1Opavave toñemoĩ pe tetã ruvicha ha mburuvichakuéra poguýpe. Ndaipóri ningo tetã ruvicha, ni mburuvichakuéra, ou’ỹva Ñanderuetégui, ha umi oĩva guive Ñanderuete remimoĩmbyre voi.
2Upévare, upe oñemoĩva tetã ruvicha térã mburuvichakuéra rehe oñemoĩ Ñanderuete rehe. Ha umi oñemoĩva hesekuéra ojehaviráta (ojecastigáta).
3Umi mburuvicha ndoikói omongyhyje hag̃ua hembiapo porãvape, hembiapo vaívape uvei. Nderekyhyjeséipa umi mburuvichágui, aipórõ eiko hekópe ha ha’ekuéra ndeguerohorýta,
4ha’ekuéra ningo Ñanderuete rembijokuaikuéra iporã hag̃ua ndéve. Rejapo ramo katu pe ivaíva ekyhyje ichuguikuéra. Ndareíri oñeme’ẽ ichupekuéra pe kyse puku ipópe (péva he’ise ndejukakuaa). Ha’ekuéra oiko Ñanderuete rembijokuái ramo ombojovake ha ovenga hag̃ua umi hembiapo vaívape,
5upévare, ñaimembava’erã umi mburuvichakuéra poguýpe; ndaha’éi pe ñembojovakerã año rehe, ñande py’apyñe’ẽ rehe uvei.
6Upévare peme’ẽva’erã pende impuésto avei mburuvichakuérape, Ñanderuete voi ome’ẽgui ichupekuéra ko mburuvicha reko, (omba’apo hag̃ua hembijokuaikuéra ramo ko tembiapo kóvape).
7Upévare peme’ẽva’erã hekópe opavavépe umi mba’e peme’ẽva’erãva. Peme’ẽva’erã ramo impuésto, peme’ẽva’erã hekópe; pehepyme’ẽ (pepagava’erã) ramo pe aduanérope, pehepyme’ẽva’erã hekópe; peme’ẽva’erã ramo respéto, peme’ẽva’erã tova mokõi’ỹre; ha pemomba’eva’erã ramo, pemomba’eva’erã tova mokõi’ỹre.
8Ani pedeve mba’eve avavépe, pe mborayhu añómante peme’ẽ ojupe. Upe ohayhúva hapichápe ojapóma Moises rembiapoukapykuéra.
9Upéicharupi: Ani rembyai ne mendare, ani reporojuka, ani remonda, ani reipota ne mba’e’ỹva, ha opaite ambue Moises rembiapoukapykuéra oñembyaty ha oĩmba ko tembiapoukapy kóvape: Ehayhu nde rapichápe nde rejehayhu haichaite.
10Pe mborayhu añeteguáva ningo ndojapói mba’eve ivaíva hapicha rehe. Upévare upe ohayhúva hapichápe ojapopa Moises rembiapoukapykuéra.
11Jaikuaágui péva, ha og̃uahẽtahágui pe ára Hesu Crísto ou jevy hag̃ua, pepáykena pekehágui ha pejohayhu avei, ñande salvacionrã ko’ág̃a hi’ag̃uiveháre ñande jajerovia ypy ramoguarégui Hesu Crísto rehe.
12Iko’ẽmbátama, ha pe ára og̃uahẽmbotáma, upévare tekotevẽ jaheja pe tembiapo vai ha jajapyhy pe ñorãirõ rembiporu tesape rendy reheguáva.
13Ára peguáicha jaiko teko porãme ha ani jaiko ka’u ni karuguasúpe, ni teko ky’a térã jepokuaa vaípe, ani jaiko ñorãirõ ni mba’epota vaípe (envídiape).
14Upéva rãngue peñemonde Hesu Crísto mborayhúpe, ha peñeñangarekóke ani hag̃ua peñeme’ẽ jevy pende rete rembipota vaípe.
Who We AreWhat We EelieveWhat We Do
2025 by iamachristian.org,Inc All rights reserved.
