2 Corintoyguakuérape 5 - Biblia en Guaraní - ?anderuete ?e’? Por? 2015

1Jaikuaa porã ningo ñande róga yvy arigua (tete) ndahi’areiha, oñembyai rire, Ñanderuete voi ome’ẽva’erã ñandéve peteĩ tete pyahu hekohápe, ojejapo’ỹva kuimba’e po rupi.

2Ko ñande róga (tete) ko’ag̃aguápe ñanepyahẽ gueteri, jaikeségui ñande róga yvága peguápe ku peteĩ kuimba’e térã kuña oñemondese ramoguáicha ijao ipyahúvape.

3Upévare ñamboi ramojepe ñande ao ko’ag̃aguágui (ñande rekove ko’ag̃aguágui), ndajapytamo’ãi opívo.

4Ñande jaikove aja ñande róga (tete) yvy arigua ko’ag̃aguápe, ñanepyahẽ gueteri, ndaha’éi ñañemboiségui, ñañemondese jo’águi uvei; pe tekove añeteguáva tomokõ pe omanótavape.

5Ñanderuete voi ombosako’ipágui ko’ã mba’e ko’ãva ñane renonderãme, ha ome’ẽmava’ekue ñandéve pe Pytu Porãmbáva omoñepyrũ hag̃ua hembiapo ñandepype.

6Upévare ñañemokyre’ỹ ñande jeroviápe, jaikuaágui ñande jaiko aja ko ñande rete kóvape, ñaime mombyry gueteri ñande rogarãgui (reterãgui) oñeme’ẽma katu ñandéve pe Pytu Porãmbáva adelánto ramo ñemohenondeuka ramo.

7Jaiko jajeroviágui, ndaha’éi ñande jahecháva rehe.

8Upévare ja’ekuaa avei japoi ñande rete ko’ag̃aguágui jaikove hag̃ua Ñandejára Hesu Crísto ndive yvágape.

9Upévare ñañeha’ã ñambohory hag̃ua Ñanderuetépe, ñaime ramo ñande retépe térã ñaime’ỹ ramo.

10Opavave ñande jajehechaukava’erã Hesu Crísto ñembojovakehápe, oñeme’ẽ hag̃ua ñandéve ñane rembiapokue repy, ta’iporã térã ta’ivai jepe ra’e.

Ñanderuete ome’ẽ pe tekove pyahu

11Roikuaágui Ñanderuete kyhyje, roñeha’ã rojegueroviauka hag̃ua ñande rapichakuérape, Ha’e katu oikuaa porãmba oĩva guive ore py’apýpe. Ore katu roha’ãrõ rojehechauka porã avei pende py’apyñe’ẽme (conciénciape).

12Ore noroñe’ẽ porãséi, roñemoĩ porã jevy hag̃ua pene renondépe, ore romombe’upa uvei ko’ã mba’e ko’ãva peẽme pembohovái hag̃ua avei umi oñemoĩ reisévape orerehe, ha’ekuéra ojererovu reígui, ndoguerekói ramojepe mba’eve iporãva ipy’apýpe, oñembotuichasénte umi mba’e ojehechávare ha iñe’ẽ rei rupínte.

13Ore romboyke ramo ore rete (visiónpe), péva ojehu Ñanderuete rupi, ha ore akã porã ramo, péva ojehu peẽme g̃uarã,

14Hesu Crísto mborayhu oregueraha roiko porã hag̃ua, roikuaágui Ha’e omano hague opaite hembiapo vaíva rehehápe, ha péicha ramo opavave (ojeroviáva guive Hesu Crísto rehe) omanóma avei hendive.

15Hesu Crísto omano opavavéva rehehápe, opavave Ha’e omoingove jevýta oiko hag̃ua Hesu Crístope g̃uarã, ha anive hag̃ua oiko hete rembipota vai poguýpe.

16Upévare ko ára kóva rire ore ndoroikuaavéima avavépe hete ro’o (heko tuja) rupi, roikuaava’ekue ramojepe avei Hesu Crístope oikove aja hete ro’ópe, ko’ág̃a katu ndaupeichavéima.

17Upévare upe oikóva Hesu Cristopype oñemoingo pyahúma, oñemboheko ambuéma (nacimiénto pyahu), pe teko tuja opáma (pe teko tuja nomandavéima hekovépe). Peikuaa porãke, pe teko pyahu oñepyrũma hague.

18Opaite ko’ã mba’e ningo, Ñanderuete rembiapo voi, Ha’émante orembopy’apeteĩ jevy hendive Hesu Crísto rupi, ha Ha’e oipota ore roiko porã opavave ndive.

19Ñanderuete oĩgui Hesu Cristopype, ombopy’apeteĩ jevy hag̃ua tetãyguakuérape hendive, upévare Ha’e operdona ñane rembiapo vai ha omoĩ ñande pópe ko perdon rehegua ñe’ẽ.

20Upéicha ore romombe’u ko perdon ñe’ẽ Hesu Crísto rendaguépe ha Ha’e oavisa tetãyguakuérape: Peheja Hesu Crísto tapenemoingo porã jevy Ñanderuete ndive.

21Ñanderuete ñanderayhúgui omoĩ Hesu Crísto ári ñane angaipa, jahupity hag̃ua Hesu Crísto rupi pe teko ipotĩva ha ovaléva Ñanderuete renondépe.