Salmokuéra 68 - Biblia en Guaraní - ?anderuete ?e’? Por? 2015

Israel Jára ombopoguy umi hese oñemoĩvape - David purahéi

1Ñanderuete opu’ã umi hese ija’e’ỹvare omosarambipa hag̃ua, ha ijypýgui okañymba hag̃ua umi ohayhu’ỹva ichupe.

2Nde remombóta ichupekuéra, ku yvytu ogueraha háicha tatatĩ, ku araity hyku háicha oñandúrõ tata aku, péicha omanombáta umi heko vaíva Ñanderuete renondépe.

3Ha umi heko potĩva katu hory joáta, ovy’a joáta Ñanderuete renondépe, ha vy’apópe osapukáita hikuái.

4Pepurahéi Ñanderuetépe, pemboetévo ichupe, pemboyvate ichupe, pe ohóva araíre, pembosako’i haperã, yvága atykuéra Jára héra ningo, pevy’aitéke henondépe.

5Ñanderuete oiko hogaguasúpe ityre’ỹva ru ramo ha oiko mbojovakehára imenave’ỹvape g̃uarã.

6Ñanderuete omoinge jevy umi tetã ambueygua hetãteépe, umi oikóva oñeñapytĩháme, Ha’e voi opoi jevýta ha omopu’ã porã jevýta, umi oñemoĩva hese katu oikóta yvy perõ oĩháme.

7Ha Nde, ore Ruete, resẽ ramoguare ne retã renondépe, rembohasa ichupekuéra pe yvy perõ rupi. Selah

8Upérõ pe yvy oryryiva’ekue, ha pe ára otyky Ñanderuete renondépe, pe cérro Sinai oryrýi Ñanderuete, Israel Jára renondépe.

9Nde, ore Ruete, reñohẽ amaguasu hi’arikuéra ha péicha ne retã ikane’õite jave Nde remombarete jevy ichupekuéra.

10Ha nde py’aporã rupi ne retã ojohu hendag̃ua ijyvyrãme oiko porã hag̃ua ipype, Nde, ore Ruete, remopu’ã jevy umi ikangývape.

11Ñanderuete ome’ẽma iñe’ẽ: Heta ombopoguy hesekuéra ija’e’ỹvape, heta ningo oĩ umi omombe’útava pe marandu porã:

12Oñanimba, okañy hag̃ua umi soldádo aty ruvicha, ha umi kuña opytava’ekue hógape oho omboja’o joa ojupe hese ija’e’ỹva mba’e repyeta.

13Ha peẽ piko pepyta reípa ovecha atykuéra pa’ũme, penderayhu’ỹva retekue ao ojogua heta pykasu pepokuépe, oñeñuãva óro morotĩme ha haguekuéra óro sa’yjúpe.

14Ñanderuete voi omosarambipa umi tetã ruvichápe, ha’eténte ku ama rayvi rypy’áicha okukuipava’ekue Salmon cérrope.

15Pe Basan cérro Ñanderuete cérro, pe Basan pegua cérro ningo peteĩ cérro ndetuicháva.

16Mba’érehe piko pemaña vai, peẽ ambue cerrokuéra, pe cérro Ñanderuete oiporavomava’ekue rehe hóga rendag̃ua ramo. Añetehápe Ñanderuete oikóta upépe opaite árape.

17Ñanderuete cárro ñorãirõ megua ndaikatúi ojepapa, Ñanderuete voi og̃uahẽ hendag̃ua porãitépe Sinaígui.

18Ore Ruete, Nde rejupíma cérro ru’ãme, rerahávo heta iñapytĩmbýva, ha regueraha jopói yvyariguakuéragui, ha avei umi opu’ãva nderehe jepe oikova’erã nde poguýpe.

19Toñemboete ore Jára, ore Ruetépe, Ha’e ñandereraha ijapére, Ñanderuete voínte ñanepytyvõta ñane rembiapópe. Selah

20Ñanderueténte, ore Jára añeteguáva, Ha’e ñaneguenohẽ jejopy vaígui. Ha’émante omboykekuaa pe ñemano.

21Añetehápe Ñanderuete ojokakuaa umi hese ija’e’ỹva akã ha ohundi umi ohayhúva tembiapo vai.

22Ñanderuete he’íra’e: Basan guive che pombojevy jeýta, Che voi pombojevy jeýta yguasu rugua guive.

23Nde rejepyhéita nderayhu’ỹva ruguýpe, ha huguykue ne rymba jagua rembi’urã.

24Yvyarigua atykuéra oúta omomba’eguasu hag̃ua Ñanderuetépe ha katuete og̃uahẽta che Jára oĩháme, heko jajaipáva rendápe.

25Heta opurahéiva oho tenonderãme, ha umi ombopúva mbaraka oho hapykuéri, ha ipa’ũme oho umi kuñataĩ ombopúva mba’epu pararã.

26Peẽ peñembyatýva, pepurahéi Ñanderuetépe, peẽ Israelgua pemomba’eguasu Ñanderuetépe.

27Upépe Benjamin, pe imitãvéva, oho tenonderãme; Juda, Zabulon ha Neftali ruvichakuéra oho hapykuéri.

28Nde, ore Ruete, ehechauka nde pu’aka ha emombarete umi mba’e rejapomava’ekue oréve g̃uarã.

29Tetã ruvichakuéra oguerúta ijopoikuéra nde rogaguasúpe, oĩva Jerusalénpe.

30Ejokomína pe jakare (Egípto) piritýpe, upéicha avei umi tóro (tetãguasu) ha umi tóro ra’ykuéra, oñemoĩva ipoguýpe heta óro morotĩ rupi ha emosarambipamína umi tetã oñorãirõsévape.

31Ouva’erã mburuvichakuéra Egíptogui, ha Etiopía oñembopya’e oipyso hag̃ua ipo Ñanderuete gotýo.

32Tetãnguéra yvy ape arigua pepurahéi Ñanderuetépe, pemomba’eguasu ore Jára, ore Ruetépe. Selah

33Ñanderuete oiko umi yvága ijyvatévape, ymaite guive ojejapova’ekue, pejapysaka porãke Ha’e oñe’ẽ jave hi’arasunu rupi.

34Pemomba’eguasúke Ñanderuetépe, Israel ári oĩ heko ojajaipáva ha yvágape oĩ ipu’akáva.

35Pekyhyjéke Ñanderuetégui, hogaguasúgui. Israel Jára ome’ẽ pu’aka ha mbarete hetãme, upévare pemomba’eguasu ichupe.