Isaías 7 - Biblia en Guaraní - ?anderuete ?e’? Por? 2015

Isaías ñe’ẽ Acázpe g̃uarã

1Ko’ã mba’e ojehu, Jotam ra’y, Usías ra’yre, Juda retã ruvicha árape, Resin, Síria retã ruvicha, ha Peka, Remalías ra’y, Israel retã ruvicha, oñembyaty ojeity hag̃ua Jerusalen ári, ha’ekuéra oñeha’ãmba ramojepe ndaikatúi ombopoguy Jerusalen távape.

2Ha oñemomarandu ramo David rógape: Síria oike peteĩ py’ápe Efrain ndive. Acaz ha hetãyguakuéra ipy’a ryryipa opytávo ku yvyra ka’aguy peguáicha oipeju hatã ramo pe yvytu,

3upémaramo Ñanderuete he’i Isaíaspe: Ko’ág̃a tapeho, nde ha nde ra’y Sear-jasub ndive pejejohu hag̃ua Acaz ndive, pe yenda yvate pegua apýrape, pe tape ohóva ao joheihára kokuépe.

4Ha ere ichupe: Ema’ẽ porãke ha eñembopy’aguapy, ani rekyhyjétei ha ani nde py’angekõitei ko’ã mokõi tata’y michĩetéva rehe: Resin, Siriayguakuéra ruvicha, ha Peka, Israel ruvicha, ipochyeterei ramojepe.

5Ha’ekuéra oñemoĩ ramo nderehe ha he’i ramojepe:

6Jaha Juda retãme ha ñamongyhyje ichupe ha ñañemomba’e hese ha ñamoĩ hetã ruvicha ramo Tabeel ra’ýpe.

7Upévare Ñanderuete, Ñandejára péicha he’i: Upéva ndojehumo’ãi ha ndoikomo’ãi.

8Damásco, omoakã Síria retã ha Resin omoakã Damásco; Efrain omoakã Samária ha Peka, Remalías ra’y, omoakã Samária.

965 año haguépe katu oñemosarambipáta Efraínpe, ndaha’evéi peve peteĩ tetã. Ha peẽ ndapejerovia porãmbái ramo ndapepyta aremo’ãi avei.

10Ha Ñanderuete oñe’ẽve Acázpe, ha he’i ichupe:

11Ejerure ndejupe g̃uarã nde Járagui peteĩ techaukaha (señal), yvy ipypukuvehágui, térã ijyvatevehágui.

12Ha Acaz he’i ichupe: Ndajeruremo’ãi ha ndaipy’ara’ãmo’ãi che Ruetépe.

13Upéramo Isaías he’i: Ejapysaka porãke, David róga. Sa’i rei piko peẽme pemokane’õ yvyariguakuérape, ko’ág̃a pemokane’õse avei che Ruetépe.

14Upévare Ñanderuete voi ohechaukáta peẽme mba’e techaukaharã: Péina ápe pe kuñataĩ oiko’ỹva kuimba’e ndive hyeguasúta, ha imembýta peteĩ mitãkuimba’e, ha oñembohérata ichupe Emanuel.

15Ha’e ho’úta kamby rypy’a ha eíra, omboykekuaa peve mba’evai ha oiporavokuaa peve mba’eporãva.

16Ha pe mitãkuimba’e omboykekuaa mboyve ivaíva ha oiporavo hag̃ua pe iporãva, umi mokõi tetã ruvicha nemongyhyjéva oheja jevýta ko tetã.

17Ñanderuete omboúta umi Asíria retã ruvicha ndeári, ne retãyguakuéra ha nde ru róga ári, ha peẽ pehasa asyetereíta ipoguýpe, peichagua jehasa asy ndapehasái gueteri Israel ojei guive Judágui.

18Ha ojehuva’erã upe ára upévape Ñanderuete oturuñe’ẽta umi mberu (hetaiterei soldádo) oĩva Egípto ysyry apýrape, ha umi káva (soldádo pochy) oĩva Asíria retãme;

19ha umía oñemosarambipáta umi cérro pa’ũme, umi itakua rupi, umi ñuatĩndy rupi ha umi yenda rupi.

20Upe ára upévape Ñanderuete oguerúta Asíria retã ruvicha, oikóva ysyryguasúpe, Éufrates mboypýri. Ha ha’e omoperõta ikyse hãimbépe pene akã, pende rete rague ha pene rendyva jepeve.

21Ha ojehuva’erã umi ára umívape, oimeraẽ ne retãygua kuimba’e hembýva omongakuaáta peteĩ vaka ha mokõi ovecha térã kavara;

22ha ome’ẽ hetaitereígui kamby, ha’ekuéra ho’úta kamby kyrakue, añetehápe ningo kesu ha eíra ho’úta umi hembýva ne retãme.

23Ha ojehuva’erã avei upe ára upévape, pe parralty oguerekóva 1.000 parral máta ha ome’ẽkuaáva 1.000 pláta pehẽngue, kóvagui oikóta ñuatĩndy.

24Hu’y ha guyrapa reheve ojeikéta ipype, ñuãtĩndy ha javorái oĩtagui oparupiete.

25Ha umi cérro ojeka’apiva’ekue azádape, ndojeporumo’ãvéi ojekyhyjégui ñuãtĩ ha javoráigui, ojehejáta uvei omongaru hag̃ua vaka, ovecha ha kavarakuérape.