Levítico 8 - Biblia en Guaraní - ?anderuete ?e’? Por? 2015

Ojeporavo Aaron ha ita’yrakuérape pa’i ramo

1Ñanderuete oñe’ẽ Moiséspe, ha he’i:

2Eraha Aaron ha ita’yrakuérape g̃uarã: Ijaokuéra, pe acéite omona hag̃ua, pe tóro ra’yrusu angaipáre g̃uarã, mokõi ovecha mácho ha pe ajaka’i oĩháme pe pan ojejapova’ekue levadura’ỹre.

3Upéi embyatypaite Israelguakuéra pe óga jojohuha rokẽ renondépe.

4Moises ojapopa Ñanderuete he’i haguéicha ichupe, ha Israelguakuéra oñembyaty pe óga jojohuha rokẽme.

5Ha Moises he’i umi ijatývape: Ko’ã mba’e Ñanderuete ojapoukáma.

6Upéramo Moises ombojauka Aaron ha itayrakuérape, ha ýpe ojohéi ichupekuéra.

7Ha omoĩ hese pe camisa ipukúva ha pe ku’a jokuaha; upéi omonde hese pe póncho puku ha hi’ári pe póncho mbyky (efod), ha hi’ári jevy peteĩ ku’a jokuaha, ojopy porãva hese.

8Upéi omoĩ hi’ári pe pyti’a voko, ha hyepýpe omoĩ umi Urim ha Tumim (mokõi ita vera).

9Upéi omoĩ iñakã rehe peteĩ víncha (akãrague jokoha) ha iguýpe henonde gotýo peteĩ mba’epe (pláca) oroguiguáva ojehai haguépe oñemboykemaha Ñanderuetépe g̃uarã, Ha’e he’iuka haguéicha Moiséspe.

10Upérõ Moises ojapyhy pe acéite omona hag̃ua pe óga jojohuha ha opaite mba’e oĩva guive ipype omboyke hag̃ua Ñanderuetépe g̃uarã.

11Ha ohypýi ipype pe kuave’ẽmby renda ape 7 jevy, ha upéi omona pe kuave’ẽmby renda tápia opaite hembiporukuéra reheve, pe yenda ha ipyendáre.

12Ha oñohẽ acéite Aaron akã ári, oñemboykégui ichupe Ñanderuete rembiapópe g̃uarã.

13Upéi Moises ombojauka Aaron ra’ykuérape, ha omonde hesekuéra ijao puku, ha omoĩ iku’a jokuaha, ha omohenda hesekuéra pe akã rehegua víncha, péicha Moises ojapopa Ñanderuete he’i haguéicha ichupe.

14Upéi ogueruka pe tóro ra’yrusu angaipáre g̃uarã, ha Aaron ha ita’yrakuéra omoĩ mbarete ipokuéra pe tóro ra’yrusu akã ári,

15ha oajura kytĩ; ha Moises ojapyhy huguykuégui, ha ikuãme omoĩ pe kuave’ẽmby renda ratĩ jerekuévo rehe, upéi omopotĩ pe kuave’ẽmby renda ha pe tuguy hembýva oñohẽ ipýre, péicha oñemboyke pe kuave’ẽmby renda Ñanderuetépe g̃uarã ha pe angaipavóra oñemoĩ porã jevy hag̃ua ikuave’ẽmby rupi Ñanderuete ndive.

16Upéi ojapyhypaite hyekue ári guare kyrakue, ipy’akue kyrakue, mokõive ipitikiri’ĩngue ikyrakue reheve ha Moises ohapypa pe kuave’ẽmby renda ári.

17Ha pe tóro ra’yrusu pirekue, ho’okue ha hepotikue ojehapy tatápe, pe tekoha oka gotýo, Ñanderuete he’i haguéicha Moiséspe.

18Upéi ogueruka pe ovecha mácho kuave’ẽmby ojehapyva’erãva ha Aaron ha ita’yrakuéra omoĩ mbarete ipokuéra pe ovecha mácho akã ári,

19ha oajúra kytĩ, upéi Moises ohypýi huguykuépe pe kuave’ẽmby renda tápia jerekuévo;

20oipehe’ãmba pe ovecha, ha Moises ohapy iñakãngue, ipehẽnguekuéra ha ikyrakue.

