Ester 7 - Biblia en Guaraní - ?anderuete ?e’? Por? 2015

Amánpe ojejuvy

1Ha Aman oho tetã ruvicha ndive tetã ruvicha rembireko Ester karuguasuhápe.

2Ha pe ára mokõiháme, ho’u jave hikuái pe víno, tetã ruvicha he’i Estérpe: Mba’épa nde Ester, tetã ruvicha rembireko, rejerure ha katuete oñeme’ẽta ndéve. Mba’épa reipota ojejapo ndéve. Oime ramo pe tetãguasu mbytere jepeve, oñeme’ẽta ndéve.

3Upéramo tetã ruvicha rembireko Ester he’i: Tetã ruvicha, oime ramo ajohúra’e mba’eporã nde resa renondépe, ha oĩ porã ramo tetã ruvichápe, toñeme’ẽ chéve che rekove chemba’ejerure repy rehe, ha che retãyguakuéra rekove che rembipota rehe.

4 Orevendéma katu che ha che retãyguakuéra, roñehundipa, rojejukapa ha ropaite hag̃ua. Orevende rire tembiguái ramo, akirirĩva’erãmo’ã, upérõ ore jejopy vai imichĩeterei ambyahéi (amolesta) hag̃ua nde rekove.

5Upémaramo tetã ruvicha Asuéro oporandu tetã ruvicha rembireko Estérpe: Mávapa upéva, ha moõpa oime upe oñembotuichaiteva’ekue ojapo hag̃ua ko’ã mba’e ko’ãva.

6Ha Ester he’i: Pe ndaija’éiva ha oñemoĩva orerehe, pe tekove ñaña Aman, ko’ápe oĩva. Upérõ Aman ipy’a tarovaite tetã ruvicha ha hembireko renondépe.

7Upérõ tetã ruvicha opu’ã pe karuguasuhágui, pochy rendy reheve, ha oho pe ogaguasu yvaty gotýo; ha Aman opyta ojerure hag̃ua tetã ruvicha rembireko Estérpe hekove rehe; oikuaa porãgui tetã ruvicha katuete ojapotaha mba’evai hese.

8Ha tetã ruvicha ou jevývo hogaguasu yvatýgui pe koty karuguasu oiko haguépe ojohu Aman ojayvy Ester oñenoha renondépe, ha tetã ruvicha he’i: Rerãirõse piko avei tetã ruvicha rembirekópe che rogaitépe. Tetã ruvicha he’ipávo ko’ã ñe’ẽ, hembiguaikuéra oñuã Aman rova.

9Ha Harbona, peteĩ tetã ruvicha rembiguái, he’i tetã ruvichápe: Eikuaa porã Aman rógape oĩha pe ojejuvyhaendag̃ua 22 métro ijyvate, Aman ojapova’ekue Mardoquéope g̃uarã, oipytyvõva’ekue tetã ruvichápe; ha upémaramo tetã ruvicha he’i: Pemosãingo Amánpe ijejuvyhaenda rehe.

10Péicha omosãingo hikuái Amánpe ijejuvyhaendatee rehe, ha’e voi ombosako’iva’ekue Mardoquéope g̃uarã; ha uperire ae tetã ruvicha pochykue ojera.