1Ha che ahecha pe guapyhápe Oguapýva po akatúape peteĩ kuatiañe’ẽ apakuapýicha, ha hese oĩ ñe’ẽ hyepývo ha okávo ha oñembotýva 7 ta’ãnga jopyhápe (séllope).
2Ha ahecha peteĩ yvága rembiguái imbaretéva hatã oporandu: Mávapepa ija oipe’a hag̃ua ko kuatiañe’ẽ kóva ha ojora hag̃ua umi 7 ta’ãnga jopyha.
3Ha avave ndaikatúi oipe’a, ni yvagaygua, ni yvy ape arigua térã yvyguy peguáva, ha avave ndaikatúi oma’ẽ hese omoñe’ẽ hag̃ua.
4Upévare che ajahe’o heta, ndojejohúigui avave ijáva ichupe oipe’a ha omoñe’ẽ hag̃ua pe kuatiañe’ẽ.
5Ha peteĩ umi karai ancianokuéra apytégui he’i chéve: Ani rejahe’o. Ema’ẽ porãke ipu’aka ningo pe leõ, Juda ñemoñare peteĩva, oúva David rapógui, Ha’émante ikatu oipe’a pe kuatiañe’ẽ ojorávo umi 7 ta’ãnga jopyha.
6Ha ahecha pe guapyhaguasu ha umi irundy tekove oikovéva ha umi 24 karai anciáno mbytépe oñembo’yvahína peteĩ Ovecha ra’y ojejukava’ekuéicha, Ha’e 7 hatĩ ha 7 hesa, ko’ãva ningo 7 Ñanderuete Pytu Porãite oñemboúva opaite yvy ape ári.
7Ha pe Ovechara’y ou ha orecibi pe kuatiañe’ẽ pe guapyhaguasúpe Oguapýva po akatúagui.
8Ha’e orecibívo pe kuatiañe’ẽ umi irundy tekove oikovéva ha umi 24 karai anciáno ojeity pe Ovechara’y renondépe ha peteĩteĩ umi karai anciáno oguereko ipópe peteĩ mbarakaguasu ha peteĩ váso oroguiguáva henyhẽva mba’e ryakuã porãgui, ko’ãva ningo umi heko potĩva ñembo’e.
9Ha opurahéi hikuái peteĩ purahéi pyahu he’íva: Ndémante ikatu erecibi pe kuatiañe’ẽ ha rejora ha’ãnga jopyhakuéra, rejejuka haguére orejogua hag̃ua Ñanderuetépe g̃uarã nde ruguy rupi, opaichagua tetãygua ha tríbu apytégui ha opaite ñe’ẽ ha tetãnguéra apytégui.
10Ha rejapo orehegui ore Ruetépe g̃uarã mburuvicha ha pa’ikuéra, ore roisãmbyhy hag̃ua avei hendive ko yvy ári.
11Ha ama’ẽ ahendu hetave 100.000.000 (100 millónes) yvága rembiguái (ángel) ñe’ẽpu pe guapyhaguasu jerekuévo, oĩháme avei umi 4 tekove oikovéva ha umi karai ancianokuéra,
12umía hatã he’i: Pe Ovechara’y ojejukamava’ekuépe ija ohupity hag̃ua pu’aka ha mba’eita arandu ha mbarete, ñemboete, teko jajaipa ha ñemomba’eguasu.
13Uperire ahendu opaite oikóva yvágape, yvýpe, yvy guýpe ha yguasu ári ha hyepýpe he’ívo: Pe guapyhaguasúpe Oguapývape ha pe Ovechara’ýpe toñemomba’eguasu, toñemombe’u porã, toñemboete ha toñeme’ẽ pu’aka ára atyguasukuéra guive umi ára atyguasurãme g̃uarã.
14Ha umi irundy tekove he’i: Amen (taupéicha). Ha umi 24 karai anciáno ojeity omomba’eguasu hag̃ua Ñanderuetépe, pe Oikovéva tapia g̃uarã renondépe.
Who We AreWhat We EelieveWhat We Do
2025 by iamachristian.org,Inc All rights reserved.
