1Oime ramo peteĩ kuimba’e omendáva hembirekorã rehe, ha upéi ndoguerohoryvéi ramo, ojohúgui hese mba’evai, ohaiva’erã ichupe kuatiañe’ẽ menda jopoi reheguáva, ha ome’ẽva’erã ipópe, ha omondova’erã ichupe hógagui.
2Ha osẽvo hógagui, ikatu oho ha omenda ambue kuimba’e rehe.
3Ha iména pyahu ndaija’evéi ramo hese, ohaiva’erã kuatiañe’ẽ menda jopoi reheguáva ha omoĩ rire ipópe, omondo ichupe hógagui; térã omano ramo iména pyahu, omendamava’ekue hese,
4upérõ iména ypykue, pe opoi tenondeva’ekue ichugui, ndaikatuvéima ogueraha jevy ichupe hembireko ramo, ndo’apóigui ichupe mba’evérõ; ko’ã mba’e ningo ombopochy Ñanderuetépe, ha ndapejapoiva’erã koichagua mba’evai pe yvýpe Ñanderuete ome’ẽtava peẽme pene mba’erã ramo.
5Pe omenda ramóva ndohoiva’erã ñorãirõrãme, ha mba’evetépe ndojejokuaiva’erã; sã’ỹme oikova’erã hógape peteĩ áño pukukue, ombovy’a hag̃ua hembirekópe.
6Nderejapyhyiva’erã peteĩ molíno ni ijita yvateoygua, pe pirapire reiporukava’ekue rehe, péva ha’ete ku hekove rejerure ramoguáicha.
7Ojejohu ramo pende apytépe omondáva hapicha Israelguápe, térã oguereko ramo ichupe esclávo ramo, térã ovende ramo ichupe, upe mondaha upévape pejukava’erã, peipe’a hag̃ua mba’evai pende apytégui.
8Oĩ ramo iléprava pende apytépe, peñangarekova’erã pejapo hag̃ua hekoitépe umi Levigua pa’i penembo’e háicha; ha che ha’e haguéicha ichupekuéra, upeichaite pejapova’erã avei.
9Nemandu’áke Ñanderuete, Ñandejára, ojapova’ekuére Miriam rehe pe tape rupi, pesẽ rire Egíptogui.
10Reiporuka ramo pirapire nde rapichápe, ndereikeiva’erã hógape regueraha hag̃ua mbaretépe imba’éva.
11Eha’ãrõ okápe, nde rapicha oguenohẽ meve ndéve peteĩ imba’éva (garantía ramo).
12Ha nde rapicha kuimba’e imboriahu ramo, ani reho nde rupápe reke hag̃ua reme’ẽ jevy’ỹre ichupe ipóncho.
13Katuete reme’ẽ jevyva’erã ichupe ipóncho kuarahy oikévo, ikatu hag̃uáicha oke ijao reheve, ha’e omomba’eguasu hag̃ua nde réra Ñanderuete, Ñandejára renondépe, rejapógui mba’eporã hekovépe.
14Neremomba’apo reiriva’erã pe omba’aposévape nendive, imboriahu térã oikotevẽgui pirapire, taha’e ne retãygua térã tetã ambueygua oikóva guive ne retã ryepýpe.
15Meme árape reme’ẽva’erã ichupe hembiapo repy, ha ndoikeiva’erã kuarahy reme’ẽ’ỹ rehe ichupe hembiapo repy; imboriahúgui oikotevẽ hembiapo repy rehe oikove hag̃ua; ani ág̃a ko’ã mba’e rehe ojerure asýtei Ñanderuetépe, ha péva ho’a ndeári angaipa ramo.
16Ituvakuéra ndojejukaiva’erã ita’yrakuéra angaipa rehe, ha ta’yrakuéra ndojejukaiva’erã ituvakuéra angaipa rehe, peteĩteĩva omanova’erã hi’angaipakuetee rehe.
17Neremokarẽiva’erã tetã ambueygua ni ityre’ỹva justícia, ha ndereguerahaiva’erã imenave’ỹva ao pe pirapire rendaguépe reiporukava’ekue rehe ichupe.
18Penemandu’áke peiko hague avei tembiguái rei ramo Egíptope, ha upégui Ñanderuete, pende Jára, penerenohẽva’ekue; upévagui che ha’e peẽme pejapo hag̃ua hekoitépe opaite ko’ã mba’e.
19Remono’õ ramo ne ñemitỹngue nde kokuépe, ha nderesarái ramo peteĩ háse nde kokuépe, nderehoveiva’erã regueru hag̃ua; upéva opytáta uvei tetã ambueyguápe g̃uarã, térã ityre’ỹvape g̃uarã, térã imenave’ỹvape g̃uarã; Ñanderuete omyengoviáta ndéve ha ohovasáta, opaite nde po rembiaporã rejapótava.
20Reityvyro vove nde olívo rakã (ijyvyra’águi ojejapo acéite), neremono’õveiva’erã nde rapykuere rupiguare; upéva opytáta tetã ambueyguápe g̃uarã, ityre’ỹva térã imenave’ỹvape g̃uarã.
21Remono’õvo nde parral’a, nderejepovyvyveiva’erã nde rapykuere rehe; upéva opytáta tetã ambueyguápe g̃uarã, ityre’ỹva térã imenave’ỹvape g̃uarã.
22Nemandu’áke reiko hague avei tembiguái rei ramo Egípto retãme; upévagui Che ha’e ndéve rejapo hag̃ua opaite ko’ã mba’e.
Who We AreWhat We EelieveWhat We Do
2025 by iamachristian.org,Inc All rights reserved.
