Apostolkuéra 5 - Biblia en Guaraní - ?anderuete ?e’? Por? 2015

Ananías ha Safíra japu

1Peteĩ kuimba’e hérava Ananías ha hembireko Safíra ovende avei ijyvy.

2Ha’e omboyke katu ñemiháme pirapire hepykuégui imba’erã ramo ha pe pirapire hembýva ha’e omoĩ apostolkuéra py renondépe, oguerupárõ guáicha, ha hembireko oikuaapa voi avei péva.

3Pédro katu he’i ichupe: Ananías, mba’érehe piko Satana omyenyhẽ nde py’apy, ndejapu hag̃ua Pytu Porãmbávape ha reñomi pe yvy repykuégui.

4 Revende’ỹ rire ne mba’eva’erãmo’ã gueteri, ha revende rire opaite pe yvy repykue ne mba’e gueteri avei. Mba’épa ojehu nde remoĩ hag̃ua ko mba’evai kóva nde py’apýpe. Nde nandejapúi hermanokuérape, Ñanderuetépe uvei ndejapu.

5Ananías ohendúvo umi ñe’ẽ ho’a ha omano. Ha opavave ohendúva guive péva, okyhyjepa opytávo.

6Ha karia’ykuéra oñu’ã hetekue ha ogueraha ichupe oñotỹ hag̃ua.

7Ha mbohapy hóra rire rupi, hembireko ou avei apostolkuéra rendápe, ndoikuaái katu upe ojehuva’ekue.

8Upérõ Pédro oporandu ichupe: Eremi chéve, ko pirapire kóva piko opaite pende yvy repykue. Ha ha’e he’i: Héẽ, ore rome’ẽmbaite.

9Upémaramo Pédro he’i ichupe: Mba’érehe piko peñemoĩ peteĩ ñe’ẽme peipy’ara’ã hag̃ua Pytu Porãmbávape. Eikuaa porãke, umi karia’y oñotỹmava’ekue ne ménape oha’ãrõma pe okẽme neñotỹ hag̃ua avei ndéve.

10Upevovete ha’e ho’a Pédro py renondépe, ha omano avei. Ha umi karia’y oike ha ojohu ichupe omano hague avei, ogueraha ha oñotỹ hikuái ichupe iména ykére.

11Ha opaite iglesiaygua ha ambuekuéra ohendúva guive ko mba’e kóva okyhyjeiterei opytávo.

Oñemoĩ hikuái Pédro ha Juan rehe

12 Apostolkuéra po rupi oiko heta techaukaha ha milagrokuéra hetãyguakuéra apytépe, ha oĩmba hikuái py’a peteĩme Ñanderuete róga ykére, Salomon rogaguýpe.

13Heta Israelguakuéra oñemboyke ichuguikuéra, ambuekuéra katu ijapytepekuéra ohecha porã iglesiayguakuérape.

14Ha umi ojeroviáva Hesu Crísto rehe oñembohetave ohóvo, kuimba’e ha kuñakuéra.

15Ha ojegueraha umi hasývape Jerusalen cálle rupi hupa ha ikyhápe, ág̃a Pédro ohasávo, ikuarahy’ãngue jepe ho’a hag̃ua hasyvakuéra ári.

16Umi táva oĩva Jerusalen jerekuévogui ogueru hikuái Jerusalénpe avei heta hasýva ha oikóva mba’epochy poguýpe, ha oñemonguerapa hikuái.

17Pe pa’iguasu ha opaite saduceokuéra hendive oĩva henyhẽmba hikuái ipy’arasýgui (envídiagui);

18ha oapresa hikuái Pédro ha Juánpe ha omoinge ichupekuéra cárcelpe.

19Pe pyharépe Ñanderuete ángel katu oipe’a pe cárcel rokẽ, oguenohẽ ichupekuéra okápe ha he’i:

20Tapeho Ñanderuete rogaguasúpe ha pemombe’u opavavépe Hesu Crísto evangélio, pe tekove rape rehegua.

21Ohendúvo péva, oike hikuái ko’ẽjúvo Ñanderuete rogaguasúpe oporombo’e hag̃ua. Pe ko’ẽ pévape oñembyaty avei pa’iguasu, saduceokuéra hendive oĩva ha opaite 71 karai ancianokuéra, omoakãva avei Judayguakuérape, ha ohenoiuka Pédro ha Juánpe cárcelgui.

22Ha umi tahachi oho cárcelpe, ndojohúi katu ichupekuéra, ha ojevy omombe’u hag̃ua pa’iguasúpe.

