Éxodo 32 - Biblia en Guaraní - ?anderuete ?e’? Por? 2015

1Ha Israelguakuéra ohechávo Moises hi’areha oguejy jevy hag̃ua cérrogui, oñemboja hikuái Aaron rendápe ha he’i ichupe: Epu’ã, ha ejapo oréve ore jararã ohótava ore renonderãme; ndoroikuaáigui mba’épa ojehura’e Moiséspe, pe kuimba’e oreguenohẽva’ekue Egípto retãgui.

2Ha Aaron he’i ichupekuéra: Pegueru chéve pene namichãi oroguiguáva oĩva pene rembireko, pende ra’y ha pende rajy nambíre.

3Upéramo mayma Israelgua ogueru Aaron rendápe inamichãinguéra oroguiguáva, inambi rehe oĩva’ekue.

4Ha ha’e ombohyku porã rire omoha’ãnga peteĩ tóro ra’yrusu. Upéramo he’i hikuái: Israel, kóva ningo nde jára, neguenohẽva’ekue Egípto retãgui.

5Ha Aaron ohechávo ko’ã mba’e, omopu’ã peteĩ kuave’ẽmby renda pe tóro ra’yrusu ra’ãnga renondépe; ha omoherakuã he’ívo: Ko’ẽ ramo oĩta vy’aguasu pende járape.

6Ha ambue ko’ẽme opu’ã hikuái ko’ẽtĩ jave ha oikuave’ẽ kuave’ẽmby ojehapypáva ha py’aguapy reheguáva; ha tetãyguakuéra oguapy okaru ha hoy’u hag̃ua ha uperire opu’ã hikuái ovy’a hag̃ua.

7Upéramo Ñanderuete he’i Moiséspe: Pya’e, eguejy, ne retãyguakuéra nde reguenohẽva’ekue Egípto retãgui, oñemboheko vaipa hikuái.

8Pya’ete oñemboyke hikuái pe tape porãgui ha’eva’ekue ichupekuéra; ha ojapo hikuái ijupekuéra g̃uarã peteĩ tóro ra’yrusu ra’ãnga óro oñembohykupyrégui ha omomba’eguasu ichupe, ha oikuave’ẽ ichupe kuave’ẽmby, ha he’i hikuái: Israel, kóva ningo nde jára neguenohẽva’ekue Egípto retãgui.

9Ñanderuete he’ive Moiséspe: Che ahechakuaáma ko’ã tetãygua iñakãhatãha.

10Ko’ág̃a chereja che pochy hag̃ua hesekuéra ha tahundi ichupekuéra, ajapo hag̃ua ndehegui peteĩ tetã ndetuicháva.

11Upémaramo Moises oñembo’e Ñanderuete renondépe, ha he’i: Ore Ruete, mba’érehepa nde pochy ne retã rehe, nde reguenohẽva’ekue Egípto retãgui tuicha pu’aka ha pyapy mbaretépe.

12Ma’erã piko Egiptoyguakuéra he’íta: Mba’evairãnte Ha’e oguenohẽ ichupekuéra, ha ojukapa hag̃ua cérro rehe; ha oipe’a hag̃ua ichupekuéra yvy árigui. Embogue nde pochy ha embyasy rejaposégui mba’evaiete ne retãyguakuéra rehe.

13Nemandu’ána Abraham, Isaac ha Israel ne rembiguaikuéra rehe, ichupekuéra reñe’ẽme’ẽva’ekue ndejehe voi ha ereva’ekue ichupekuéra: Che ambohetáta ne ñemoñarenguéra umi mbyja árape guáicha; ha ame’ẽta ne ñemoñarenguérape upe yvy upéva, Che aprometemava’ekue upe yvy opytataha imba’e ramo opaite ára peve.

14Upémaramo Ñanderuete ombyasy he’i haguére ojapotaha mba’evai hetã rehe.

15Ha Moises ojere ha oguejy pe cérrogui ha ogueru ipópe umi mokõi ita ipéva Ñanderuete ohai haguépe umi tembiapoukapy mokõivéva hova rehe.

16Ko’ã ita ipéva ningo Ñanderuete rembiapokue ha umi tembiapoukapy ojehaíva ipype, Ñanderuete voi ohaiva’ekue.

