Jeremías 42 - Biblia en Guaraní - ?anderuete ?e’? Por? 2015

Ñe’ẽ oúva Johanánpe

1Umi soldádo ruvicha ha Johanan, Carea ra’y; Jaazanías, Osaías ra’y ha tetãyguakuéra, pe michĩvéva guive pe tuichavéva peve, ou hikuái,

2pe proféta Jeremías rendápe ha he’i ichupe: Ejapysakamína, ore rojerure asy ndéve ha eporandumína orerehe Ñanderuete, nde Járape, ore, hetaite apytégui, mbovymi oreremby, nde resa ohecha háicha ko’ág̃a.

3Ñanderuete, Ñandejára, ta’orembo’e ha tohechauka oréve ore raperã ha ore rembiaporã.

4Ha Jeremías he’i ichupekuéra: Iporã ningo. Che añembo’éta Ñanderuete, Ñandejárape, peje haguéicha, ha opaite mba’e Ñanderuete he’iukáva guive peẽme, che nañomimo’ãi mba’evete pendehegui.

5Ha he’i hikuái Jeremíaspe: Ñanderuete toiko techahare añetegua ha hekopeguáva ramo ore apytépe, ndorojapói ramo opaite mba’e Ñanderuete, nde Jára, he’íva guive nde juru rupi oréve g̃uarã.

6Ta’ivai térã ta’iporã, Ñanderuete, Ñandejára rendápe ore voi romondova’ekue, iñe’ẽ rojapose; ore roiko hag̃ua py’aguapýpe rojapose Ñanderuete ñe’ẽ.

7Ha ohasa rire 10 ára pukukue ou Ñanderuete ñe’ẽ Jeremíaspe.

8Ha Jeremías ohenói Johanan, Carea ra’ýpe, ha ambue soldádo ruvichápe hendive oĩva, ha mayma tetãyguápe, pe michĩvéva guive pe tuichavéva peve,

9ha he’i ichupekuéra: Péicha he’i Ñanderuete, Israel Jára, máva rendápe peẽ chemondova’ekue amba’ejerure hag̃ua penderehe:

10Pepytáta ramo ko yvy kóvape, Che pomopu’ãta ha napohundimo’ãi; Che poñotỹta ha napomondoromo’ãi; Che ambyasýgui pe mba’evai ajapova’ekue penderehe.

11Ani pekyhyje Babilónia retã ruvichágui, pekyhyjéva gueteripéina, ani pekyhyjeve ichugui, he’i pende Ruete, Che aĩgui penendive posalva hag̃ua ipokuéragui.

12Ha Che poiporiahuverekóta ha ha’e avei pendeporiahuverekóta ha penembou jevýta pende yvyteépe.

13Ha peje ramo: Ndoroikomo’ãi ko yvy kóvape, ha peẽ napeneñe’ẽrendúi ramo Ñanderuete, pende Járape,

14pejégui: Nahániri, roikétante Egípto retãme, upépe ndorohechamo’ãvéi ñorãirõ, norohendumo’ãvéi avei ñorãirõ turu pu ni naoreñembyahyimo’ãvéi, upépente roikose.

15Upéicharamo, pehendu porãke pende Ruete ñe’ẽ, peẽ Judaygua rembyremíva: Péicha he’i Yvága Atykuéra Jára, Israel Jára: Peẽ pembojere ramo pende rova peike hag̃ua Egíptope, ha peho ramo peiko hag̃ua upépe,

16pe kyse pukúgui pekyhyjévagui penderupitýta Egípto retãme, ha pe ñembyahýi pekyhyjévagui penderupitýta avei Egípto retãme ha upépe pemanombáta.

17Mayma kuimba’e oikéva guive Egíptope oiko hag̃ua upépe, omanova’erã kyse pukúpe, ñembyahýi térã mba’asy iñasãiva rupi, ijapyteguikuéra avave nahembymo’ãi, ha avave nokañymo’ãi pe mba’evaígui Che aguerútava hi’arikuéra.

18Péicha he’i Yvága Atykuéra Jára, Israel Jára: Añohẽ haguéicha che pochy Jerusalengua ári, péicha avei añohẽta che pochy pendeári peikéta ramo Egípto retãme; ha peikóta maldicion ha ñemongyhyje poguýpe, pejeja’óta ha oñembohorýta penderehe ha ndapehechamo’ãvéima ko yvy kóva.

19Péicha Ñanderuete oñe’ẽ Judayguakuéra hembymívape Jeremías juru rupi, ha oñe’ẽ porã ichupekuéra ani hag̃ua oho Egípto retãme.

20Mba’upépa pembotavyse pene ángape. Peẽ ningo chemondo Ñanderuete, pende Jára rendápe, pejévo: Eñembo’e orerehe Ñanderuete, Ñandejárape, ha eikuaauka oréve opaite mba’e Ñanderuete, Ñandejára, he’íva guive ore rojapose hekoitépe.

21Che amombe’u porãmbáma peẽme ko ára kóvape, peẽ katu ndapejaposéi Ñanderuete, pende Jára rembipota, peje ramo jepe peẽ pejapopataha.

22Peikuaa porã katu, kyse puku, ñembyahýi térã mba’asy iñasãiva rupi pemanova’erã Egípto retãme.