Romayguakuérape 2 - Biblia en Guaraní - ?anderuete ?e’? Por? 2015

Ñanderuete ombojovake hekópe

1Upévare, nde kuimba’e térã nde kuña ndaiporimo’ãi ndéve g̃uarã peteĩ discúlpa taha’e ha’éva, umi mba’e nde rembojovakéva nde rapicha rekovépe, upeichaite Ñanderuete nembojovake jevyva’erã avei ne rembiapokue rehe.

2Ñande ningo jaikuaa porã Ñanderuete ombojovakeha hekópe opaite kuimba’e ha kuña rembiapokue.

3Nde, kuimba’e ha nde kuña, reimo’ã piko rekañytaha Ñanderuete ñembojovake heko peguágui, ndete voi rejapo ramo peichagua mba’evai mba’éicha rupípa rembojovake nde rapicha rembiapo vai.

4Térãpa reimo’ã ikatuha remboyke reínte Ñanderuete mborayhu tuicháva, ipaciéncia ha ipy’aporã. Eikuaa porã katu, ipaciéncia ha ipy’aporã rupi Ha’e oipota nde rejevy hendápe.

5Nde remohatãgui nde py’apyñe’ẽ ha nderepoiséigui nde reko vaígui, rembyatyreína jehavira upe pochy árape g̃uarã, Ñanderuete ombojovake ramog̃uarã opaite kuimba’e ha kuña rembiapokuéra.

6Ha’e voi omyengoviáta opaite yvyarigua rembiapokue ojerure háicha.

7Ñanderuete voi ningo ome’ẽta tekove opa’ỹva umi ojapóvape tembiapo porã, ha oñeha’ãmbáva ohupity hag̃ua Ñanderuete reko ojajaipáva, tekove opa’ỹva ha ombotuichaséva Ijárapente.

8Ha umi oñemoĩva Ñanderuete rehe, ohekágui imba’erãnte, ha’entesévagui, hi’arikuéra katuete ho’áta Ñanderuete jehavira ha ipochy rendy,

9jehasa asy ha kyhyje, taha’e Judaygua térã tetã ambueygua, iñe’ẽrendu rãngue pe añeteguápe ojaposénte mba’evai.

10Ha Ñanderuete ome’ẽva’erã tekove opa’ỹva umi ojapóva pe mba’eporã ha ohekáva Ñanderuete reko jajaipa ha ombotuicháva Ijárape. Ha’e ome’ẽse tenonderã Judayguakuérape py’aguapy ha pe tekove opa’ỹva, ha upéi avei tetã ambueyguakuérape.

11Ñanderuete ndoporombojuavýi, Ha’e ombojovake hekoitépe uvei opavavépe.

12Opaite umi oñemohembiapovaiva’ekue oikuaa’ỹre Moises rembiapoukapykuéra, oñehundiva’erã Moises rembiapoukapy’ỹre; ha opaite umi oñemohembiapovaiva’ekue oikuaa rire Moises rembiapoukapykuéra, oñembojovakeva’erã Moises rembiapoukapykuéra rupi.

13Umi ohendúnteva Moises rembiapoukapykuéra ndaheko potĩri Ñanderuete renondépe, umi ojapóvante uvei.

14Oĩ ningo umi tetãygua ndoikuaái ramojepe Moises rembiapoukapykuéra, ha’ekuéra ijehegui ojapo Moises rembiapoukapykuéra, ha’ekuéra voi ome’ẽgui ojupe umi tembiapoukapy porãva.

15Ha’ekuéra ohechauka hembiapo rupi umi tembiapoukapy ojehai hague avei ipy’apýpe (Génesis 3,22). (Mbohapy techahare oĩ tetãyguakuéra rekovépe, ndoguerekói ramojepe Moises rembiapoukapykuéra, umía ha’e: Pe ñe’ã (corazon), pe py’apyñe’ẽ (conciéncia) ha pensamientokuéra.) Umi pensamiénto rupi tetãyguakuéra omoneĩ térã ombotove hapicha rembiapokue.

16Og̃uahẽva’erã katuete pe ára Hesu Crísto ombojovakeva’erãha umi mba’e ñemi oĩva guive opaite tetãyguakuéra py’apýpe.

Judayguakuéra ha Moises rembiapoukapykuéra

17Ha nde reñehenóiva Judaygua ha rejeko Moises rembiapoukapykuéra rehe, ha reñembotuicha reikuaa porãháre Ñanderuetépe,

18ha reikuaa porã avei Ñanderuete rembipota, ha reiporavokuaa mba’eporã mba’evai apytégui, pene mbo’ehára penembo’e porã haguére,

19ha rejerovia ndejehe ikatuháre reisãmbyhy ohecha’ỹvape, ha reikose tesape ramo umi oguatáva pytũguýpe,

20ha rehekombo’ese umi itavývape, ha reikose mbo’ehára ramo umi oikuaa’ỹvape, reikuaa porãgui pe añetegua ha Moises rembiapoukapykuéra,

21mba’érehe piko rembo’ese tetã ambueyguakuérape ha nereñehekombo’éi ndejupe raẽ voi. Nde rembo’e tetã ambueyguakuérape ani hag̃ua omonda, ha ndete voi remonda reikóvo.

22Nde ere ani rembyai mendare, ha ndete voi rembyai ne mendare. Nde ere ani remomba’eguasu jára gua’úpe, ha ndete voi remonda Ñanderuete rogaguasu pegua mba’e.

23Nde reñembotuicha reikuaa porãgui Moises rembiapoukapykuéra ha remotĩ Ñanderuetépe, nde voi nderejapóigui hembiapoukapykuéra.

24Ñanderuete kuatiañe’ẽme ningo he’i voi penderehe: Umi tetã ambueyguakuéra oñe’ẽvai Ñanderuete réra rehe pende reko vai rupi.

Pe ñekytĩ’o (circuncision

) Judayguakuérape g̃uarã reiete, ha’ekuéra ndojapói ramo opaite Moises rembiapoukapykuéra

25Pe pire’i ñekytĩ’o (circuncision) iporã Israelguakuérape ojapo ramo Moises rembiapoukapykuéra, nde nderejapói ramo Moises rembiapoukapykuéra ha’ete ku nereñekytĩ’oiva’ekue.

26Upéva rãngue upe oñekytĩ’o’ỹva ojapo ramo Ñanderuete rembiapoukapy he’íva, ojeguereko oñekytĩ’o ramoguáicha, jepevénte ndaupéichai.

27Umi ojapóva Ñanderuete rembiapoukapy noñekytĩ’oiva’ekue ramojepe, ombojovakéta Israelguakuérape Ñanderuete ñembojovakeha árape, ko’ãva oikuaa porãgui Moises rembiapoukapykuéra katu ndojapói hikuái, oñekytĩ’o ramojepe hikuái.

28Upe Judaygua oñekytĩva hete reheguánte ndaha’éi Judaygua añeteguáva, pe ñekytĩ’o ojejapóva kuimba’e rete apérente ndaha’éi ñekytĩ’o añeteguáva.

29Pe ñekytĩ’o añeteguáva ojejapo Judayguakuéra py’apýpe, pe ñekytĩ’o añeteguáva ojejapo ñande pytu porãme, ha péva ndaha’éi kuimba’e rembiapo, Ñanderuete rembiapo uvei.