23Ha umi tahachi he’i: Ore rojohu oñemboty porã pe cárcel, ha umi oñangarekóva pe cárcel rehe oñembo’y hokẽ renondépe, roipe’ávo katu pe okẽ ndorojohúi avavépe hyepýpe.

24Pe Ñanderuete rogaguasu tahachi ruvicha ha umi pa’i ruvicha ohendúvo péva ipy’andyiete, ha ndoikuaái mba’épa kóva he’ise, ni mba’épa ojapova’erã hikuái.

25Upevove peteĩ kuimba’e ou hendápe ha he’i ichupekuéra: Umi kuimba’e peẽ pemoingeva’ekue cárcelpe oĩ jevýma Ñanderuete rogaguasúpe, oñembo’y ha oporombo’e jevymahína.

26Upérõ oho pe tahachi ruvicha hembiguaikuéra ndive ogueru hag̃ua ichupekuéra oñembosarai’ỹre hesekuéra, okyhyjégui hetãyguakuéragui ojukarõ g̃uarã ichupekuéra ita jejapípe.

27Ogueru ha omoinge hikuái umi mburuvichakuéra apytépe, ha pe pa’iguasu oporandu ichupekuéra,

28ha he’i: Ndoro’e porãi piko peẽme anive hag̃ua peporombo’e pe téra péva rehe. Ha péina pemyenyhẽmba Jerusalen pene mbo’epýgui, ha peityse ore ári pe kuimba’e péva ruguy.

29Upémaramo Pédro ha ambue apostolkuéra he’i ichupekuéra: Oreñe’ẽrenduveva’erã Ñanderuetépe kuimba’ekuéragui.

30Ore rukuéra Jára, Ñanderuete, ningo omoingove jevy Hesúpe, peẽ pemosãingova’ekue kurusúre omano hag̃ua.

31Ko Hesu kóvape Ñanderuete omboguapy ijakatúape Tetã ruvichaguasu ha tetãyguakuéra Salvador ramo, Israel ojevy hag̃ua Ñanderuete rendápe ha oñeperdona hag̃ua ichupekuéra.

32Ore ningo umi mba’e rechahare ha pe Pytu Porãmbáva avei, Ñanderuete ome’ẽva umi iñe’ẽrendúvape.

33Ha’ekuéra ohendúvo umi mba’e, ipochyeterei ha ojukase ichupekuéra.

34Upérõ peteĩ fariséo hérava Gamaliel oñembo’y ijapytépe, ha’e peteĩ mbo’ehára hetãyguakuéra omomba’éva, ha’e oguenohẽuka sapy’ami umi apóstolpe,

35ha he’i ichupekuéra: Peẽ Israelgua, pema’ẽ porãke pejapótava rehe ko’ã kuimba’ére.

36Ko’ã ára mboyve ningo opu’ãva’ekue Téudas, peteĩ kuimba’e oñemomba’eguasúva, ha ombyaty hendive 400 kuimba’e, ha ojejuka rire katu ichupe opaite iñirũnguéra oñemosarambipa, ha pe apañuãi opa reiva’ekue.

37Ha’e rire ningo opu’ã Júdas, peteĩ Galileaygua, umi cénso árape, ha heta tetãygua omoirũ ichupe. Ha’e omano avei ha iñirũnguéra oñemosarambipa jevy.

38Ha ama’ẽvo umi mba’e ojehuva’ekue rehe che ha’e peẽme: Pepoi katu ko’ã kuimba’e ko’ãvagui ha ani pejapo mba’evai hesekuéra. Kuimba’e rembiapo ramo ha’ekuéra ojapovahína opa reiva’erã katuete,

39Ñanderuete rembiapo ramo katu, peẽ ndaikatúi pembyai ha anítei pejejohu peñemoĩha Ñanderuete rehe.

40Ha oñemoĩ hikuái peteĩ ñe’ẽme hendive, ha ohenói jevy rire apostolkuérape, oinupã ichupekuéra ha oavisa porã hikuái anive hag̃ua oñe’ẽ Hesu réra rehe, ha opoi ichuguikuéra.

41Umi apóstol katu osẽ vy’apópe imburuvichakuéra rendágui, ija haguére ichupekuéra ohasa asy Hesu Crísto réra rehehápe.

42Ha opaite árape oporombo’e ha omombe’u hikuái Hesu Crísto evangélio Ñanderuete rogaguasúpe ha hetãyguakuéra róga rupi avei.