Salmokuéra 143 - Biblia en Guaraní - ?anderuete ?e’? Por? 2015

David ojerure ñepytyvõ ojepy’apyetégui - David purahéi

1Nde, che Ruete, ejapysakamína che ñembo’e rehe, cherendumi che rohenóivo, chembohovaimína ne ñe’ẽ añetegua ha nde justícia rupi.

2Ha ani rembojovake ne rembiguáipe, ne renondépe ningo ndaipóri voi avave oikóva hekoitépe.

3Cherayhu’ỹva omuña che ánga, yvy rehe oity che rekove, chemoinge pytũnguýpe ku omanóvaicha.

4Ha che pytu ojepy’apy chepype, che ñe’ã oñemyangekõieterei.

5Chemandu’a umi ára ymaguare rehe, chemomandu’a opaite ne rembiapo ha ne rembiapokue rehe.

6Chepojái nderehe ha che ánga ijy’uhéi ku yvy ikãiteváicha. Selah

7Pya’emína chembohovái, Nde, che Ruete, ikangyetéma che pytu, ani reñomi chehegui nde rova, ỹrõ che ajoguáta umi ohomava’ekuépe ha ko’ág̃a oĩva yvy guýpe.

8Pyharevépe tañandu ne mborayhu, nderehe ajeroviágui, ehechaukamína chéve che raperã aguata porã hag̃ua, che ánga nderehénte ojerovia.

9Cheipytyvõmína umi cherehe ija’e’ỹvagui, Nde, che Ruete, chemo’ãmína umi mba’égui.

10Chembo’éna tajapo ne rembipota, Nde ha’égui che Jára, nde Pytu Porãite tachemboguata tape porãre yvy ape ári.

11Che Ruete nde réra rehehápe, chemokyre’ỹ jevy; nde justícia rupi; eguenohẽ che ánga jepy’apy vaígui.

12Ha nde poriahuvereko rehehápe emboguemína umi cherehe ija’e’ỹvape, ha ehundipa umi che ánga rehe ija’e’ỹvape, che ningo ne rembiguái.