1Ñanderuete oñe’ẽ Moiséspe, ha he’i:
2Eñe’ẽ Israel ñemoñarenguérape ha ere ichupekuéra: Oime ramo peteĩ kuimba’e ome’ẽséva iñe’ẽ (ipromésa, ivóto) rupi pende Ruetépe g̃uarã peteĩ hapicha rehe, ko hapicha repy ovaléta peteĩ tembiguái rei (esclávo) repy.
3Umi kuimba’e oguerekóva 20 áño guive 60 peve ovaléta 558 grámo pláta (óro morotĩ),
4ha oime ramo kuña, ovaléta 335 grámo pláta,
5ha oime ramo oguerekóva 6 áño guive 20 áño peve pe mitãkuimba’e térã pe karia’y ovaléta 223 grámo, ha mitãkuñáme 115,5 grámo pláta.
6Ha oime ramo oguerekóva peteĩ jasy guive 5 áño peve, ovaléta 55,8 grámo mitãkuimba’épe g̃uarã ha mitãkuñáme 33,5 grámo pláta.
7Ha oguereko ramo 60 áño térã hetave ramo, pe kuimba’e ovaléta 167 grámo, ha pe kuña 112 grámo.
8Ha oime ramo ha’e imboriahueterei ome’ẽmba hag̃ua, upéicharamo ojegueraháta ichupe pa’i rendápe, ha ha’e omoĩta ichupe mboýpa ome’ẽta, pe imboriahúva ipu’aka hag̃uáicha.
9Ha ome’ẽse ramo ipromésa rupi pende Ruetépe peteĩ tymba ipotĩva, péva oñeme’ẽta pa’ípe oikuave’ẽ hag̃ua oñemboykégui pende Ruetépe g̃uarã.
10Noñemyengoviaiva’erã mba’eve rehe ha mba’eveichagua rehe, ni iporãva ivaíva rehe, térã ivaíva iporãva rehe noñemoĩriva’erã; ha peteĩ tymba oñemyengovia ramo ambue rehe, péva ha upe oñeme’ẽva hekovia rehe oñemboykéta pende Ruetépe g̃uarã.
11Ha oime ramo tymba ipotĩ’ỹva, ndikatúiva oñekuave’ẽ pende Ruetépe, upéicharamo upe tymba oñemoĩva’erã pa’i renondépe,
12ha pe pa’i he’íta ichupe mboýpa hepyrã, taiporã térã taivai, pe pa’i omoĩ háicha hepy, upeichaite opytava’erã.
13Ha oguenohẽse jevy ramo pirapire rehe, pe tymba repy ári oñeme’ẽveva’erã 20 por ciénto.
14Ha peteĩ óga jára opromete ramo me’ẽmby ramo hóga pende Ruetépe g̃uarã, pe pa’i omoĩva’erã mboýpa hepyrã, taiporã térã taivai, pe pa’i omoĩ háicha hepy, upeichaite opytava’erã.
15Ha pe oprometemava’ekue hóga, ha oguenohẽse jevy ramo pirapire rehe, ome’ẽveva’erã pa’ípe 20 por ciénto opyta jevy hag̃ua ichupe imba’etee ramo.
16Oime ramo ome’ẽséva ijyvy pehẽngue pende Ruetépe, pe pa’i omoĩta pe yvy pehẽngue repy oñeñotỹkuaa háicha: 220 lítro cebáda ombohepýta 558 grámo óro morotĩ.
17Ha ome’ẽ ramo ijyvy pehẽngue pe perdon áñope ha’e opagapava’erã pe yvy repy, ndojepe’amo’ãi mba’eve, ojeporukuaágui 49 áño pukukue.
18Ha oime ramo pe perdon áño rire ome’ẽma ijyvy, upéicharamo pe pa’i oipapáta umi áño hemby háicha gueteri og̃uahẽ jevy peve pe perdon áño pyahu ha pe hepy oñemombovyveva’erã.
19Ha pe yvy jarakue oguenohẽse jevy ramo ijyvykue pirapire rehe tome’ẽve 20 por ciénto ohupity háicha ijyvy, ha opyta jevýta ichupe g̃uarã imba’etee ramo.
20Ha ha’e noguenohẽséi jevy ramo térã oñevende ramo ambue tapichápe, upéicharamo ha’e noguenohẽkuaavéima pirapire rehe;
21upe yvy oñemboykéta pende Ruetépe g̃uarã, opytáta pa’i mba’e ramo.
22Ha oimeraẽ ome’ẽva pende Ruetépe pe yvy ojoguava’ekue, ha ndaha’éiva itúva mba’ekue,
23upéicharamo pe pa’i ohecháta hendive mboy áñopa hembýta gueteri perdon áño peve, ha pe pa’i he’iva’erã pe yvy repy, ha upéi ha’e ome’ẽmbáta pa’ípe pepláta pe ára pévape, kóva ningo mba’e oñemboykemava’ekue pende Ruetépe g̃uarã.
24Pe perdon áñope katu pe yvy opyta jevýta ijarakueteépe, péva itúva lotekue voígui.
25Ha opaite mba’erepy ojepapava’erã pe óga jojohuha pegua pohyikue (medída); ipirapire pehẽngue pohyikue síclo ojeporúva pende Ruete rógape oha’ãva 18,4 grámo.
26Opaite tymba ra’y ypykue pende Ruete mba’e, avave ndikatúi ome’ẽ umía pende Ruetépe ipromésa ramo, taha’e tóro, térã ovecha, térã kavara ra’y, péva pende Ruete mba’énte voi.
27Ha oime ramo umi tymba ipotĩ’ỹva rehegua, oguenohẽkuaa pirapire rehe, pe pa’i omoĩ háicha hepyrã ichupe, ijarakue omoĩveva’erã katu 20 por ciénto ha ha’e noñerenohẽi jevy ramo ipirapire rehe, toñeme’ẽ pe tymba ipotĩ’ỹva hepy rehe, pe pa’i he’i háicha.
28Mba’eveichagua mba’e oñemboykéma pende Ruetépe g̃uarã taha’e kuimba’e térã kuña, térã tymba potĩva, térã yvy pehẽngue, ndikatuvéima oñeme’ẽ térã oñerenohẽ jevy pirapire rehe; oñemboykégui pende Ruetépe g̃uarã, imba’eteéva ramo.
29Opaichagua tapicha oñemboykéva mba’evai apoha ramo, ndaikatúi ojejogua pirapire rehe; katuete ojejukava’erã.
30Opaite pende kóga ra’ỹigui ha pende yvyra’águi peme’ẽva’erã pende Ruetépe cáda 10 voságui peteĩ vosa (diézmo).
31Ha oimeraẽva oguenohẽséva pirapire rehe pe diézmo, ome’ẽveva’erã 20 por ciénto pe me’ẽmby repy ári.
32Ha opaite ne rymba vaka, ovecha térã kavara reipapava’erã, ha reme’ẽta cáda 10 tymbágui peteĩ tymba pende Ruetépe g̃uarã (idiézmo ramo).
33Ndereiporavoiva’erã iporã térã ivaíva, ni neremyengoviaiva’erã, ha peteĩ omyengovia ramo, upéva ha pe oñeme’ẽva hekovia, mokõivéva mba’e opytáta pende Ruete mba’e; ndaikatumo’ãi oñerenohẽ pirapire rehe.
34Ko’ãva hína umi tembiapoukapy pende Ruete he’iva’ekue Moiséspe Sinai cérrope, Israel ñemoñarenguérape ojapopa hag̃ua.
Who We AreWhat We EelieveWhat We Do
2025 by iamachristian.org,Inc All rights reserved.
