Eclesiástes 2 - Biblia en Guaraní - ?anderuete ?e’? Por? 2015

1Ha che ha’e che py’apýpe: Tereho ha eheka pe vy’a, ha reguerekóta heta mba’eporã. Ha péina ápe ko’ã mba’e ko’ãva opa rei jevy.

2Pe puka rehe che ha’e itavyha ha pe vy’a mba’e piko oguerúne.

3Amoĩ che py’apýpe ambovy’a hag̃ua che rete vínope, ahundi’ỹre katu che akãporã, ahechakuaa hag̃ua pe tavy reko, ha aikuaa hag̃ua mba’épa iporãve yvyarigua ra’ykuérape g̃uarã; ojapo hag̃ua oikove aja pukukue ko yvy apére.

4Che ajapo tembiapo tuicháva: Amopu’ã che rogaguasu, añotỹ che parralty,

5añemboka’avoty ha yvotyty, ha añotỹ ipype opaichagua yvyra hi’áva,

6ajapo ypa (lágo) amyakỹ hag̃ua ipype umi yvyra okakuaavahína,

7ajogua tembiguái kuimba’e ha kuñávape, ha aguereko tembiguái onacéva che rógape ha avei aguereko heta vaka ha ovechakuéra, hetaiteve che rapicha che mboyve guarégui Jerusalénpe.

8Ambyaty mbyaty avei pláta ha óro, ha mba’erepyeta tetã ruvicha ha tetãnguéra mba’ekue, ha aguerekókuri kuimba’e ha kuña opurahéiva, ha yvyarigua ra’ykuérape ombohorýva guive ahupitypa, ha chekuña hetaite.

9Ha añembotuichaitevékuri ha añembohetaitevékuri umi che mboyve oikova’ekuégui Jerusalénpe; ha ã mba’e ári, ndojeíri chehegui che arandu.

10Nambotovéi che resakuéragui mba’eve oipotáva guive, ha namboykéi che py’apýgui mba’eveichagua vy’a, che py’apy ovy’águi opaite che rembiapokue rehe; ha péva ningo che rembiapoita repykue.

11Ha upéi ama’ẽ porã opaite mba’e che po ojapova’ekue rehe ha che rembiapokue rehe; ha péina ápe, mba’e reiete ha ojejoko reírõ guáicha yvytúre, ha naiporãi mba’everã ko yvy apére.

12Upéi ajere ama’ẽ hag̃ua pe arandu, akã vai reko, ha tavy reko rehe; ha mba’épa ikatúta ojapove che rapicha oúva tetã ruvicha ramo cherire. Mba’eve, upe ojejapomava’ekuémante.

13Ha ahechákuri pe arandu ituichaveha tavy rekógui, ituichave háicha tesakã ypytũgui.

14Pe iñarandúva oguereko hesa iñakã rehe, ha itavy rekóva katu oiko pytũnguýpe; ha ahechakuaa avei peteĩ mba’énte ojehuva’erãha mokõivévape.

15Upémaramo ha’ékuri che py’apýpe: Umi mba’e ojehútava itavýva rekovépe, chéve ojehúta avei. Upémaramo ha’e mba’upéiko amba’apoiterei ko’ág̃a peve añemoaranduve hag̃ua. Upéi che ha’ékuri che py’apýpe, ko’ã mba’e, mba’e reiete avei.

16Pe iñarandúva ni itavy rekóva rehe ndaiporimo’ãigui mandu’a opaite ára peve g̃uarã; opaite onacéva guive tesaráipe ho’apa jevyva’erã, ha pe iñarandúva omanóta avei omano háicha pe ivýrova.

17Upéicha rupi chembojeguaru pe tekove, ipohyietereígui chéve pe tembiapo ojejapóva ko yvy apére; opaite mba’e reiete ha yvytu jejokose rei.

18Ha ajeguaru avei opaite che rembiapo ajapova’ekuégui ko yvy apére, ahejapava’erãgui che rapichakuérape, che rire ouva’erãvape.

19Ha máva piko oikuaáta iñarandutaha térãpa nahániri, upe oñembojáratava che rembiapokue rehe che ry’aikue reheve amopu’ãva’ekue, ha ajohu ko’ã mba’e ko’ãva reiete jevyva’erãha avei.

20Ha che py’a tarovaite jevy che rembiapokueita rehe ajapova’ekue arandupópe ko yvy apére.

21Og̃uahẽva’erã pe ára, peteĩ yvyarigua omba’apova’ekue arandupópe, akãguapýpe ha oñeha’ã porãmbava’ekue ome’ẽva’erãha hapichápe ikokue, peteĩ omba’apo’ỹva’ekuépe hese. Mba’e rei avei ko’ã mba’e ha mba’e porã ndetuicháva.

22Ha mba’épa pe yvyarigua oguenohẽ hembiapokueitágui ha ojepy’amongeta kane’õgui ko yvy apére.

23Ohasa asy meme ramo oikove aja, ñeko’õime meme hembiapokuéra; ha iñapytu’ũ ndopytu’úi pyharekue jepeve, mba’e rei avei ko’ã mba’e.

24Ndaipóri iporãvéva yvyariguápe g̃uarã pe jekaru ha ñemboy’u, ha vy’apópe oiporu hembiapo repykue, ahecha porã katu ko’ã mba’e ouha avei Ñanderuete pógui.

25Ha mávapa ikatu okaru porã, ha ovy’a Ñanderuete’ỹre.

26Ñanderuete ome’ẽ arandu, akãguapy ha vy’a, Ha’e oguerohorývape; ha upe hembiapo vaívape katu ome’ẽ pe tembiapo omono’õ ha ombyaty hag̃ua, upéi ome’ẽva’erã Ha’e oguerohorývape, ko’ãva mba’e rei avei ha yvytu jejoko reise.