1 Crónicas 12 - Biblia en Guaraní - ?anderuete ?e’? Por? 2015

David soldádo aty

1Ko’ã kuimba’e ko’ãva ou David rendápe Siclágpe, ha’e oiko aja kañyháme gueteri Saul, Cis ra’ýgui, ha ã ipy’aguasúva oipytyvõ ichupe iñorãirõme.

2Ha’ekuéra ikatupyry ha oiporukuaa ipo mokõivéva, ijasu ha ijakatúa, oporojapi hag̃ua pe ita mombohápe ha ihu’ykuérape. Saul tríbugui, Benjamin ñemoñare apytégui oĩ:

3Ahiezer, imburuvicha, upéi Joas, Semaa ra’y, peteĩ Gabaatgua; Jeziel ha Pelet, Azmávet ra’ykuéra; Beraca ha Jehu, mokõi Anatotgua,

4Ismaías, peteĩ Gabaongua, peteĩ ipy’aguasuetéva umi 30 apytépe, ha omoakãva 30 kuimba’épe; Jeremías, Jahaziel, Johanan, Jozabad, Gederguakuéra,

5Eluzai, Jerimot, Bealías, Semarías, ha Sefatías, Harufguakuéra,

6Elcana, Isías, Azareel, Joezer ha Jasobam, Coreguakuéra;

7Joela ha Zebadías, Jeroham ra’ykuéra, Gedorguakuéra.

8Gadguakuéra apytégui okañy avei ha oho David rendápe, desiértope, hekoha oñemombarete porãvape, kuimba’e oñorãirõkuaáva ha ipy’aguasuetéva, oiporukuaáva hetemo’ãha ha ijyvyra akua puku; hovakuéra ojogua leõ rovápe, ha ipya’e hikuái umi guasu ñumeguáicha.

9Ezer, pe peteĩha; Obadías, pe mokõiha; Eliab, pe mbohapyha;

10Mismana, pe irundyha; Jeremías, pe 5-ha;

11Atai, pe 6-ha; Eliel, pe 7-ha;

12Johanan, pe 8-ha; Elzabad, pe 9-ha;

13Jeremías, pe 10-ha; ha Macbanai, pe 11-ha;

14ko’ãva soldádo ruvicha Gad tríbu soldádo atýpe. Pe michĩvéva oĩ 100 kuimba’e ári, ha pe tuichavéva oĩ 1.000 kuimba’e ári.

15Ko’ãva ohasa pe ysyry Jordan, pe jasy peteĩha jave, hi’y osẽmba jave hembe’y pukukuévo; ha pe y omosẽ umi ñu rupigua oikóvape kuarahyresẽ gotýo ha kuarahyreike gotýo.

16Peteĩ jevy Benjamin ha Juda ñemoñarenguéra ou David rendápe hekoha ha’e oñemombarete porã haguépe,

17ha David osẽ ojojohúvo hendivekuéra, he’i: Oime ramo peju che rendápe py’aguapy reheve chepytyvõ hag̃ua, che py’a ojoajúta penendive; ha oime ramo peju chemoĩ hag̃ua cherehe ija’e’ỹva pópe katu, oĩ’ỹre tembiapo vai che póre, tohecha ñande rukuéra Jára, ha tapendehavira.

18Upévo pe Pytu Porãmbáva ou Amasai ári, pe omoakãtava kurimive umi 30 kuimba’épe, ha he’i Davídpe: Ore ne mba’e, ha nendive, Isai ra’y, roikose: Py’aguapýpe, py’aguapy toĩ nendive ha ne pytyvõharakuéra ndive, ha Ñanderuete toñangareko penderehe. Upéichamarõ David omog̃uahẽ ha omoĩ ichupekuéra imburuvichakuéra apytépe.

19Upéicha ohasamimi avei Manases tríbugui David rendápe, ha’e ou ramoguare Filisteayguakuéra ndive ojeity hag̃ua Saul ári; David katu noipytyvõi ichupekuéra, umi Filisteaygua ruvichakuéra ndoipotáigui ipytyvõ, upévare ombojevy ichupe ijapytégui oñomongeta rire hikuái oñondivekuéra, he’ívo: David ningo ikatu oñemoĩ ñanderehe ha ohasa ijára Saul rendápe,

20David og̃uahẽvo Siclágpe, ko’ã Manasesgua omoirũ ichupe: Adna, Jozabad, Jediael, Miguel, Jozabad, Eliu ha Ziletai, ãva Manases soldádo ruvicha 1.000 árigua.

