Números 3 - Biblia en Guaraní - ?anderuete ?e’? Por? 2015

Leviguakuéra ojepapa ha hembiaporã

1Ko’ãva hína Aaron ha Moises ñemoñarenguéra, Ñanderuete oñe’ẽ ramoguare Moiséspe, Sinai cérrope.

2Ha ãva hína Aaron ra’y réra: Nadab, ijypykue, Abiu, Eleazar ha Itamar.

3Ko’ãva hína Aaron ra’y réra, ñemonambyre acéitere oiko hag̃ua pa’i ramo.

4Nadab ha Abiu katu omanomava’ekue Ñanderuete renondépe oikuave’ẽ ramoguare tata ambue reheve Ñanderuete renondépe Sinai desiértope, ndaita’ýrai hikuái. Eleazar ha Itamar oikókuri pa’i ramo itúva Aaron poguýpe.

5Ha Ñanderuete oñe’ẽ Moiséspe ha he’i:

6Embyaty Levi tríbu ha emoĩ pa’i Aaron poguýpe,

7ha’ekuéra ojapopa hag̃ua ha’e he’íva guive ichupekuéra; ha’ekuéra opytáta ambue Israel ñemoñarenguéra rendaguépe omba’apo hag̃ua pe óga jojohuhápe;

8ha’ekuéra oñangarekóta opaite óga jojohuha rembiporukuéra rehe, ha opaite mba’e rehe Israel ñemoñarenguéra omoĩtava ipoguýpe, ojapo hag̃ua pe óga jojohuha rembiapo.

9Leviguakuéra opytáta Aaron ha ita’yrakuéra poguýpe; Israel ñemoñarenguéra apytégui Levigua kuéra oipytyvõva’erã Aaron ha ita’yrakuérape opaite hembiapópe.

10Ha remoingóta Aaron ha ita’yrakuérape pa’i ramo, ha peteĩ hesegua’ỹva oñemboja ramo pe óga jojohuha rembiapópe, katuete omanova’erã.

11Ñanderuete oñe’ẽ Moiséspe ha he’i:

12Eikuaa porãke, Che aiporavo Leviguakuérape Israel ñemoñarenguéra apytégui mayma ita’ýra ypykue rekovia; upévare Leviguakuéra che mba’e teéva.

13Che mba’égui voi mayma ta’ýra ypykue; Che ajukauka ramoguare mayma Egiptoygua ra’y ypykue, upe ára guive Che amboyke mayma Israelgua ra’y ypykue, kuimba’e ha tymbakuéra apytégui, che mba’etee ramo, Che ningo pende Ruete.

14Ha Ñanderuete oñe’ẽ Moiséspe Sinai desiértope ha he’i:

15Eipapa Levi ñemoñarenguérape hogaguasukuéra ha hogakuéra rupi; reipapáta mayma kuimba’épe ombotýmava guive peteĩ jasy.

16Ha Moises oipapa ichupekuéra Ñanderuete he’i haguéicha.

17Ãva Levi ra’y réra: Gerson, Coat ha Merari.

18Ha ãva Gerson ra’y réra omyakãva hogaguasukuéra: Libni ha Simei.

19Coat ra’y omyakãva hogaguasukuéra: Amram, Izhar, Hebron ha Uziel.

20Ha Merari ra’y omyakãva hogaguasukuéra: Mahli ha Musi. Ko’ãva hína Levi ñemoñarenguéra hogaguasukuéra rupi.

21Gerson ra’y: Libni ha Simei.

22Ha’ekuéra rehegua kuimba’e ombotýmava guive peteĩ jasy ojepapava’ekue ha ojejohu 7.500 kuimba’e.

23Gerson ñemoñarenguéra opytava’erã pe óga jojohuha kupe gotýo, kuarahyreike gotýo;

24ha Gerson ñemoñare ruvicha Eliasaf, Lael ra’y.

25Ha Gerson ra’y oñangareko pe óga jojohuha rehe, oĩháme umi mokõi kotyguasu, pe kotyguasu oñemboykéva pa’ikuérape ha pe kotyguasu oñemboykéva Ñanderuete ha pa’iguasúpe, ha avei imo’ãhakuéra ha umi aosãingo hokẽ rehegua rehe.

26Oñangarekóta avei umi aosãingo korapy reheguáva ha pe aosãingo pe korapy rokẽ reheguáva rehe, opytáva pe óga jojohuha ha pe kuave’ẽmby renda jerekuévo, ha oñangarekóta avei isãnguéra rehe ojeporúva ojoko hag̃ua pe óga jojohuha.

