1Job irũ mbohapyvéva nombohovaisevéima ichupe, ha’e he’ígui jepi heko ipotĩha.
2Upéramo Eliu, Baraquel ra’y, peteĩ Buzgua, Ram ñemoñare, ipochyete Job ndive, ha’e oñemoĩ porãségui Ñanderuete renondépe.
3Ipochy avei iñirũnguéra mbohapyvéva ndive, nombohovái porãi haguére Jóbpe, ha ha’e opytáre peteĩ heko potĩva ramo.
4Eliu imitãvégui iñirũnguéra apytépe, oha’ãrõ ha’ekuéra ombohovái raẽ.
5Eliu ohechávo iñirũnguéra nombohovaisevéi ipochyeterei.
6Ha Eliu, Baraquel ra’y, peteĩ Buzgua he’i: Chemitã gueteri, ha peẽ katu pendetujáma, akyhyje ambohasa hag̃ua peẽme che aikuaáva guive.
7Che ha’e chejupe: Umi hi’ára hetáva toñe’ẽ raẽ, ha umi áñoita tohechauka ra’ẽ iñaranduha.
8Añetehápe pe yvyarigua pytu ha Ipu’akapáva Pytu Porãite omoarandu kuimba’e ha kuñakuérape.
9Ndahetái itujáva iñarandu, ha umi itujáva, ituja haguérente, naiñarandúi gueteri.
10Upévare che añe’ẽta, pecherendúke, che ambohasáta peẽme che aikuaáva.
11Peikuaa porãke, che ajapysaka porã pene ñe’ẽ rehe ha ahenduse voi pene arandu pembohovái hag̃ua hekoitépe.
12Ajapysaka porã ramojepe pene ñe’ẽ rehe, ndajohúi pende apytépe peteĩnte jepe ombohovái porãkuaáva Jóbpe.
13Ani pejétei: Ore rojohúma pe arandu, Ñanderuete voínte ombopoguykuaa Jóbpe, kuimba’ekuéra ndaikatúi ojapo péva.
14Job nomondói iñe’ẽnguéra cherehe, ha che nambohovaimo’ãi ichupe peẽ pejapo haguéicha.
15Iñakãnguéra iñypytũ, upévare ndikatuvéi ombohovái, iñe’ẽ arandu ojei ichuguikuéra.
16Oñe’ẽ jave hikuái che aha’ãrõnte, ko’ág̃a katu okirirĩ ha noporombohovaisevéi hikuái,
17upévare che aporombohovaise, chéve ijamíva, ambohasase avei peẽme che arandu.
18Cherenyhẽgui ñe’ẽitágui, ha che ánga chejopy che py’apýpe.
19Añetehápe che py’apy ojogua víno ipytuho’ỹvape ha okapuséva, ku víno oĩva kavara pirekue ryru pyahúpe.
20Upévare añe’ẽva’erãmante chepytuhẽ jevykuaa hag̃ua, añe’ẽvo ha ambohováita.
21Nambojuavymo’ãi yvyarigua apytégui ha nambojuruhe’ẽmo’ãi avavépe.
22Nambojuru he’ẽmo’ãi avavépe, Ñanderuete pya’e ohavirátagui upe oporombojuru he’ẽvape.
Who We AreWhat We EelieveWhat We Do
2025 by iamachristian.org,Inc All rights reserved.