17Josue ohendúvo hetãyguakuéra sapukái, he’i Moiséspe: Ku sapukái oñorãirõ ramoguáicha che ahendu oĩha hekohápe.

18Moises katu he’i ichupe: Ndaha’éi imbaretéva sapukái ni ndaha’éi ikangýva sapukái; che ahendu umi opurahéivante.

19Ha Moises og̃uahẽvo pe atyhápe ha ohechávo pe tóro ra’yrusu ra’ãnga ha umi ojerokýva, ipochyeterei ha omombo umi ita ipéva ipópe oguerúva, ha ojoka cérro rehe.

20Ha ojapyhy pe tóro ra’yrusu ra’ãnga, ha’ekuéra ojapova’ekue ha omombo tatápe, ha omongu’ipa rire omosarambi iku’ikue y ape rehe, ha omboy’uka ichugui Israel ñemoñarenguérape.

21Ha Moises he’i Aarónpe: Mba’éiko ko’ã tetãyguakuéra ojapo nderehe, regueru hag̃ua hi’arikuéra ko mba’evaietereíva.

22Ha Aaron he’i jevy ichupe: Ani ndepochýtei che jára; nde reikuaa voi ko’ã tetãyguakuérape, mba’éichapa ha’ekuéra oñemboyke pya’e mba’evaípe.

23He’i hikuái chéve: Ejapo oréve ore jararã oho hag̃ua ore renonderãme; ndoroikuaavéigui mba’épa oiko Moisésgui, oreguenohẽva’ekue Egípto retãgui.

24Upérõ che ha’e ichupekuéra: Umi oguerekóva guive óro, togueru chéve. Ha ogueru hikuái pe óro ha aity tatápe, ha osẽ ko tóro ra’yrusu ra’ãnga.

25Ha Moises ohechávo hetãyguakuéra ndojejokokuaavéima, Aaron ohejágui oiko hag̃ua iñakãre ha hese ija’e’ỹva ovy’ataha,

26Moises oñemoĩ pe tekoha rokẽme, ha he’i: Mávapa opytáta gueteri Ñanderuete ndive, umía toñembyaty chendive. Ha oñembyaty hendive mayma Levi ñemoñare.

27Ha Moises he’i ichupekuéra, péicha he’i Ñanderuete, Israel Jára: Pemoĩ pende kyse puku pende ku’a rehe; ha pehasa ñande rekoha rupi peteĩ apýragui ambue apýra peve ha pejuka pene pehẽnguekuérape, pene irũnguéra ha pende róga ykereguakuérape.

28Ha umi Levi ñemoñare ojapo Moises he’i haguéicha; ha upe árape 3.000 kuimba’e rupi omano hetãyguakuéra apytégui.

29Upéramo Moises he’i: Ko árape peñeme’ẽmba Ñanderuete pópe ha pehechauka pehayhuveha Ñanderuete rembipota pende ra’ykuéra ha pene pehẽnguegui.

30Uperiregua árape Moises he’i hetãyguakuérape: Peẽ peñemboheko vaipágui ajupi jevýta Ñanderuete rendápe, aporandu hag̃ua Ñanderuetépe: Ha’epeneperdona jevýtapa térã nahániri.

31Upéramo Moises ojupi jevy Ñanderuete rendápe, ha he’i: Ajerure ndéve, ko’ã tetãygua oñemboheko vai eterei ojapógui ijupe g̃uarã ijárarã oroguiguáva,

32 eperdonamína ichupekuéra, ha ndaupéichai ramo, eipe’a avei che réra nde kuatiañe’ẽ rehaiva’ekuégui (oĩháme opaite téra oikoveva’erãva tapia g̃uarã).

33Ha Ñanderuete he’i jevy Moiséspe: Pe oñemboheko vaíva chendivénte, aipe’áta che kuatiañe’ẽgui.

34Tereho ha egueraha ko tetã kóva mamo Che ha’e haguépe ndéve; ha eikuaa porãke, che yvága rembiguái (ángel) ohóta ne renonderãme; ha pe jehaviraha árape, ahaviráta ichupekuéra hembiapo vai ojapova’ekue rehe.

35Ha Ñanderuete ohavira Israelguakuérape ojapo haguérehe hikuái tóro ra’y ra’ãnga, ijára ramo, Aaron po rupi.