21Upéi Moises ojohéi ýpe umi hyekue, hetymakue ha ohapypaite pe ovecha mácho kuave’ẽmby renda ári, kuave’ẽmby hyakuã asy ramo, ha oñemoĩ porã jevy hag̃ua Ñanderuete ndive; Ñanderuete he’i haguéicha Moiséspe, peichaite ha’e ojapopa avei.

22Ha upéi ogueruka pe ovecha mácho mokõiha, ko kuave’ẽmby rupi Moises omoingo ichupekuéra ipa’i rembiapópe, upévare Aaron ha ita’yrakuéra omoĩ mbarete ipokuéra pe ovecha akã ári.

23Ha Moises oajúra kytĩ rire omoĩ huguykuégui Aaron nambi akatúa rehe, ikuãguasu akatúa ha ipysãguasu akatúa rehe.

24Upéi ombojauka Aaron ra’ykuérape, ha Moises omoĩ avei pe ovecha ruguykuégui inambi akatúa rehe, ikuãguasu akatúa ha ipysãguasu akatúa rehe; Moises ohypýi avei pe huguykuégui pe kuave’ẽmby renda tápia jerekuévo.

25Upéi ojapyhy ikyrakue, huguaikue, opaite kyra hyekueguare, ipy’akue kyrakue, mokõivéva ipitikiri’ĩngue ikyrakue reheve ha icuárto akatúa.

26Ha ojapyhy peteĩ pan ojejapova’ekue levadura’ỹre, peteĩpan he’ẽva ha peteĩ mbeju pe ajaka’ígui, oĩva Ñanderuete renondépe, ha omoĩ umi tymba kyrakue ha icuárto akatúa ári.

27Ha Moises omoĩmbaite Aaron ha ita’yrakuéra pópe, omyatymoi hag̃ua ko kuave’ẽmby Ñanderuete renondépe.

28Upéi Moises ojapyhy jevy ipoguikuéra ohapy hag̃ua kuave’ẽmby rendápe ambue kuave’ẽmby ojehapypáva ári; ko’ã kuave’ẽmby rupi Moises oiporavo ichupekuéra ha omoingo ichupekuéra ipa’i rembiapópe g̃uarã ha omohyakuã asy hag̃ua Ñanderuetépe.

29Upéi Moises ojapyhy ipyti’akue omyatymoi hag̃ua Ñanderuete renondépe; ko ovecha mácho pyti’akue Moises mba’erã, Ñanderuete he’i haguéicha ichupe.

30Uperire Moises ogueraha pe acéite omona hag̃ua ha pe tuguy oĩva kuave’ẽmby renda árigui, ha ohypýi Aaron ha ijaokuéra rehe, ita’ýra ha ita’ýra aokuéra rehe; péicha oñemboyke Aarónpe, ita’yrakuérape ha ijaokuéra Ñanderuete rembiapópe g̃uarã.

31Ha Moises he’i Aaron ha ita’yrakuérape: Pembopupu pe so’o pe óga jojohuha rokẽ renondépe; ha upépe pe’u pe so’o pan reheve oñemboykemava’ekue pende Ruetépe g̃uarã, peguenohẽtava pe ajaka’ígui che ha’e haguéicha peẽme, Ñanderuete he’iukágui: Aaron ha ita’yrakuérante ho’uva’erã umía.

32Ha pe so’o ha pan hembýva, pehapypava’erã.

33Pe óga jojohuha rokẽgui napesẽmo’ãi 7 ára (día) javeve, oñemboty peve pende róga jojohuha rembiapo arakuéra.

34Ojejapo haguéicha ko árape, Ñanderuete ojapouka avei pe kuave’ẽmby oñemoĩ porã jevy hag̃ua hendive.

35Pe óga jojohuha rokẽme peiméta 7 ára ha pyhare pukukue, ha pejapóta Ñanderuete rembiapoukapy, ani hag̃uátei pemano; péicha oje’égui chéve ajapouka hag̃ua.

36Ha Aaron ha ita’yrakuéra ojapo opaite mba’e Ñanderuete he’iva’ekue guive Moiséspe.