Jeremías 22 - Biblia en Guaraní - ?anderuete ?e’? Por? 2015

Profecía

Juda retã ruvichakuéra rehe

1Tereho Juda retã ruvicha rógape, ha upépe ere ko’ã ñe’ẽ:

2Ehendúke Ñanderuete ñe’ẽ, nde Juda retã ruvicha reguapýva David guapyhaguasúpe, nde ha ne rembiguaikuéra, ha ne retãygua oikéva ko’ã okẽ rupi.

3Péicha he’i Ñanderuete: Pembojovake hekoitépe, peipytyvõ pe mboriahúpe ijopyhára pógui, ani pembotavy ha ani pemondátei tetã ambueyguápe, ityre’ỹvape ha imenave’ỹmavape, ha ani peñohẽtei hi’ánga potĩva ruguy ko yvy kóvape.

4Pejapo ramo hekoitépe ko ñe’ẽ kóva, umi tetã ruvicha oguapýva David rendaguépe, iguapyhaguasúpe, oikeva’erã icárrope ha ikavaju ári ko táva kóva rokẽnguéra rupi, hembiguaikuéra ha hetãyguakuéra ndive.

5Ha ndapejapói ramo ko ñe’ẽ kóva, chejehete voi añe’ẽme’ẽ, he’i pende Ruete, ko óga kóva katuete itaperéta,

6upévarehe pende Ruete he’i Juda retã ruvicha róga rehe: Ku Galaad yvy porãitéicha nde reiko chéve g̃uarã, ku Líbano ru’ãicha Che romopu’ã, upeichavéramo jepe Che rombotaperéta ha nde táva ryepýpe avave ndoikomo’ãvéima.

7Ambosako’íta umi nembyaítava, peteĩteĩva ihácha reheve, oikytĩva’erã hikuái nde cédro ojeporavopyréva oity hag̃ua tatápe.

8Ha heta tapicha ohasava’erã ko táva ypy rupi, he’i joava’erã ojupe: Mba’érehepa péicha ojapo yvága Jára ko tavaguasu kóva rehe.

9Ha oje’éta ichupekuéra: Opoi haguére hikuái Ñanderuete, Ijára ñe’ẽme’ẽmbýgui, omomba’eguasu hag̃ua ambue jarakuérape ha oiko hag̃ua hembiguái ramo.

10Ani peguerojahe’o ha peguerombyasy umi omanova’ekuépe, pejahe’o asy uvei umi ohótava rehe, ndoumo’ãvéi araka’eve, ha ndohechamo’ãvéi pe yvy onace haguépe.

11Péicha he’i Ñanderuete Salum, Josías ra’y, Juda retã ruvicha rehe, pe ojupiva’ekue tetã ruvicha ramo itúva Josías rendaguépe, ha osẽmava’ekue ko’águi; ha’e ndouveiva’erã ko tetã kóvape.

12Omanóta uvei tembiguái ramo pe tetã ojegueraha hag̃uáme ichupe, ha ndohechamo’ãvéi ko yvy kóva.

13Cháke, nde reporomomba’apo reíva remopu’ã hag̃ua nde róga justicia’ỹ reheve, ha nde nereme’ẽi nde rapichápe omba’apóva ndéve g̃uarã hembiapo repy, rembojegua porãve hag̃ua nde kotykuéra hembiapo repy rãngue rupi.

14Cháke, nde ere ramo: Amopu’ãta che rogaguasu, heta ikoty, hovetã tuicha porãta, ha añu’ãta cédrope itapiakuéra ha ipahápe apintapytãmbáta.

15Reimo’ã piko reikotaha tetã ruvicha ramo reñembojerepa haguére cédrope. Nde ru okaru ha hoy’u porã, ha opaite mba’e ojapóva guive oho porãmba ichupe g̃uarã, oguata porã haguére Ñanderuete rapére.

16Ha’e ombojovake porã pe ojepy’apy asývape ha imboriahuetereívape, upévagui ha’e oiko porãva’ekue. Ko’ã tembiapo porã ha’e ojapova’ekue chekuaa porã haguére, he’i Ñanderuete.

17Nde resa ha nde py’a katu ojepy’apy ne mba’e mondapyrã rehe, nde rejepy’amongeta mba’éichapa reñohẽkuaa nde rapicha heko potĩva ruguy, reporojopy ha reporombohasa asy hag̃uánte uvei,

18upévarehe, Ñanderuete he’i Joacim, Josías ra’y, Juda retã ruvicha rehe: Avave ndojahe’omo’ãi hese, he’ívo: Angái, che ryke’ymi, angái che kyvy, ha ndoguerojahe’omo’ãi ichupe hikuái, he’ívo: Angái, karaiguasu, angái, che retã ruvicha.

19 Búrro oñeñotỹ háicha oñeñotỹta avei ichupe, oñembotyryrýta ha mombyrymi Jerusaléngui oñemombóta ichupe.

20Ejupi Líbanope ha esapukái, ehenduka ne ñe’ẽ Basánpe; Abarim cérro guive esapukái oñehundipa haguére opaite ne irũnguérape.

21Nde reiko porãite jave Che ame’ẽma ndéve che ñe’ẽ, nde katu ereva’ekue: Nahendumo’ãi. Kóa voi nde rape ne mitãrusu ára guive, araka’eve voínte nerehendúi che ñe’ẽ.

22Pe yvytu oguerahapáta ne mburuvichakuérape ha ne irũnguéra ojeguerahapáta jepokuapýpe; upevove retĩetéta ha ndepy’atarováta opaite ne ñañangue rupi.

23Ko’ág̃a reiko nde rógape ojejapova’ekue cédro Líbano peguarégui. Mba’eichaitépa nepyahẽ asýta ág̃a og̃uahẽvove ndéve jehasa asy ku kuña imembymbotávarõ guáicha.

24Añetehápe, he’i Ñanderuete, Conías, Joacim Juda retã ruvicha ra’ýpe, ha’e oiko rire ku kuairũicha che po akatúa rehe, upégui jepeve roipe’ava’erã.

25Ha romoĩta ndejukaséva pópe, ha hesa renondépe reiméta kyhyjepópe; umía ningo hína Nabucodonosor, Babilónia ha umi Caldeaygua retã ruvicha.

26Che poguerahaukáta jepokuapýpe, ndéve ha nde sy, nemoheñoiva’ekuépe, ambue tetã napenaséi haguépe ha upépe pemanóta.

27Ha pe tetã ojevysehápe hikuái, hi’ánga mbytete guive, upépe ndoumo’ãvéi araka’eve.

28Ko kuimba’e Coníaspa peteĩ kambuchi ojepota’ỹvaha ojejokapyréva, peteĩ mba’yru avave ohayhu’ỹva. Mba’érehepa oñemombo ichupe ha iñemoñarenguérape, oiko hag̃ua peteĩ tetã ha’ekuéra ndoikuaáivape.

29Nde, tetã, tetã, tetã, ehendúke Ñanderuete ñe’ẽ.

30Péicha he’i Ñanderuete: Ehai mba’épa ojehúta ko kuimba’e ita’yra’ỹvaicha, ko kuimba’e kóvape nosẽ porãmo’ãi mba’eve oikove aja pukukue; ha iñemoñarenguéragui avave ndoguapymo’ãi David guapyhaguasúpe ha ijapytépe avave noisãmbyhymo’ãvéi Juda retã.