2 Crónicas 29 - Biblia en Guaraní - ?anderuete ?e’? Por? 2015

Ezequías oiko tetã ruvicha ramo

1Ezequías oñepyrũvo oisãmbyhy oguereko 25 áño, ha oisãmbyhy 29 áño Jerusalénpe. Isy réra Abía, Zacarías rajy.

2Ha’e ojapo mba’e iporãva Ñanderuete resa renondépe, ijypykue David ojapo haguéicha.

Ezequías omoñepyrũ jevy pe ñemomba’eguasu Ñanderuete rogaguasúpe

3Ezequías oñepyrũvo oisãmbyhy pe jasy peteĩháme, pe áño pévape oipe’auka jevy Ñanderuete rogaguasu rokẽnguéra ha omyatyrõmba jey.

4Ha ohenoiuka pa’ikuéra ha Leviguakuérape, oñembyaty hag̃ua Ñanderuete róga korapýpe, kuarahyresẽ gotyoguápe.

5Ha he’i ichupekuéra: Peẽ Leviguakuéra cherendúke: Peñemboheko potĩ ko’ág̃a, ha pemopotĩ Ñanderuete, pende rukuéra Jára rogaguasu, ha peipe’a opaite mba’e ky’a.

6Ñande rukuéra oñemoĩ Ñanderuete rehe, ha ojapo ivaíva hesa renondépe; opoi ichugui, ha omboyke hovakuéra Ñanderuete rogaguasúgui ha ome’ẽ ichupe ijatukupe.

7Ha omboty hikuái hogaguasu rokẽ, ombogue hikuái pe tataindyenda, ndohapyvéi mba’e ryakuã porã, ha ndoikuave’ẽvéi kuave’ẽmby ojehapypáva Israel Jára kuave’ẽmby renda ári.

8Upévagui Ñanderuete ipochy Juda ha Jerusalen ndive, ha omyangekõi ichupekuéra ha omotĩ ichupekuéra, peẽ pehecha háicha pende resatee rupi.

9Ha péina ápe ñande rukuéra ho’a hikuái kyse puku rãimbépe, ha upévagui ojegueraha jepokuapýpe ñande ra’y, ñande rajy ha ñane rembirekokuéra.

10Ko’ág̃a che añembopy’apeteĩta Ñanderuete, Israel Jára ndive, Ha’e omboyke hag̃ua ñandehegui ipochy.

11Che ra’ykuéra ani peñembotavýtei ko’ág̃a, Ñanderuete ningo pendeporavo peime hag̃ua henondépe ha pemomba’eguasu hag̃ua ichupe, ha peiko hag̃ua hembiguái ramo, ha pehapy hag̃ua ichupe mba’e ryakuã porã.

12Upémaramo opu’ã umi Levigua Máhat, Amasai ra’y, ha Joel, Azarías ra’y, Coat ñemoñaréva apytégui; ha Merari ñemoñarévagui, Cis, Abdi ra’y, ha Azarías, Jehalelel ra’y; Gerson ñemoñarévagui, Joa, Zima ra’y, ha Eden, Joa ra’y;

13Elizafan ñemoñarégui, Simri ha Jeiel; Asaf ñemoñarégui, Zacarías ha Matanías;

14Heman ñemoñarégui, Jehiel ha Simei; ha Jedutun ñemoñarégui, Semaías ha Uziel;

15ko’ãva ombyaty ipehẽnguekuérape, oñemboheko potĩ hag̃ua, ha oike hikuái omopotĩ hag̃ua Ñanderuete rogaguasu.

16Upérõ pa’ikuéra oike Ñanderuete rogaguasúpe omopotĩ hag̃ua, oguenohẽmbaite umi mba’e ky’a ojohúva guive ipype, ha omoĩ Ñanderuete rogakorapýpe; ha umia Levigua ogueraha Cedron ysyry rembe’ýpe.

17Oñepyrũ omopotĩ hikuái pe ára peteĩháme, pe jasy peteĩháme, pe ára 8-hápe og̃uahẽ hikuái Ñanderuete rogaguyguasúpe; 8 ára oiporuve omyatyrõmba hag̃ua Ñanderuete rogaguasu, ha pe ára 16-hápe, pe jasy peteĩháme ojapopa hikuái hembiapo.

18Upéramo ou hikuái tetã ruvicha Ezequías rendápe ha he’i ichupe hikuái: Romopotĩmbaitéma Ñanderuete rogaguasu, pe kuave’ẽmby renda, opaite hembiporukuéra, pe mesa ojehechauka hag̃ua pankuéra hembiporukuéra reheve.

19Upéicha rombosako’ipa ha romopotĩ avei umi tembiporu, ndojeroviáigui oñemboykeva’ekue tetã ruvicha Acaz oisãmbyhy ramoguare; ha péina oĩmba Ñanderuete kuave’ẽmby renda renondépe.

20Ha opu’ãvo pyhareve, tetã ruvicha Ezequías ombyatyuka umi táva ruvichakuérape ha ojupi Ñanderuete rogaguasúpe.

