1 Crónicas 27 - Biblia en Guaraní - ?anderuete ?e’? Por? 2015

Ambue David mburuvichakuéra

1Israel ñemoñarenguéra apytépe oĩ umi Israel rogaguasu ruvicha, umi soldádo ruvicha 1.000 ha 100 árigua, umi mburuvicha ojapóva tetã ruvicha ñemuha reheguáva, umi aty aty oike ha osẽva akói jasýpe peteĩ áño pukukue javeve, ha cáda aty oguereko 24.000 kuimba’e.

2Pe aty peteĩha ruvicha Jasobem, Zabdiel ra’y; ha’e oisãmbyhy pe jasy peteĩháme ha ijatýpe oĩ 24.000 kuimba’e.

3Josobem, peteĩ Peres ñemoñare, omoakã opaite ambue soldádo ruvicha’ikuérape pe jasy peteĩháme.

4Pe aty mokõiha ruvicha Eleazar, Dodai ra’y, peteĩ Ahohgua; ha Miclot oipytyvõ ichupe, ha ijatýpe oĩ avei 24.000 kuimba’e.

5Benaía, pe pa’iguasu Joiada ra’y, omoakã pe aty mbohapyhápe pe jasy mbohapyhápe, ha ijatýpe oĩ avei 24.000 kuimba’e.

6Ko Benaía, peteĩ umi 30 ipy’aguasúva apytépe. Ha’e omoakã avei umi 30-pe; ita’ýra Amizabad oipytyvõ ichupe oisãmbyhy hag̃ua.

7Pe mburuvicha irundyha, pe jasy irundyhápe oĩ Asael, Joab ryvy, ha ha’e rire ita’ýra Zebadías; ha ijatýpe oĩ avei 24.000 kuimba’e.

8Pe mburuvicha 5-ha, jasy 5-hápe, oĩ Samhut, Izraygua, ha ijatýpe oĩ 24.000 kuimba’e.

9Pe 6-ha, jasy 6-hápe, oĩ Ira, Iques ra’y, peteĩ Tecoaygua, ha ijatýpe oĩ 24.000 kuimba’e.

10Pe 7-ha, jasy 7-hápe, oĩ Heles, peteĩ Pelongua, peteĩ Efrain ñemoñaréva, ha ijatýpe oĩ 24.000 kuimba’e.

11Pe 8-ha, jasy 8-hápe, oĩ Sibecai, peteĩ Husatgua, oúva Zerayguakuéragui, ha ijatýpe oĩ 24.000 kuimba’e.

12Pe 9-ha, jasy 9-hápe oĩ Abiézer, peteĩ Anatotgua, Benjamin tríbugui, ha ijatýpe oĩ 24.000 kuimba’e.

13Pe 10-ha, jasy 10-hápe, oĩ Maharai, peteĩ Netofatgua, oúva Zerayguakuéragui, ha ijatýpe oĩ 24.000 kuimba’e.

14Pe 11-ha, jasy 11-hápe, oĩ Benaía, peteĩ Piratongua, Efrain tríbugui, ha ijatýpe oĩ 24.000 kuimba’e.

15Pe 12-ha, pe jasy 12-hápe, oĩ Heldai, peteĩ Netofatgua, Otoniel reheguáva, ha ijatýpe oĩ 24.000 kuimba’e.

16Upéicha oĩ avei Israel tríbu ruvichakuéra, ko’ãva ha’e: Rubenguakuéra ruvicha Eliezer, Zicri ra’y; Simeonguakuéra ruvicha, Sefatías, Maaca ra’y.

17Leviguakuéra ruvicha, Hasabías, Kemuel ra’y; Aaron reheguakuéragui opyta Sadoc.

18Judayguakuéra ruvicha, Eliu, peteĩ David ryke’y; Isacar reheguakuéra ruvicha, Omri, Miguel ra’y.

19Zabulon reheguakuéra ruvicha, Ismaías, Abdías ra’y; Neftali ruvicha, Jerimot, Azriel ra’y.

20Efrain ñemoñarenguérape g̃uarã, Oséas, Azazías ra’y; Manases tríbu mbyterépe g̃uarã, Joel, Pedaías ra’y.

21Ambue Manases tríbu mbyterépe g̃uarã, Galaad yvýpe, Iddo, Zacarías ra’y; Benjamin reheguakuéra ruvicha, Jaasiel, Abner ra’y.

22Ha Dan ruvicha, Azareel, Jeroham ra’y. Ko’ãva Israel tríbu ruvichakuéra.

23Ha David ndoipapaukái umi nombotýiva gueteri 20 áño, Ñanderuete he’ígui Israel omoñemoñataha mbyjakuéra árare oĩva heta háicha.

24Joab, Sarvia memby, oñepyrũma oipapa; ndoipapapái katu, oúgui Israélpe pe jehaviraguasu, ha upévagui ndohaíri opaite tetã ruvicha rembiapokuéra kuatiañe’ẽme.

25Azmávet, Adiel ra’y, oñangareko tetã ruvicha mba’erepyeta rehe; ha Jonatan, Uzías ra’y poguýpe oĩmba umi mba’erepyeta oĩva ñunguéra, tavakuéra, tava’ikuéra ha tetã rembe’y rupi.

26Ha Ezri, Quelub ra’y, opyta kokue mba’apohára ruvicha ramo.

27Parraltykuéra rehe oñangareko Simei, peteĩ Ramatgua; ha parral’a ha víno ñongatuhára ramo opyta Zabdi, peteĩ Sifmigua.

28Sefela ñu megua olivoty ha higoty rehe oñangareko Báal-hanan, peteĩ Gederaygua, ha Joas oñangareko acéite rehe.

29Ha umi tymba aty rehe okarúva Sarónpe oñangareko Sitrai, peteĩ Sarongua; ha tymbakuéra rehe oĩva umi cerrokuéra pa’ũme oñangareko Safat, Adlai ra’y.

30 Camellokuéra rehe oñangareko Obil, peteĩ Ismaelgua; burrokuéra rehe oñangareko Jehedías, peteĩ Meronotgua.

31Ovechakuéra ha kavarakuéra rehe oñangareko Jaziz, peteĩ Agargua. Ko’ãva oñangareko tetã ruvicha David mba’erepyetakuéra rehe.

32Ha Jonatan, David tio, opyta hekombo’ehára ramo, ha’égui peteĩ kuimba’e iñarandúva ha kuatiahaihára; ha Jehiel, Hacmoni ra’y, poguýpe opyta tetã ruvicha ra’ykuéra.

33Ahitófel avei peteĩ tetã ruvicha rekombo’ehára; ha Husai, peteĩ Arquigua, tetã ruvicha angirũ (amígo).

34Ahitófel rire oĩ Joiada, Benaía ra’y, ha Abiatar. Ha Joab opyta tetã ruvicha soldádo aty ruvichaguasu ramo.