1Peiko mborayhu añeteguápe, ha peñeha’ã pehupity hag̃ua Pytu Porãmbáva me’ẽmbynguéra, ha ijapytépe pemotenonde pe ñe’ẽ profecía rehegua.
2Upe oñe’ẽva pe ñe’ẽ ha’e oikuaa’ỹva, noñe’ẽi hapichakuérape g̃uarã, Ñanderuetépe g̃uarãnte, avave ndoikuaái upe he’íva, pe Pytu Porãmbáva rupi oñe’ẽ mba’e ñemimbýva.
3Upe oñe’ẽva ñe’ẽ profecía rehegua katu oñe’ẽ omopu’ã hag̃ua kuimba’e ha kuñakuérape, omboheko porã ha omokyre’ỹ hag̃ua hapichakuérape.
4Upe oñe’ẽva ñe’ẽ ha’e oikuaa’ỹvape ijupénte oñemopu’ã; pe oñe’ẽva ñe’ẽ profecía rehegua omopu’ã iglesiayguakuérape.
5Che aipota peẽ peñe’ẽ ñe’ẽ peikuaa’ỹvape, ág̃a katu aipotave peñe’ẽ ñe’ẽ profecía rehegua; upe oñe’ẽva ñe’ẽ profecía rehegua mba’eguasuve upe oñe’ẽva ñe’ẽ oikuaa’ỹvagui. Oime ramo peteĩ omyesakãkuaáva peteĩ ñe’ẽ ha’e oikuaa’ỹva péva omopu’ã hag̃ua iglesiayguakuérape, péva ningo peteĩ mba’eporã avei.
6Upéicha ramo, che hermanokuéra, aha ramo pene rendápe ha añe’ẽ ramo ñe’ẽ aikuaa’ỹvape, mba’épa peẽ penohẽta chehegui (mba’eichagua provécho piko agueru peẽme). Iporãve che ambohasa peẽme ñe’ẽ ñemi (revelacion), térã ñe’ẽ arandu, térã ñe’ẽ profecía reheguáva, térã tekombo’e.
7Umi mba’epu hekove’ỹva jepe ipu, taha’e mimby, taha’e árpa, ha ndaipúi ambue ramo, mba’éichapa ojekuaáta oñembopuha mimby térã árpa.
8Pe trompéta (ojogua turúpe) ndaipúi porã ramo, mávapa oñembosako’íta oñorãirõ hag̃ua.
9Péicha avei peẽ, peñe’ẽ ramo ñe’ẽ peikuaa’ỹvape (iglésiape), mba’éichapa ojekuaáta upe pejéva. Peñe’ẽpeína yvytu reícha.
10Opaichagua tetã ñe’ẽ oĩ ko yvy apére, ha ipu rupi ojekuaa umi mba’e oñembohasáva.
11Ha che ndaikuaái ramo upe tetã ñe’ẽ he’íva, che aiko tetã ambueygua ramo ichupe g̃uarã, ha upe oñe’ẽva chéve g̃uarã oiko avei tetã ambueyguáva ramo.
12Upéicha avei peẽ peipotáva pe Pytu Porãmbáva me’ẽmby, peñeha’ã katupyrypópe pemopu’ã hag̃ua hekópe Hesu Crísto iglésiape.
13Upévarehe upe oñe’ẽva ñe’ẽ ha’e oikuaa’ỹvape, tojerure Ñanderuetépe oñeme’ẽ hag̃ua avei ichupe pe Pytu Porãmbáva me’ẽmby oikuaa hag̃ua mba’épa he’ise.
14Che añembo’érõ ñe’ẽ ojekuaa’ỹvape, che pytu porã oñembo’e; che apytu’ũ katu, nomba’apói.
15Mba’e piko aipórõ ajapova’erã. Añembo’éta che pytu porã reheve, ha añembo’éta avei che apytu’ũ reheve; apurahéita che pytu porã reheve, ha apurahéita avei che apytu’ũ reheve.
16Ne ñembo’épe remomba’eguasu ramo Ñanderuetépe nde pytu porãmante, mba’eichaitépa upérõ nde rapicha nerendúva ha ndoikuaáiva upe mba’e nde eréva, ikatu he’i: Amen (taupéicha).
17Ne ñembo’e agradecimiénto rehegua hekópe ramojepe, opáichavo nereipytyvõmo’ãi ne hermanokuérape ha’ekuéra okakuaave hag̃ua ijeroviápe, péva rupi ijerovia noñemopu’ãmo’ãi.
18Che agradece Ñanderuetépe che añembo’eve haguére pendehegui, ñe’ẽ ojekuaa’ỹvape.
19 Iglesiayguakuéra apytépe katu, che añe’ẽseve 5 ñe’ẽ che apytu’ũ reheve, che ambo’e hag̃ua ambuekuérape, che añe’ẽ rãngue 10.000 ñe’ẽ ojekuaa’ỹvape.
20Che hermanokuéra ani peñemomitã reko pene apytu’ũme (ani pepensa mitãicha), peñemomitã reko uvei teko vaípe g̃uarã, pembojovakepa hekópe tetãyguakuéra okakuaapa hag̃ua Pytu Porãmbáva poguýpe, (Romayguakuérape 12, 1-2).
