’a ku’ípe (niévepe) he’i: Eguejy yvy apére ha upéicha avei amaguasu sapy’aite peguápe (aguacérope).

7Upeichaite oisãmbyhy avei mayma yvyariguakuérape, opavave ohechakuaa hag̃ua hembiapokue.

8Umi mymba saite oike ikuápe, ha upépe opyta kañyháme.

9Israel retãme, yvýguio ou yvytu jepoka ha yvatéguio ou pe ro’y.

10Ñanderuete oipeju ramo oiko ro’y rypy’a (heláda), ha umi y oñemohatãmba.

11Ha’e omyenyhẽ araikuéra ýgui ha arai atýgui osẽ aratiri.

12Ha’e omondo araikuéra oipotahápe, ágotyo pégotyo, yvy apére, ojapo hag̃ua Ha’e he’íva guive.

13Umía Ha’e sapy’a ombou yvy apére jehavira ramo térã jehovasa ramo.

14Job, ejapysaka porãke ko’ã mba’e rehe: Epyta kirirĩháme ha ehechakuaa Ñanderuete rembiapo techapyrãva.

15Reikuaa piko mba’éichapa Ñanderuete omoĩ porãmba umi mba’e, ha mba’éichapa Ha’e omoingo pe aratiri.

16Reikuaa piko mba’éichapa Ha’e omongu’e araikuéra, umi mba’e ohechauka Ñanderuete iñarandueteha.

17Mba’eicharupípa nde ndery’ái nde aópe Ha’e oipeju jave pe yvytu yvyguioguáva (Israel retãme).

18Remyasãi piko hendive pe ára, oñemoambue’ỹre ku espéjo bronceguiguávaicha.

19Ehechaukána oréve mba’épa ro’e’arã Ñanderuetépe, oretavyetégui ndaikatúi ro’e mba’eve ichupe roĩgui pytũ guýpe.

20Che ha’eukáne ichupe añe’ẽseha. Ojejohúnepa ko yvy apére peteĩ kuimba’e he’íva ijehegui Ñanderuetépe ohundi hag̃ua ichupe.

21Ha’ekuéra ndaikatúi oma’ẽ kuarahy resape rehe, pe yvytu omopotĩ porã rire pe ára opaite arai hũvagui.

22Israel retã yvatégui sapy’a ou aravera pytãva, Ñanderuete jerekuévo katu tapia oĩ heko jajaipáva.

23Ñanderuete pu’aka ituichaitereígui avave ndohupitykuaái ipu’aka, avave ndaikatúi ojopy ichupe, Ha’e ombojovake hag̃ua hekope’ỹ.

24Upévarehe tetãyguakuéra okyhyjeva’erã ichugui, Ha’e noma’ẽigui umi oñembotuicháva rehe.