21Ha ogueru hikuái 7 tóro ra’yrusu, 7 ovecha mácho, 7 ovecha ra’yrusu ha 7 kavara mácho kuave’ẽmby angaipa reheguáva ramo, tetã ruvicha rehe, Ñanderuete rogaguasu rehe ha Judayguakuéra rehe. Ha he’i umi pa’i Aaron ñemoñarenguérape oikuave’ẽ hag̃ua Ñanderuete kuave’ẽmby renda ári.

22Upérõ ha’ekuéra oikuave’ẽ umi tóro ra’yrusu, ha pa’ikuéra ojapyhy huguykue omosarambi hag̃ua pe kuave’ẽmby renda ári; upéi oikuave’ẽ avei ovecha machokuéra, ha ohypýi avei huguykue pe kuave’ẽmby renda ári; upeichaite avei ojuka hikuái umi ovecha ra’yrusu, ohypýivo huguykue kuave’ẽmby renda ári.

23Upéi ha’ekuéra omoag̃uiuka, tetã ruvicha ha umi ijatýva renondépe, umi kavara mácho angaipa reheguáva, ha omoĩ hikuái hi’arikuéra ipo;

24ha umi pa’i oikuave’ẽ umívape, ha huguykue omoĩ kuave’ẽmby angaipa reheguáva ramo pe kuave’ẽmby renda ári ohupity jevy hag̃ua opaite Israelguakuérape g̃uarã Ñanderuete perdon; tetã ruvicha ojapoukágui opaite Israelgua rehe kuave’ẽmby ojehapypáva ha angaipa reheguáva avei.

25Ezequías omohenda avei Leviguakuérape Ñanderuete rogaguasúpe platíllo, mbaraka ha árpa reheve, David he’i haguéicha, ha Gad, tetã ruvicha proféta he’i haguéicha, ha pe proféta Natan he’i haguéicha, ko’ã tembiapoukapy ou Ñanderuetégui iprofetakuéra juru rupi.

26Upéicha Leviguakuéra oñemohenda David mba’epukuéra reheve, ha pa’ikuéra trompéta reheve.

27Upéramo Ezequías oikuave’ẽuka kuave’ẽmby ojehapypáva kuave’ẽmby renda ári ha oñepyrũvo pe kuave’ẽmby ojehapypáva oñepyrũ avei opurahéi hag̃ua Ñanderuetépe g̃uarã, trompetakuéra pu, ha David, Israel retã ruvicha, mba’epukuéra reheve.

28Ha umi oñembyatýva guive omomba’eguasu joa, umi opurahéivape, ha trompéta mbopuharakuéra ombopu aja trompéta; ko’ã mba’e hi’are pe kuave’ẽmby ojehapypa peve.

29Ha oikuave’ẽmbáma ramo hikuái, tetã ruvicha, oñesũ ha mayma hendive oĩva, ha omomba’eguasuete hikuái Ñanderuetépe.

30Upéramo tetã ruvicha Ezequías ha umi mburuvicha he’i Leviguakuérape opurahéi hag̃ua Ñanderuetépe, David ha proféta Asaf puraheikuéra; ha ha’ekuéra opurahéi vy’apópe, ha oñakãity hikuái omomba’eguasu hag̃ua Ñanderuetépe.

31Upéi Ezequías he’i: Peẽ ko’ág̃a peñemboheko potĩ Ñanderuetépe g̃uarã; peñemboja, peikuave’ẽ ha pembotuicha Ñanderuete rogaguasu. Ha umi tetãygua oikuave’ẽ ha omomba’eguasu, ha opaite ipy’apýpe imba’eporãva guive, ogueru kuave’ẽmby ojehapypava’erãva.

32Ha péicha umi tapicha oñembyatýva ogueru kuave’ẽmby ojehapyva’erãva ha ojepapa rire oĩ 70 tóro ra’yrusu, 100 ovecha mácho ha 200 ovecha ra’yrusu, ko’ãva ome’ẽ kuave’ẽmby ojehapypáva ramo Ñanderuetépe g̃uarã.

33Oñekuave’ẽ kuave’ẽmby py’aguapy reheguáva ramo 600 tóro ha 3.000 ovecha ha kavara.

34Ha umi pa’i katu imbovy, ha ndaipu’akapái oipiro hag̃ua umi kuave’ẽmby ojehapyva’erãva, upévagui ityke’yrakuéra Levigua oipytyvõ ichupekuéra ojapopa peve hembiapo, ha ambue pa’ikuéra oñemboheko potĩ meve; umi Levigua ipy’a porãve ha ikyre’ỹve pa’ikuéragui, upévare onemboheko potĩ pya’eve avei.

35Péicha oĩ hetaiterei kuave’ẽmby ojehapyva’erãva, umi kuave’ẽmby ojehapypáva rehegua kyrakue reheve, ha pe víno oñekuave’ẽva reheve. Ha péicha oñemoñepyrũ porã jevy Ñanderuete rogaguasu rembiapo.

36Ha ovy’a Ezequías mayma hetãyguakuéra ndive, Ñanderuete ombosako’ígui tetãyguakuérape ojejapo pya’eiterei opaite mba’e.