21Ñanderuete kuatiañe’ẽme ojehai voi: Che añe’ẽta tetã ambueygua ñe’ẽ rupi Israel retãme, upeichavéramo nacheñe’ẽrendumo’ãi hikuái, he’iuka Ñanderuete, (Isaías 28,11-12).
22Upéicha umi ñe’ẽ ojekuaa’ỹva oiko peteĩ techaukaha ramo (señal ramo) umi Hesu Crístore ojerovia’ỹvape g̃uarã, ndaha’ei ojeroviávape g̃uarã, ha pe ñe’ẽ profecia rehegua oiko ojeroviávape g̃uara, ndaha’éi umi ojerovia’ỹvape g̃uarã.
23Upéicha iglesiayguakuéra oñembyaty ramo ha opavave oñe’ẽ ramo ñe’ẽ ojekuaa’ỹvape, ha oĩ ramo ojerovia’ỹva pende apytépe, nde’imo’ãi piko penderehe peẽ pendetarovapaha.
24Opavave oñe’ẽ ramo ñe’ẽ profecía rehegua, ha og̃uahẽ ramo pende apytépe peteĩ ojerovia’ỹva térã oikuaa’ỹva ko’ã mba’e ko’ãva, ha’e ohechakuaa ipy’apy jepy’amongeta rupi hembiapokue ivaiha,
25ha umi mba’e oñemíva jepe ipy’apýpe onohẽ hesakãháme, upémarõ ojeitýta hováre omomba’eguasu hag̃ua Ñanderuetépe, ha he’íta: Añete ningo, Ñanderuete oĩha pende apytépe.
26Che hermanokuéra mba’épa ikatu ñaguenohẽ ko’ã mba’e ko’ãvagui. Ko’ã mba’e ningo ha’ese: Peñembyaty ramo, oimeraẽva toguereko peteĩ sálmo (purahéi) térã peteĩ mbo’epy, térã tomombe’u peteĩ mba’e Ñanderuete ohechaukava’ekue ichupe (revelacion), térã toñe’ẽ ñe’ẽ ojekuaa’ỹvape oĩ guive peteĩ omyesakãkuaáva mba’épa he’ise ko ñe’ẽ ojekuaa’ỹva; opaite ko’ã mba’e ko’ãva peiporu pemopu’ã hag̃ua iglesiayguakuérape.
27Oime ramo oñe’ẽséva ñe’ẽ ojekuaa’ỹvape, toñe’ẽ mokõi térã mbohapy hermáno pevénte, toha’ãrõ katu hikuái pe tenondegua oñe’ẽmba peve, upéi pe mokõiha ha ipahápe pe mbohapyha toñe’ẽ; ha’ekuéra ikatúnte oñe’ẽ upe ñe’ẽ ojekuaa’ỹvape, oĩ ramo peteĩ hermáno omyesakãkuaáva upe ñe’ẽ ojekuaa’ỹva he’ise.
28Ha ndaipóri ramo ijapytépe peteĩ omyesakãkuaáva iñe’ẽnguéra, tokirirĩ hikuái. Toñe’ẽ hikuái ojupe g̃uarãnte, ha Ñanderuetépe g̃uarã.
29Upéicha avei umi proféta, toñe’ẽ mokõi térã mbohapýnte, ha ambuekuéra tojapysaka porã ohechakuaa hag̃ua hi’añetépa umi ñe’ẽ he’íva ouha Ñanderuetégui térãpa nahániri.
30Ha pe Pytu Porãmbáva ome’ẽ ramo peteĩme umi oguapýva apytégui peteĩ ñe’ẽ, tokirirĩ ambuekuéra.
31Opaite peẽ peprofetizáva, peñe’ẽ peteĩteĩ ojoapykuéri, opavavépe oñehekombo’e porã hag̃ua ha oiko porã hag̃ua.
32Umi proféta pytu porã oha’ãrõkuaa ambuekuéra oñe’ẽmba peve, ha’e ojejokokuaágui.
33Ñanderuete ndaha’éi peteĩ apañuãi Jára, peteĩ py’aguapy Jára uvei.
34Kuñakuéra tokirirĩ iglésiape, ndaijái ichupekuéra oñe’ẽ hag̃ua, taiñe’ẽrendu hikuái Ñanderuete kuatiañe’ẽ he’i háicha, (Génesis 3,16).
35Oimérõ peteĩ mba’e ha’ekuéra oikuaaséva toporandu hógape iménape, ñemotĩ ningo pe kuña oñe’ẽ ramo iglésiape.
36Pendehegui piko osẽra’e Ñanderuete ñe’ẽ, térãpa peẽme g̃uarã añónte oúra’e.
37Oime ramo he’íva ijehe iprofetaha térã pe Pytu Porãmbáva oisãmbyhyha ichupe, ohechakuaáta ko’ã ñe’ẽ che ahaiva’ekue peẽme Ñanderuete rembiapoukapyha.
38Ha ndohechakuaáirõ, (Ñanderuete) ndohechakuaái avei ichupe.
39Upévare, che hermanokuéra, peñeha’ã peprofetiza hag̃ua, ha ani pejoko umi oñe’ẽva ñe’ẽ ojekuaa’ỹva.
40Tojejapo opaite ko’ã mba’e hekópe ha hendag̃uáme.
Who We AreWhat We EelieveWhat We Do
2025 by iamachristian.org,Inc All rights reserved.
