Salmokuéra 84 - Biblia en Guaraní - ?anderuete ?e’? Por? 2015

Oikoseiterei hikuái Ñanderuete rógape - Core ra’ykuéra purahéi – Gitit reheve

1Iporãite ningo ore Ruete rogaguasukuéra.

2Ijy’uhéi che ánga ha che py’aite guive aikose Ñanderuete rogaguasu korapykuérape, che py’apy ha che juru opurahéi hag̃ua Ñanderuete Oikovévape.

3Guyra’i jepeve ojohu huparã, ha avei pe mbyju’i haityrã ombo’a hag̃ua, che katu apyta mombyry ne kuave’ẽmby rendágui, Nde, ore Ruete, yvága atykuéra Jára.

4Ovy’aite ningo umi nde rogaguasúpe oikóva ha opaite árape nemomba’eguasuetéva. Selah

5Ovy’aite ningo upe kuimba’e nderehe ojejokóva, ha ipy’apýpe oñemongetáva oguata jave nde rapekuérare.

6Ha ohasa asy ramojepe ñu perõ rupi ojehechaukáta ichupe yvu iporãva ha pe ama tenondeguáva ome’ẽ ichupe ijehovasa porã.

7Ha upéi ha’ekuéra oguata ohóvo pu’aka ipyahúva reheve og̃uahẽ meve Jerusalénpe ohecha hag̃ua Ñanderuetépe.

8Che Ruete, yvága atykuéra Jára, ehendumína che ñembo’e, emboykemína nde apysa cherendu hag̃ua, Nde, Jacóbo Jára. Selah

9Ema’ẽmína, Nde, ore Ruete, Nde ningo oremo’ãva, ha emoĩmína nde resa Nde voi reiporavova’ekue rehe.

10Iporãiteve peteĩ ára nde (rogaguasu) korapýpe, 1.000 ára aiko rãngue okápegui. Iporãve añembo’y ramo che Jára rogaguasu rokẽme, aiko rãngue tekove ñaña rogaguasúpe.

11Ñanderuete ñanemo’ã porã ha kuarahýicha ñanderesape. Jeporiahuvereko ha terakuã porã Ñanderuete ome’ẽkuaa. Ha umi heko potĩvape Ha’e ohovasava’erã.

12Ovy’aite upe kuimba’e ojeroviáva yvága atykuéra Jára rehe.