Levítico 1 - Biblia en Guaraní - ?anderuete ?e’? Por? 2015

Moises kuatiañe’ẽ mbohapyha Tembiapoukapykuéra Leviguakuérape g̃uarã

1Ñanderuete ohenói Moiséspe ha oñe’ẽ hendive, pe óga jojohuhápe, ha he’i ichupe:

2Eñe’ẽ Israel ñemoñarenguérape ha ere ichupekuéra: Oimeraẽva pende apytégui ome’ẽséva kuave’ẽmby pende Ruetépe toikuave’ẽ hymba tóro, ijovecha térã ikavara.

3Peikuave’ẽse ramo kuave’ẽmby ojehapypáva peiporavova’erã peteĩ tóro iporãitéva, ijeheguieténte toikuave’ẽ pe óga jojohuha rokẽme, pende Ruete renondépe pehupity hag̃ua perdon.

4Upe oikuave’ẽva omoĩ mbareteva’erã ipo hymba oñekuave’ẽtava akã ári, ha pe tymba jára ohupitýta ikuave’ẽmby rupi perdon hembiapo vaikuére.

5Upéi ha’e oajúra kytĩta pe tóro ra’yrusu pende Ruete renondépe; ha umi pa’i, Aaron ra’ykuéra, oikuave’ẽva’erã huguy ohypýivo kuave’ẽmby renda tápia jerekuévo, oĩva óga jojohuha rokẽ renondépe.

6Upe oikuave’ẽva oipiróta hymba kuave’ẽmby ha oipehẽ’ata.

7Upéi Aaron ra’ykuéra ojatapýta pe jepe’a omoĩmava’ekue kuave’ẽmbyrenda ári.

8Upérõ umi pa’i, Aaron ra’ykuéra, omohendapáta umi pehẽngue, iñakãngue ha ikyrakue hyepy peguare pe tata ári, oĩva kuave’ẽmby rendápe;

9ha’ekuéra ojoheiva’erã ýpe hyekue ha hetymakuéra, ha pe pa’i ohapypava’erã pe kuave’ẽmby renda ári, kuave’ẽmby ojehapypáva ramo, koichagua kuave’ẽmby hendýva hyakuã asy pende Ruetépe g̃uarã.

10Kuave’ẽmby ojehapypávape g̃uarã ojeporavokuaa avei ovecha térã kavara mácho iporãva hymba atýgui.

11Upe oikuave’ẽva oajúra kytĩva’erã pe kuave’ẽmby renda yke nórte gotýo, pende Ruete renondépe; ha umi pa’i, Aaron ra’ykuéra, ohypyiva’erã huguykue pe kuave’ẽmby renda tápia jerekuévo.

12Omboja’opava’erã ipehẽngue, iñakãngue ha hyekue kyrakue ha pe pa’i omohenda porãmba rire omyendyva’erã pe jepe’a, oĩva pe kuave’ẽmby renda ári;

13ha ojoheiva’erã ýpe hyekue ha hetymanguéra; pe pa’i oikuave’ẽmbava’erãva omyendýta pe kuave’ẽmby renda ári; kuave’…mby ojehapyvahína péva, peichagua kuave’ẽmby hendýva hyakuã asy pende Ruetépe g̃uarã.

14Pe kuave’ẽmby ojehapýva pende Ruetépe g̃uarã ojeguerukuaa avei jeruti térã pykasu ra’y, guyrakuéra apytégui.

15Umía pe pa’i oikuave’ẽva’erã kuave’ẽmby renda ári, ha’e oñakã’o rire, oñamiva’erã huguykue pe kuave’ẽmby renda tápia jerekuévo ha ohapýta pe guyra pe kuave’ẽmby renda ári.

16Ohague’o ha oju’ai’ova’erã oity hag̃ua pe kuave’ẽmby renda py ykére kuarahyresẽ gotýo, tanimbu rendápe.

17Pe pa’i oipysova’erã ipepokuéragui, nomboja’omo’ãi katu mbyte rupi; upéi ohapýta pe kuave’ẽmby renda ári, kuave’ẽmby ojehapýva ha hendýva hyakuã asy pende Ruetépe g̃uarã.