1Uperire Job oñe’ẽ jevy ha he’i:
2Añetehápe peẽ voi ningo tetãygua arandu, ha penendive omanóta pe arandu.
3Che avei chearandu peẽicha, ha che ndachemichĩvéi pendehegui, ha máva piko ndoikuaái peichaha.
4Che irũnguéra oñembohory cherehe, cherasy mboyve ahenoiva’ekue Ñanderuetépe ha Ha’e ombohovái chéve, upeichavéramo jepe ko’ág̃a oñembohory heko potĩ ha heko porãva rehe.
5Peẽ peñembohory che jehasa asy rehe peñeñandu porãháre ha peẽ pemyañave umi oñepysãngávape.
6Py’aguapýpe oiko mondaha hogapýpe, ha umi ombopochýva Ñanderuetépe oiko kyhyje’ỹre oimo’ãgui hikuái Ha’e omoĩmbaha ipopekuéra oguerekóva guive.
7Néi, eporandúna umi mymba, ha guyrakuéra ára peguápe, ha’ekuéra nerekombo’éta ha ohechaukáta ndéve iñarandu.
8Térã eñe’ẽ pe tahýipe oĩva yvýpe, ha’e nembo’e hag̃ua, ha umi pira yguasu pegua omombe’úta avei ndéve iñarandu.
9Ko’ãva apytégui oimeraẽva oikuaa voi Ñanderuete po ojapopa hague ichupekuéra.
10Ipópe voi ningo oĩ oikovéva ánga, ha opaite kuimba’e ha kuña ipytu porã.
11Añetehápe ñande apysa ombojuavy umi ñe’ẽ ñahendúva guive, ñane apekũ ombojuavy háicha pe tembi’u ja’úva guive.
12Itujáva ndive oĩ arandu ha oikove pukúva ndive oĩ akãporã.
13Ñanderuete iñarandueterei ha ipu’akapa, ohekombo’e hekoitépe ha iñakãguapy porã.
14Nemandu’a porãke, umi yvyarigua Ha’e oityva’ekuépe nopu’ãmo’ãvéima ha umi Ha’e omoingévape cárcelpe nosẽmo’ãvéima araka’eve.
15Ema’ẽ porãke, Ha’e ojoko ramo pe ama opaite mba’e ipirupáta; ha opoi ramo pe yguasúgui, ombyaipáta pe yvy ape.
16Hendive oĩ pu’aka ha arandu, ha ipópe ningo oĩ pe ojavýva ha pe oporombojavýva.
17Ñanderuete omonandi mburuvichakuérape imba’eitágui ha ombotarova umi mbojovakehárape.
18Ha’e oipe’a umi tetã ruvicha ñaña iguapyhágui ha omosã ichupekuéra iku’águi.
19Py nandi reheve Ha’e oguerahauka pa’ikuérape, ha oity mburuvichakuérape.
20Ha’e omoñe’ẽngu umi oñembotuichávape ha karaietéva arandu Ha’e oipe’a.
21Ha’e omotĩ mburuvichakuérape, ha omokangy umi imbaretévape.
22Ha’e omyesakã pe pytũ vaietéva ha oguenohẽ hesakãháme pe pyhare hũetéva.
23Ñanderuete omopu’ã umi tetã, ha upéi Ha’e oheja oñehundi, Ha’e oheja umi tetã okakuaa porã ha upéi omosarambi umívape iñaña haguére.
24Ha’e oipe’a umi tetã ruvicha apytu’ũ ha upéi omokañy ichupekuéra desiértope, oĩ’ỹháme tapekuéra,
25oiko hikuái jepovyvyhápe pytũguýpe ha ovava hikuái ku oka’úvaicha.
Who We AreWhat We EelieveWhat We Do
2025 by iamachristian.org,Inc All rights reserved.
