2 Samuel 1 - Biblia en Guaraní - ?anderuete ?e’? Por? 2015

David ohendu Saul omano hague

1Saul omano rire David ou jevy Siclágpe ipu’akapa riréma umi Amalecgua rehe, ha upépe opyta mokõi ára.

2Ha pe ára mbohapyhápe, ou peteĩ kuimba’e Saul soldádo atýgui, ijaokuéra osoropa, ha yvy iñakã rehe; ha og̃uahẽvo David rendápe ojeity yvýre omomba’e hag̃ua ichupe.

3Ha David oporandu ichupe: Mamóguipa reju. Ha ha’e he’i: Akañy Israel atyhágui.

4Ha David he’i ichupe: Mba’épa ojehúra’e. Aipota remombe’upa chéve. Ha ha’e he’i ichupe: Israelguakuéra okañymba ñorãirõhágui, heta Israelgua omano; Saul ha ita’ýra Jonatan omano avei.

5Ha David oporandu pe karia’ýpe: Mba’éichapa reikuaa Saul ha ita’ýra Jonatan omano hague.

6Ha pe karia’y he’i ichupe: Sapy’amínte aju Gilbóa cérrope ha ajohu Saúlpe ojejokohápe ijyvyra akua puku (lánza) rehe, ha heta cárro ha heta kavaju arigua ouvahína.

7Ha ha’e oma’ẽvo hapykue gotýo, cherecha ha cherenói; ha che ha’e: Na’ápe aĩ.

8Ha oporandu chéve: Máva piko nde. Ha che ha’e ichupe: Che peteĩ Amalecgua.

9Ha’e he’i jevy chéve: Aipota nde chejuka, che ajepy’apyetereíma; ha che aikovemíntema.

10Upémaramo che ajuka ichupe, aikuaágui ndaikatumo’ãvéimaha oikove; ha ho’a rire ajapyhy icoróna oĩva iñakã rehe ha jeguaka apu’a oiporúva ijyva rehe (pulséra), ha aguerupa ndéve g̃uarã che jára.

11Upévo David omondoro ijao, ha péicha ojapo avei umi kuimba’e oĩva guive hendive.

12Hasẽ ha ojahe’o hikuái ha ndo’úi mba’eve hikuái ka’arupytũ meve omano haguére: Saul, ita’ýra Jonatan, Ñanderuete retãyguakuéra ha Israel rogayguakuéra kyse puku rãimbe rupi.

13Ha David he’i pe karia’ýpe: Mamogua piko nde. Ha ha’e he’i: Che ningo tetã ambueygua, peteĩ Amalecgua.

14Ha mba’éicha piko nderekyhyjéi remopu’ã hag̃ua nde po ha rejuka hag̃ua Jahve rembiporavopyrépe.

15Upémaramo David ohenói peteĩ kuimba’e ipoguy peguávape ha he’i ichupe: Tereho ha ejuka ichupe. Upéicha ha’e oikutu ichupe omano hag̃ua.

16Ha David he’i ichupe: Nde ruguýnte toĩ ne akã ári, nde juru rupi voi reñembojovakéma erévo: Che ajuka Ñanderuete rembiporavopyrépe.

David purahéi ñemano jahe’o rehegua Saul ha Jonatan rehe.

17Ha David ombyasy Saul ha ita’ýra Jonatan omano haguére, upévare opurahéi ojahe’óvo ko purahéi ñemano rehegua.

18Ha he’i kóva oñembo’eva’erãha Juda ñemoñarenguéra apytépe, ha ojehaíta hekopotĩva kuatiañe’ẽme.

19Israel mimbi oguéma pe tenda ijyvatehápe. Mba’éichapa ho’ára’e ko’ã ipy’aguasuetéva.

20Ani pemoherakuã Gátpe, ha ani pemombe’útei ko’ã mba’e Ascalon rape rupi, ani hag̃ua Filisteaygua rajykuéra ovy’aite ha ani hag̃ua umi oñekytĩ’ỹva pire’i rajykuéra osapukái vy’águi.

21Gilbóa cerrokuéra rehe anive ho’a ysapy ha ama, ha pende yvýpe anítei oñemono’õve mba’eve; upépe oñemongy’águi ipy’aguasúva rete mo’ãha ha Saul rete mo’ãha oñemona’ỹrõ guáicha acéite reheve.

22Jonatan guyrapa ndojavýi, ojapi ipype tapia hese ija’e’ỹha ipy’aguasuvévape ha Saul kyse puku tapia omyakỹ hese ija’e’ỹva ruguykue.

23Saul ha Jonatan, ojererohory ha ojehayhúva, hekovépe ha imanóme jepe ndojeíri ojuehegui; ipya’eteve hikuái ñapykanígui ha imbareteve leõgui.

24Israel rajykuéra perojahe’o Saúlpe, ha’e penemondemígui ao pytã asývape, ha pende ao ombojeguapáva órope.

25Ipy’aguasúva ho’a háicha ñorãirõme, péicha Jonatan ho’a ha omano pe cérrope.

26Che ánga oñembyasy nderehe, che ryke’y Jonatan, rohayhueteva’ekue. Ne mborayhu iporãve chéve kuñakuéra mborayhúgui.

27Angái, angái, ho’áma umi ipy’aguasúva, oñehundíma iñorãirõ rembiporu reheve.