Job 2 - Biblia en Guaraní - ?anderuete ?e’? Por? 2015

1Ha ojehu avei ambue árape Ñanderuete ra’ykuéra ou oñemboja hag̃ua Ñanderuete renondépe, ha Satana ou avei hendivekuéra oñembojávo avei Ñanderuete renondépe.

2Upérõ Ñanderuete he’i Satanáme: Mamóguipa reju. Ha Satana ombohovái Ñanderuetépe ha he’i: Ajere ha aguata hágui aikóvo yvy apére.

3Upérõ Ñanderuete he’i Satanáme: Nderejesarekói piko ra’e che rembiguái Job rehe, ha’eichagua ndaipóri ambue yvy apére, kuimba’e heko porã ha heko potĩva, okyhyjéva Ijapoharégui ha opiáva opaichagua mba’evai apógui, ha ndopoíri chehegui, jepevémo aheja ichupe nde pópe reipy’ara’ã rei hag̃ua ichupe.

4Ha Satana he’i jevy Ñanderuetépe: Opaite mba’e kuimba’ekuéra ha kuñakuéra oguerekóva ome’ẽ hekove rehehápe.

5Eipysomína ko’ág̃a nde po, ha epoko ikangue ha ho’o rehe embohasy hag̃ua ichupe ha rehecháta katuete opoitaha ndehegui.

6Upérõ Ñanderuete he’i Satanáme: Péina ápe, ha’e opyta nde pópe, anínte repoko hekove rehe (anínte rejuka ichupe).

7Upéramo Satana osẽ Ñanderuete renondégui ha ombohasy Jóbpe ai vaietereígui, ipy mbyte guive iñakã mbyte peve.

8Ha Job ojapyhy peteĩ kambuchi jekakue oñekarãi hag̃ua, ha oguapy tanimbu apytépe.

9Upémaramo hembireko he’i ichupe: Nerakate’ỹ gueteri piko nde reko heko pegua rehe. Emaldeci Ñanderuetépe ha emano.

10Ha’e katu ombohovái ichupe ha he’i: Reñe’ẽ oimeraẽ kuña itavývaicha. Jarecivikuaa piko Ñanderuetégui mba’eporã, ha mba’evai ndajarecivimo’ãi. Opaite ko’ã mba’ére Job noñemohembiapo vaíri ijuru rupi.

11Ha mbohapy Job irũ, Elifaz, Teman pegua, Bildad, Suah pegua, ha Sofar, Naamat pegua, ohendúvo ojehu hague mba’evai Jóbpe, oñemoĩ hikuái peteĩ ñe’ẽme ou hag̃ua oñondivepa ha oñembyasy hendive, omoangapyhy hag̃ua ichupe.

12Ha’ekuéra ojesaupívo mombyry guive katu ndoikuaái ichupe ha ojahe’o hikuái sapukaipópe, omondoro ijaokuéra ha mbohapyvéva omosarambi avei tanimbu iñakã ári.

13Upéramo oguapy hikuái hendive yvýpe 7 ára ha 7 pyhare pukukue, ha avave nde’íri ichupe mba’eve, ohechágui imba’embyasy ituichaitereiha.