2 Corintoyguakuérape 9 - Biblia en Guaraní - ?anderuete ?e’? Por? 2015

1Pe mborayhu rehegua temime’ẽ (ofrénda) oñeme’ẽtava rehe (Jerusalen) iglesiayguakuérape natekotevẽi che ahaive peẽme.

2Che aikuaa porã peẽ pendepy’aporãha ha che amombe’umava’ekue ñane hermanokuéra Macedoniayguápe, peẽ Greciaygua peñepyrũma, pe añokue guive, pembyaty pirapire, ha péva omokyre’ỹ hetavépe ombyaty hag̃ua avei.

3Upévare che amondo avei ñane hermanokuérape, ani hag̃ua che añe’ẽ porã rei penderehe, ha peẽ pembosako’ipa hag̃ua pe pirapire ojegueraha ramog̃uarã.

4Ani hag̃ua ohórõ chendive umi Macedoniaygua pendejohu ñembosako’i’ỹre gueteri, ha peñemotĩ peẽ ha ore avei penendive.

5Upévare hi’ã chéve tekotevẽ ha’e che hermanokuérape oho raẽ hag̃ua pene rendápe ombosako’iukapa hag̃ua pene mborayhu rehegua temime’ẽ che ag̃uahẽ mboyve, ha ojehecha hag̃ua peẽ pendepojeraha avei, napenerakate’ỹiha.

6Che ha’ese voi: Upe oñemitỹ michĩva, michĩ omono’õva’erã; ha upe oñemitỹ hetáva, heta omono’õva’erã.

7Peteĩteĩ tome’ẽ ipy’apýpe oipota háicha, anítei ome’ẽ ñembyasy reheve, ni ojejopýgui ichupe; Ñanderuete ohayhu upe ome’ẽva ipy’aporãgui ha vy’apópe.

8Ñanderuete ningo ipu’aka omboheta hag̃ua opaichagua temime’ẽ pende rekovépe, peẽ peguereko hag̃ua peikotevẽva guive ha peipytyvõkuaa hag̃ua pende rapichakuérape,

9upéicha ojehai avei Ñanderuete kuatiañe’ẽme: Ha’e omyasãi ha ome’ẽ mboriahúpe, imborayhu opytava’erãva tapia g̃uarã, (Salmokuéra 112,9).

10Ñanderuete voi ome’ẽ mba’e ra’ỹi upe oñemitỹsévape, ome’ẽ avei ichupe pan ho’u hag̃ua, ha omoheñói hetáta pende koga’a peẽ pembovy’a hag̃ua hetápe pene mborayhu rembiapo rupi.

11Peẽ peguerekóva heta mba’e ikatu peme’ẽ ambue hermanokuéra ohasa asývape, ha ko’ãva tomomba’eguasu Ñanderuetépe, ore rome’ẽ rire ichupekuéra pe pirapire peẽ pembyatyva’ekue.

12Ko pene rembiapo porã rupi oñeme’ẽtava ñane hermanokuéra ohasa asývape, oñemomba’eguasuvéta Ñanderuetépe, ñane hermanokuéra ojejopy vaíva oagradece ramo Ñanderuetépe iñembo’épe.

13Umi ñane hermanokuéra ojejopy vaíva, katuete oagradecéta Ñanderuetépe pene rembiapo porã rehe, pendepy’a porã ha peneñe’ẽrendu haguére Ñanderuete ñe’ẽme, pehayhúvo ha peipytyvõvo pene hermanokuéra ojejopy vaívape.

14Ha iñembo’ekuérape ohechaukáta hikuái penderayhuha ha penderecha nga’ueteha, oñandu porãgui Ñanderuete py’aporã oikóma pendepype.

15 Jagradece Ñanderuetépe opaichagua ime’ẽmby rehe.