1Ñanderuete oñe’ẽ Jonas, Amitai ra’ýpe, ha he’i ichupe:
2Epu’ã ha tereho Nínivepe, pe tavaguasuetépe, ha ere ichupekuéra: Og̃uahẽmaha che renondépe heko ky’a vai ha iñañangue.
3Jonas opu’ã ha oho rãngue Nínive gotýo oho Társis (Espáña) gotýo, okañy hag̃uáicha Ñanderuetégui, upévare oguejy oho Jópepe, ha ojohu peteĩ barcoguasu osẽmbotáva oho hag̃ua Tarsis gotýo, ome’ẽ ipasáje repyrã ha ojupi oho hag̃ua Tarsíspe, oñemomombyry hag̃ua Ñanderuete rembiapógui.
4Ñanderuete katu omopu’ã peteĩ yvytu ratã yguasu apére, ha oñemondyiete hikuái, pe y ipochyete oipehe’ãmba hag̃uáicha pe barcoguasu (ygaguasu).
5Ha umi kuimba’e barcoguasu pegua okyhyjepa, ha peteĩteĩ oñembo’e sapukaipópe ijárape ha omombopa hikuái ýpe umi mba’e pohýi oĩva guive barcoguasu ryepýpe ombovevúi hag̃ua ibárco, Jonas katu oguejýra’e barcoguasu ruguaitépe oñeno hag̃ua ha upépe oke hatã.
6Ha umi barcoguasu ruvicha oñemboja Jonas rendápe ha he’i ichupe: Mba’érehe piko rekereína. Epu’ã ha eñembo’e nde Járape, ikatu mba’éntemo ñandeporiahuvereko, nañamanombái ko y pochy rupi.
7Ha umi kuimba’e barcoguasu pegua he’i hikuái ojupe: Jaity po’a jaikuaa porã hag̃ua máva rupípa ko’ã mba’evai ojehu ñandéve. Ha oitývo po’a, ho’a Jonas rehe.
8Upémaramo he’i hikuái ichupe: Emyesakã porã oréve mba’éicha rupípa ojehu ñandéve ko mba’evai kóva. Mba’épa ne rembiapo ha mamóguipa reju. Mba’eichagua tetãyguápa nde ha moõpa renace.
9Ha ha’e he’i ichupekuéra: Che ningo hebréo (Israelgua), ha ambotuicha Yvagakuéra Járape, yguasu ha yvy apoharépe.
10Ha umi kuimba’e kyhyjepópe he’i ichupe: Ma’erã piko rejapóra’e ko’ã mba’e. Ha’ekuéra oikuaapáma okañy hague Ñanderuetégui, ha’e voi omombe’úgui ichupekuéra.
11Ha he’i hikuái ichupe: Mba’épa rojapóta ndehegui ko yguasu okirirĩ hag̃ua ñandéve. Pe yguasu ko’ýte ipochy pochyve ohóvo.
12Ha’e he’i ichupekuéra: Chereity yguasúpe, ha pe yguasu pochyete okirirĩta peẽme, che aikuaa voi che rupínte ouha pendeári ko yvytu ratãite.
13Ha umi kuimba’e oñeha’ãmba omboja jevy hag̃ua pe barcoguasu y rembe’ýpe, ha jepevérõ ndaikatúi, pe yguasu katu ipochy pochyve ohóvo.
14Upémaramo ojerure iñembo’épe Yvága Járape he’ívo: Péina ko’ág̃a rojerure ndéve Yvága Jára, anítei romano ko kuimba’e kóva rekove rupi, ha ani remoĩtei oreári huguy, oimérõ heko potĩva. Nde voi, Yvága Jára, rejapókuri ko’ã mba’e reipotáguinte.
15Ha ojapyhy hikuái Jonáspe, ha omombo ichupe yguasúpe, ha pe yguasu pochyete opyta okirirĩ.
16Ha umi kuimba’e tuicha okyhyje Yvága Járagui, ha oikuaave’ẽ ichupe g̃uarã, ha ha’ekuéra ome’ẽ iñe’ẽ ojeroviaseha hese.
17Ñanderuete katu omondo peteĩ pira ndetuicháva omokõ hag̃ua Jonáspe, ha Jonas oiko upe pira ryépe mbohapy ára ha mbohapy pyhare.
Who We AreWhat We EelieveWhat We Do
2025 by iamachristian.org,Inc All rights reserved.