27Ko’ãva Coat ra’ykuéra hogaguasukuéra rupi: Amram ha hogaguasu kuéra ndive, Izhar ha hogaguasukuéra ndive, Hebron hogaguasukuéra ndive ha Uziel hogaguasukuéra ndive.

28Mayma kuimba’e ijapytépe ombotýmava guive peteĩ jasy oĩ 8.600, umíva oñangarekóta umi mba’e oĩva rehe pe óga jojohuha ryepýpe ha ikora ryepýpe.

29Coat ñemoñarenguéra opytava’erã pe óga jojohuha ykére, oĩva sur gotýo.

30Elizafan, Uziel ra’y, opyta Coat ñemoñarenguéra ruvicha ramo.

31Ipoguýpe opytáta pe karameg̃ua, pe mesa, pe tataindyenda, kuave’ẽmby rendakuéra, umi óga jojohuha rembiporukuéra, ha opaichagua aosãingo ojeporúva guive hembiapópe.

32Eleazar, pa’i Aaron ra’y, opytáta Levi tríbu ruvicha ramo ha oisãmbyhýta avei imburuvichakuérape.

33Merari ra’ykuéra: Mahli ha Musi, ko’ãva omyakãta hogaguasukuérape.

34Opaite hesegua kuimba’e ombotýmava guive peteĩ jasy oĩ 6.200.

35Ha Zuriel, Abihail ra’y, opyta Merari ñemoñarenguéra ruvicha ramo, ha’ekuéra opytava’erã pe óga jojohuha ykére, oĩva nórte gotýo.

36Merari ra’ykuéra oñangarekóta umi óga jojohuha tablon rehe, umi alfajía rehe, umi horcon rehe, ipyendakuéra rehe ha opaite hembiporukuéra rehe,

37umi korapy póste rehe, ipyendakuéra rehe, iposte’i rehe ha isãnguéra rehe.

38Pe óga jojohuha renondépe, kuarahyresẽ gotýo, oñemohendáta Moises ha Aaron ita’yrakuéra ndive, oñangareko hag̃ua pe tenda oñemboykéva rehe pende Ruetépe g̃uarã, Israel ñemoñarenguéra rekovia; ha hesegua’ỹva oñemboja ramo hóga jojohuha rembiapópe omanova’erã.

39Moises ha Aaron oipapava’ekue mayma Levigua kuimba’épe hogaguasukuéra rupi, Ñanderuete he’i haguéicha, ha ojohu 22.000 kuimba’e.

Ta’ýra ypykue sãso (libertad)

40Ñanderuete he’i Moiséspe: Eipapa mayma Israelgua ra’y ypykue ombotýmava guive peteĩ jasy, herakuéra rupi reipapava’erã.

41Nde reiporavóta che mba’erã ramo Leviguakuérape, Israel ñemoñarenguéra ra’y ypykue rendaguépe ha Levigua rymbakuéra, Israelgua rymba ra’y ypykue rendaguépe, Che ningo pende Ruete.

42Moises oipapa mayma Israel ñemoñare ra’y ypykue, Ñanderuete he’i haguéicha ichupe.

43Ha mayma ta’ýra ypykue, peteĩ jasy ombotýmava guive oĩ 22.273 kuimba’e.

44Upéi Ñanderuete oñe’ẽ Moiséspe ha he’i ichupe:

45Embyaty Israel ñemoñarenguéra ra’y ypykue rendaguépe ha hymbakuéra ypykuéra rendaguépe umi Leviguakuérape, ha’ekuéra che mba’e teégui, Che ningo pende Ruete.

46Ha oĩve 273 Israel ñemoñare ra’y ypykue Leviguakuéragui,

47upévare erecibi peteĩteĩvagui 5 síclo (92 grámo) pe óga jojohuha medídaicha. Peteĩ síclo (= 18,4 grámo) oguereko 20 géra (1 géra = 0,92 grámo).

48Upéicha reme’ẽva’erã Aaron ha ita’yrakuérape pe pirapire, oñeme’ẽva’ekue umi hetavéva rehe.

49Upéramo Moises ojapyhy pe pirapire hembýva umi Israelgua repy hetavévagui.

50Ha ombyatypa rire Israel ñemoñare ra’y ypykuéra pirapire ohupity 1.365 síclo (25,11 kílo) pe óga jojohuha medídaicha.

51Ha Moises ombohasa pe pirapire, oñeme’ẽva ichupe Israel ra’y ypykue rendaguépe Aaron ha ita’yrakuérape, Ñanderuete he’i haguéicha Moiséspe, upeichaite ha’e ojapopa avei.