21Ko’ãva oipytyvõ Davídpe ojeity hag̃ua umi hese ija’e’ỹva aty oporomondáva ári; Manasesgua kuimba’e ipy’aguasúva voi, ha David omoinge ichupekuéra isoldádo atýpe huvicha ramo.

22Umi árape ko’ẽ ko’ẽ rehe og̃uahẽ oúvo ñepytyvõ Davídpe g̃uarã, oguereko peve peteĩ soldádo aty ndetuichaitéva, peteĩ Ñanderuete soldádo atýicha.

23Ko’ãva umi ñorãirõhára oñembyatýmava David ndive Hebrónpe, ome’ẽ hag̃ua ichupe Saul guapyhaguasu, Ñanderuete ñe’ẽ he’i haguéicha.

24Juda ñemoñarenguéragui ou 6.800 soldádo hetemo’ãha ha ijyvyra puku akua reheve.

25Simeon ñemoñarenguéragui ou 7.100 kuimba’e ipy’aguasúva.

26Levi ra’ykuéragui ou 4.600 kuimba’e.

27Upéicha avei Joiada, Aaron ñemoñarenguéra ruvicha, ha hendive 3.700 kuimba’e.

28Ha Sadoc, peteĩ mitãrusu ipy’aguasúva ou 22 soldádo ruvicha ndive, itúva rogaguasúgui osẽva.

29Benjamin ñemoñarégui, Saul tríbugui, ou 3.000; umi árape hetave katu umi omoirũva gueteri Saul rogayguakuérape.

30Efrain ñemoñarenguéragui ou 20.800 ipy’aguasuetéva, kuimba’e herakuã porãva itúva rogaguasúpe.

31Manases tríbu mbyterégui ou 18.000, ko’ãva réra oñehenói ha ojehai peteĩ kuatiañe’ẽme omohenda hag̃ua Davídpe, Israel retã ruvicha ramo.

32Isacar tríbugui ou 200 mburuvicha, oikuaáva umi mba’e ojehútava arapýpe, ha ãva oikuaauka Israélpe, mba’épa ojejapova’erã, ha iñe’ẽ ojejapo hekoitépe ipehẽnguekuéra apytépe.

33Zabulóngui ou 50.000 oñembosako’ímava osẽ hag̃uáicha ñorãirõme, opaite iñorãirõ rembiporu reheve, ha oñeha’ãmbáva ñorãirõ rembiapópe.

34Neftalígui ou 1.000 mburuvicha ha hendive 37.000 soldádo, hetemo’ãha ha ijyvyra puku akua reheve.

35Dángui ou 28.600 kuimba’e oñembosako’i porãmbáva ñorãirõme g̃uarã.

36Asérgui ou 40.000 ñorãirõhára oñembosako’ipámava oñorãirõ hag̃uáicha.

37Ha Jordan mboypýri guio, umi Rubengua, Gadgua ha Manases tríbu mbyterégui ou 120.000 kuimba’e opaite iñorãirõ rembiporu reheve.

38Mayma ko’ã kuimba’e ñorãirõhára oñembosako’íva oñorãirõ hag̃uáicha ou Hebrónpe py’aporã reheve oiporavo hag̃ua opaite ambue Israelguakuéra ndive Davídpe, Israel retã ruvicha ramo.

39Ha opyta hikuái David ndive mbohapy ára pukukue, okaru joa ha omboy’u joa hikuái, ipehẽnguekuéra ombosako’ígui avei tembi’u ichupekuéra g̃uarã.

40Umi upérupi oikóva, Isacar, Zabulon ha Neftali, ogueru hi’upyrã iburrokuéra, ikamellokuéra ha imburikakuéra ári; ogueru hikuái trígo ku’i, pan hígo oñemokãmbyréva, víno, acéite, ha heta guéi ha ovechakuéra, oĩgui vy’aguasu Israel retãme.