Números 19 - Biblia en Guaraní - ?anderuete ?e’? Por? 2015

Mba’éichapa oñemopotĩ pe oñemongy’ávape

1Ñanderuete oñe’ẽ Moises ha Aarónpe, ha he’i:

2Ko tembiapoukapy kóva Che ame’ẽ ojejapo hag̃ua: Ere Israel ñemoñarenguérape togueru ndéve peteĩ vaka pytã iporãitéva, hi’ári ojehupi’ỹva gueteri peteĩ cangálla.

3Ha reme’ẽta pa’i Eleazárpe, ha’e oguenohẽ hag̃ua pende rekoha oka gotýo oajúra kytĩuka hag̃ua hovaképe.

4Upéi pa’i Eleazar omohe’õva’erã ikuãme huguykuégui, ha ohypyiva’erã huguykue pe óga jojohuha henondéguio 7 jevy (véce);

5ha ohapyukapava’erã pe vaka, hesakuéra renondépe ipirekue, ho’okue, huguykue ha hepotikue reheve.

6Upéi pe pa’i oityva’erã yvyra cédro, mba’e rypyiha ha ovecharague pytãva pe vaka okaivahína ratápe.

7Upéi pe pa’i ojoheiva’erã ijaokuéra ha ojahuva’erã, uperire ae oike jevyva’erã pende rekohápe; ha pe pa’i naipotĩri ka’arupytũ meve.

8Péicha avei pe kuimba’e ohapyva’ekue pe vaka, ojoheiva’erã ijao ha ojahuva’erã, ha naipotĩri ka’arupytũ meve.

9Upéi peteĩ kuimba’e ipotĩva ombyatyva’erã pe vaka tanimbukue ha oguerahava’erã yvy pehẽngue ipotĩháme, mombyrymi pende rekohágui, Israel ñemoñarenguéra oiporu hag̃ua ojejapo ramo pe y oñemopotĩ hag̃ua; ojeporúva oipe’a hag̃ua kuimba’e ha kuña rembiapo vai pe kuave’ẽmby angaipa reheguáva rehe.

10Ha pe kuimba’e ombyatyva’ekue pe vaka tanimbukue ojoheiva’erã ijaokuéra, ha naipotĩri ka’aru pytũ meve, kóva peteĩ tembiapoukapy Israel ñemoñarenguérape g̃uarã opaite árape g̃uarã, ha tetã ambueyguápe g̃uarã avei.

11Oimeraẽ kuimba’e térã kuña ojáva tapicha re’õngue rehe naipotĩri 7 ára (día) pukukue.

12Pe ára mbohapyhápe oñemopotĩva’erã ko y kóvape, ha pe ára 7-hápe ipotĩ jevýta; ha pe ára mbohapyhápe noñemopotĩri ramo naipotĩmo’ãi pe ára 7-hápe.

13Umi ojáva tapicha re’õngue rehe, ha noñemopotĩri ramo ko y kóvape, ha’e oñemongy’a ha omongy’a avei pende Ruete róga jojohuha ha pe tapicha péva ojejukava’erã Israel apytégui; ndojehypýi haguére hi’ári pe y oporomopotĩva.

14Kóa peteĩ tembiapoukapy peẽme g̃uarã oĩ ramo omanóva retekue peteĩ ógape, ha oimeraẽ oikéva guive pe ógape, ha opaite mba’e oĩva guive ipype naipotĩri 7 ára pukukue.

15Ha opaite mba’yru oñemboty porã’ỹva naipotĩri avei.

16Oimeraẽ tapicha oja ramo ojejukava’ekue rehe kyse pukúpe, térã omanonteva’ekue rehe, térã kuimba’e ha kuña kanguekue rehe, térã pe tenda oñeñotỹ hague rehe, naipotĩri 7 ára pukukue.

17Pemopotĩ jevyva’erã péicha upe oñemongy’amava’ekuépe, pegueruva’erã pe tanimbu pe vaka ojehapyva’ekuégui ha hi’ári peñohẽ y yvu peguare ha pembojehe’a porã,

18upéi peteĩ kuimba’e ipotĩva ogueruva’erã pe mba’e rypyiha, ha ombohykueva’erã ýpe, ha ohypyiva’erã ipype pe óga ha pe koty rembiporu rehe, umi tapichakuéra upépe oĩva guive ári, ha pe opokova’ekue pe kanguekue rehe, térã pe ojejukava’ekue rehe, térã pe omanomava’ekue rehe, térã pe tenda oñeñotỹva’ekue rehe.

19Ha pe ipotĩva ohypýita pe ipotĩ’ỹvape pe ára mbohapy ha 7-hápe, upéi ha’e ojoheiva’erã ijao, ha ojahuva’erã, ha ipotĩ jevýta ka’arupytũ rire.

20Ha pe ipotĩ’ỹva noñemopotĩri ramo, ojejukava’erã, omongy’águi pende Ruete róga jojohuha, ndojehypýirigui hi’ári pe y oporomopotĩva, upéva naipotĩri.

21Kóa peteĩ tembiapoukapy peẽme g̃uarã opaite árape; pe ohypyiva’ekue pe y oporomopotĩva ojoheiva’erã avei ijao; ha pe opokóva pe y oporomopotĩva rehe naipotĩri avei ka’arupytũ meve.

22Ha peteĩ ipotĩ’ỹva opoko ramo peteĩ mba’e rehe, pe mba’e péva naipotĩri avei; ha peteĩ tapicha ipotĩva opoko ramo hapicha ipotĩ’ỹva rehe ha’e oñemongy’a avei.