Isaías 26 - Biblia en Guaraní - ?anderuete ?e’? Por? 2015

Israel oñembyasyete pe ára pahápe, ojapo vai haguére

1Upe ára upévape opurahéi joáta ko purahéi Juda retãme: Jaguereko táva imbaretéva; Ñanderuete orepytyvõ romopu’ã hag̃ua mokõi korapy jere yvateteéva.

2Peipe’a táva rokẽguasukuéra oike hag̃ua peteĩ tetã heko potĩ ha ojeroviáva.

3Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

4Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.

5Ha’e oitýkuri umi oikóva umi tenda ijyvatehápe, omotĩndy pe táva oñembotuichávape, Ha’e oity ichupekuéra yvyetére.

6Umi ojejopy vaiva’ekue opyrũmbáta hese, ha imboriahúva opyrũmbáta avei hesekuéra.

7Pe heko potĩva rape naikarẽi, Ñanderuete ombosako’i porãgui pe tape umi hese ojeroviávape g̃uarã.

8Ore roha’ãrõ Nde oremboguata porã ore rekove rape rehe nde justícia rupi; ore ánga ijy’uhéi nembotuicha ha nemomba’eguasu hag̃ua.

9Che py’aite guive roheka pyharekuépe, ha che pytu porã chepype oĩva oikose nendive, upévare apu’ã ko’ẽ mboyve aiko hag̃ua nendive; yvyariguakuéra ohendúva guive ne rembiapoukapy oikuaa voi mba’éichapa oiko porã hag̃ua oñondive.

10Reiporiahuvereko ramojepe iñañávape, ha’e ndoikoséi nde justícia poguýpe; ha peteĩ tetãme oĩ ramojepe justícia ha’e ohayhuve hembiapo vai; upévagui ha’e ndohechamo’ãi Ñanderuete reko jajaipa.

11Ore Ruete, Nde remopu’ã ramojepe nde po reñangareko hag̃ua hesekuéra, ha’ekuéra ndohechakuaái; amo ipahaitépe ae katu ohecháta hikuái ha otĩ etereíta. Nde nerakate’ỹ ne retãre ha nde pochy tombokusuguepa umi nderehe oñemoĩvape.

12Ore Ruete, Nde orembopy’aguapy, nderupínte ore rembiapokuéra osẽ porãmba.

13Ore Jaratee, ambue oñembojarava’ekue avei orerehe; ko’ág̃a katu ore rojerovia nderehénte.

14Umía oñemoĩ haguére nderehe omanóta ha ndoikovemo’ãi, upévagui Nde rehavira ha rehundi ichupekuéra, ndaiporivéima hag̃ua mandu’a hesekuéra.

15Emboheta hetave umi tetãygua, embotuichave opaite tetã rembe’y pegua ha ehechauka ichupekuéra nde pu’aka.

16Ore Ruete, rohasa asyete jave ha nde jehavira orerupitýgui roheka jevy nde rova ha roñembo’e ndéve.

17Ipyahẽ ha osapukái háicha peteĩ kuña imembymbotáva, upéicha roimékuri ne renondépe, ore Ruete.

18Oreryeguasuete, ore rojepoka orememby hag̃uáicha, orememby katu yvytúnte, ore ndaikatúi roipytyvõ porã ko tetãme ha ore ndaikatúi romyenyhẽ ko tetãme heta yvyariguágui.

19Umi ojeroviáva nderehe omano ramojepe oikove jevýta, he’õnguekuéra opu’ã jevýta. Pepáy ha pepurahéi, peẽ yvyetére peikóva. Nde ysapy omoingove ichupekuéra ha pe yvy ome’ẽ jevýta umi omanomava’ekue.

20Tereho, nde che retã, eike nde kotýpe ha emboty okẽnguéra nde rapykuerépe; ekañy, sapy’aitemi, ohasa peve pe jehasa asyguasu.

21Peikuaa porãke, Ñanderuete osẽta hekohágui ohavira hag̃ua yvyariguakuérape oñemoĩ haguére hese hembiapo vaieta rupi ha pe yvy ohechaukáta pe tuguy oñeñohẽva’ekue hi’ári, ha noñeñomimo’ãvéi umi ojejukava’ekuépe.