Hebreoyguakuérape 1 - Biblia en Guaraní - ?anderuete ?e’? Por? 2015

Ñanderuete oñe’ẽ ita’ýra rekove rupi

1Heta jevy ha heta hendáicha Ñanderuete oñe’ẽva’ekue ymave ñande rukuérape iprofetakuéra rupi.

2Ha ko’ã ára pahápe katu oñe’ẽ ñandéve ita’ýra Hesu Crísto rupi. Ipópe ningo omoingo opaite mba’e, ha Ha’érupi ojejapo opaite mba’e ojehecháva ha ndojehecháiva guive, (Colosayguakuérape 1,16).

3Hesu Crísto rupi ojehecha Ñanderuete reko jajaipa ha Hesu Crísto rupi Ñanderuete ohechauka avei mba’éichapa Ha’ehína. Hesu Crísto ningo ojokohína ko múndope (univérsope) ojejapóva guive iñe’ẽ pu’aka rupi. Hesu Crísto ombopoguyva’ekue angaipa pu’aka, ha oguapyhína ko’ág̃a yvágape Ñanderuete akatúape.

4Hesu Crísto ituichaiteve yvága rembiguaikuéragui (angelkuéragui) ohupitýgui peteĩ téra tuichavéva ichuguikuéra.

Hesu Crísto ituichave angelkuéragui

5Mba’eichagua yvága rembiguáipepa oje’eraka’e: Nde ningo che ra’y, ko árape Che romoñemoña. Ha avei: Che Itúvata ha ha’e chera’ýta.

6Ha he’i avei omoinge jevývo Ita’ýra ypykuépe ko yvýpe: Opaite yvága rembiguái ojeityva’erã henondépe omomba’eguasu hag̃ua ichupe.

7Ha umi yvága rembiguái rehe katu he’i: Ha’e ojapo ijyvága rembiguaikuéra yvytúicha ha hembijokuaikuéra tata rendýicha.

8Ita’ýra rehe katu he’i: Nde Jára guapyhaguasu oĩta ára atyguasu guive ára atyguasukuéra rupi, ha nde pu’aka rupi reisãmbyhy hekoitépe ne retãguasúpe.

9Rehayhúgui justícia ha nande’a’éigui teko vaíre, Ñanderuete ndeporavo vy’apópe Nde reiko hag̃ua avei Jára ramo, ha Nde ndetuichave ne irũnguéra apytégui.

10Ha he’ive: Nde ningo pe Jára rejapova’ekue ko yvy (múndo), ha yvagakuéra nde po rembiapokue avei.

11Opaite umi mba’e (rejapova’ekue) opava’erã, Nde katu reikova’erã tapia g̃uarã, umía itujupava’erã aóicha,

12umía oñembyapakuava’erã, oñembyapakua háicha peteĩ póncho, Nde katu tapiaitegua, ha ne añokuéra ndopaiva’erã araka’eve.

13Mba’eichagua yvága rembiguáipe (ángelpe) piko Ñanderuete he’íra’e: Eguapy che akatúape amoĩ meve nderehe ija’e’ỹva nde py renda ramo.

14Umi yvága rembiguái (pytu katukuéra) Ha’e ombou yvy apére oipytyvõ hag̃ua umi ojesalvátavape.