1Yvagakuéra omombe’u Ñanderuete reko jajaipa, ha arapýre ojekuaa ipo rembiapokue.
2Peteĩ ára ombohasa ko marandu a mbue árape, ha peteĩ pyhare oikuaauka ko marandu ambue pyharépe.
3Upépe ndaipóri mba’eveichagua yvyarigua ñe’ẽ, ha ipu noñehendúi mamove.
4Upeichavéramo jepe yvy tuichakue javeve osẽ iñe’ẽ, ha imarandu og̃uahẽ yvy apýra peve, ha upépe pe kuarahy oñembohóga.
5Ha pe kuarahy ku menarãicha osẽ ikotýgui, ovy’aite ku oñanívaicha haperã rehe.
6Pe kuarahy osẽ ára apýragui oho hag̃ua ambue apýra peve ha ndaipóri mba’eve okañykuaáva kuarahy rendýgui.
7Ñanderuete rembiapoukapykuérape ndaipóri jejavy, omoangapyhy katu yvyariguakuérape, opaite mba’e Ñanderuete he’íva guive katuete ojehu avei, Ha’e omoaranduhína umi oikuaa’ỹvape.
8Ñanderuete rembiapoukapy iporã ha ombohory yvyarigua py’apy, Ñanderuete rembiapoukapy hesakã ha ohesape porã yvyarigua resakuéra.
9Pe kyhyje Ñanderuetégui ipotĩ, ha péva oikóta opaite ára peve g̃uarã, Ñanderuete ombojovake hekoitépe, hendive ndaipóri jejavy.
10Ojepotave umía órogui ha iporãve heta óro oñemopotĩ porãvagui, ha he’ẽve eiraitégui, otykýva haitýgui.
11Ha ne rembiguái ojehekombo’e avei ipype, ha ojapo porãmba guive umía, katuete ohupitýta hembiapo repykue.
12Mávapa ojavýrõ jepe ohechakuaa ojavy hague. Eperdona che jejavy okañýva chehegui.
13Añembotuichase ramo chejokomína, anítei pe ñembotuicha ipu’aka cherehe, upéichante che reko oñemomirĩve ohóvo ha tachepotĩ apytávo oimeraẽva ñepu’ãguasu reígui.
14Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.
Who We AreWhat We EelieveWhat We Do
2025 by iamachristian.org,Inc All rights reserved.
