Deuteronómio 3 - Biblia en Guaraní - ?anderuete ?e’? Por? 2015

Israel ojapo sarambi Og, Basan retã ruvicha rehe

1Jajevy ha jahava’ekue Basan rape rehe, ha osẽ hikuái ñande rapépe Og, Basan retã ruvicha, ojeity hag̃ua ñande ári Edreípe, ha’e ha mayma hetãyguakuéra ndive.

2Ha Ñanderuete he’i chéve: Ani rekyhyjétei ichuguikuéra, nde pópe amoĩma ichupe ha opaite hetãyguakuéra ijyvykuéra reheve; ha rejapóta hese rejapo haguéicha Sehon rehe, Amorgua retã ruvicháre, oikova’ekue Hesbónpe.

3Jahve, Ñanderuete, omoĩ avei ñande pópe Og, Basan retã ruvicha, ha mayma hetãyguakuérape, ha sarambi jajapova’ekue hesekuéra ñahundipa peve.

4Ha ñambopoguy opaite itavakuérape, hemby’ỹre peteĩnte jepe; 60 táva oĩva guive Argob yvy tuichakuépe, opytava’ekue Og, Basan retã ruvicha poguýpe.

5Opaite ko’ã táva oñemongora porã tápia yvate reheve ha hokẽguasukuéra oñemboty porã, ojepapa’ỹre hetaite ambue tavakuéra oñemongora’ỹva tápia yvate reheve.

6Ha ñahundipákuri, jajapo haguéicha Sehon rehe, Amorgua retã ruvicha, jajukapávo itavayguakuérape: kuimba’e, kuña ha mitãkuérape jepeve.

7Ha jaguerahánte opaite hymbakuéra ha imba’erepy jaipe’ava’ekue avei itavakuéragui.

8Uperire ñamoĩ ñande poguýpe avei pe yvy oĩva Arnon yakã guive Hermon cérro peve, umi mokõi Amorgua retã ruvicha oikóva Jordan rembe’y asúpe, kuarahyresẽ gotýo, ho’ava’ekue ñande pópe.

9Umi Sidongua ombohéra Hermon cérro, Sirion; ha Amorguakuéra, Senir.

10Mayma táva ñu rupigua ha opaite Galaad ha Basan tuichakue Salca ha Edrei peve, Og tavakuéra, Basan retãme oĩva guive ho’apa ñande pópe.

11Og, Basan retã ruvicha añoite hembyva’ekue umi kuimba’e ijyvateitereígui (gigántegui). Hupa hierroguigua, oĩ gueteri Rabápe, Amon ñemoñarenguéra távape; hupa ipuku 3,94 métro ha ipe 1,75 métro.

Ruben, Gad ha Manases tríbu

mbytere oñemohenda Jordan rembe’y asúpe, kuarahyresẽ gotýo

12Upéicha, opaite ijyvy opytava’ekue ñane mba’e ramo, Aroer guive, opytáva Arnon yakã ypýpe ha Galaad cérro mbytépe itavakuéra reheve, ame’ẽ Rubengua ha Gadguakuérape;

13ha Galaad rembyre ha Basan, Og retãngue, opaite yvy Argob reheguáva, oiko haguépe umi kuimba’e ijyvateitereíva retã, umíva ame’ẽ Manases tríbu mbyterépe.

14Jair, Manases ra’y, oñeme’ẽ Argob yvy, Gesur ha Maaca rembe’y peve, ha pe táva Basanhavot ombohéra Jair, ha upéicha héra ko ára kóva peve.

15Ha Galaad ame’ẽ Maquírpe.

16Rubengua ha Gadguakuérape ame’ẽ Galaad mbyte guive Arnon yakã mbyte peve ha Jaboc yakã meve, pevahína Amon ñemoñarenguéra retã rembe’y;

17ame’ẽ avei Araba yvy oĩva Jordan rembe’y, Quinéret guive Araba yguasu peve, péva pe Yguasu Juky rehegua (Mar Saládo) Pisga cérro ykére kuarahyresẽ gotýo.

18Upéramo ha’eva’ekue peẽme: Jahve, Ñanderuete, ome’ẽ peẽme ko yvy pene mba’etee ramo ha peho joaiteva’erã mayma pene ñorãirõ rembiporu reheve pende pópe, pene pehẽngue Israel ñemoñarenguéra renonderãme.

19Ha pene rembireko, pende ra’y ha pene rymbakuéra, che aikuaa pene rymba hetaha, opytapáta umi távape che ame’ẽmava’ekué peẽme.

20Ñanderuete omombytu’u peve pene pehẽnguekuérape ha peẽme avei, ha oñemomba’e peve pe yvy rehe Ñanderuete ome’ẽse ichupekuéra Jordan mboypýri, ha uperire ae ikatu peju jevy pende yvyteépe che ame’ẽmava’ekue peẽme.

21Upéramo ha’ékuri Josuépe: Nde resa ohechapákuri Jahve, Ñanderuete, ojapova’ekue umi mokõi tetã ruvichaguasu rehe; upéicha Ñanderuete he’i ojapotaha avei mayma tetãre nde rehasataha rupi.

22Ani rekyhyjétei ichuguikuéra; Jahve, Ñanderuete voi oñorãirõta penderehehápe.

Ñanderuete ndohejái Moises oike Canaan retãme

23Upéramo añembo’e Ñanderuetépe, ha’évo:

24Che Jára, ore Ruete, Nde reñepyrũma rehechauka ne rembiguáipe ne mba’eguasu ha nde pu’aka; mba’eichagua Járapa oĩ yvagakuérape térã yvy ape ári ikatúva ojapo pe tembiapo ha milagrokuéra Nde rejapóva.

25Tahasána, che ajeruremi ndéve, tahecha avei pe yvy iporã oĩva Jordan mboypýri, pe cérro porã ha pe Líbano avei.

26Ñanderuete ipochýkuri chendive penderehe, ha upévagui nacherendúi; ha he’i chéve: Opáma, anive reñe’ẽ chéve ko’ã mba’ére.

27Ejupi Pisga ru’ãme ha ejesaupi kuarahyreike, nórte, sur ha kuarahyresẽ gotýo, ha ema’ẽ nde resaite rupi; nderehasamo’ãi katu Jordan mboypýri.

28Ha eñe’ẽ Josuépe, emokyre’ỹ ha emombarete ichupe; ha’e ohasáta ko’ã tetãygua renonderãme; ha ha’e ome’ẽta ichupekuéra pe yvy ko’ág̃a rehechátava, imba’etee ramo.

29Ha japytákuri umi cérro pa’ũme Betpeor rovái.